R&D in Zawlpui Bialah Ei siam dan zirtirna an pe:

February 5, 2021 khan Mizoram Baptist kohhran, Relief and Development Department buatsaihin Zawlpui Pastor Bial huapin, Zawlpui-ah Skill Development Project hnuaiah Eisiam dan Training neih a ni a. Headquarters atangin Rev. R. Lalbiakliana,  AGS – Service, Pu Lalrinawma, Director BCM R&D leh Rev. Dr. Lalzarliana Director, Communications Department te leh R&D thawktu  mi 5 an kal.

Director R&D, Pu Lalrinawma’n Pathian hnena inhlanna hun hmangin Training bul a tan a, hriat tur pawimawh te leh hmalak dan tlangpui te a sawi hnuah  Training hi neih nghal a ni. Project incharge pahnih – Pi R. Zonunsangi leh Nl. C. Remsangpuii ten zirtirna hi an pe a ni.

He Training-ah hian Thingtlang mite tana hmanraw lakkhawm awlsam leh an ban phak bungbel te hmanga Cake leh chhang siam dan te, Thlai hnah leh rah an thar chhuahte hmanga ei tur tha siam dan te leh tunlai thalai leh naupang ten an duh em em, Kimchi siam dan awlsam hrisel zawk leh awlsam zawk te zirtirin hlawk takin hun an hmang a ni.  He training-ah hian Zawlpui Bialchhunga BKHP leh TKP hmeichhia 45 zet an tel thei a, an thil zir chu hlawkthlak an tiin an lawm hle a ni.

BCM R&D hian Skill Development Project hi hun engemawchen kalpui a ni tawh a. He Project hnuaiah hian Self Help Group te siamin Ei siam te, Pa khawi te, Pangpar khawi leh cake siam Training te an neihpui thin a. Training Centre ah Self Help Group te puala Training an pek thin bakah, a remchan dan leh kohna an dawn angin Thingtlang lamah te Training pe-in an feh chhuak thin a ni.