RELIEF SUNDAY (June 16,2019)

Kauchhuah-ah tuilian tuarte tanpuina sem lai

Tunkar Pathinni–June 16, 2019 hi Mizoram Baptist Kohhran Nipawimawh “Relief Sunday” a ni a. Mizoram Baptist Kohhran Biak In tinah he Ni pual hian Pathianni chawhma Inkhawm hun hman a ni ang. Kumin Relief Sunday Thupui chu “Pe rawh u, tichuan pekin in awm ang”. (Luka 6:38) tih a ni ang a, Hemi nia thawhlawm hi BCM Charity Fund-ah dah turin Bial kaltlangin Headquarters-ah thawn tur a ni ang.

Tawngtainaa hriat tur Pawimawh:

1. Khuarel chhiatna leh vanduaina a lo thlen hian BCM chuan a tuartu khawsak harsa tak tak te chhawmdawlna Relief & Developement kal tlangin a pe thin a. Amaherawhchu kan budget te a tam tawk lo hle a, pawn lamah tanpuina kan zawng thin a. Heng tanpuina kan hmuhte hi tar leh upa te tein an thawhkhawm a ni thin. Tun dinhmunah keini aia pachhe zawk ram lamah tanpuina a kal tam avangin keimahni lamin kan thawhchhuah ve a ngai ta a.

2. BCM Assembly 2018 chuan he mi hi hre reng hian BCM Charity Programme a buatsaih ta a. Hei hi keimahni tan a nih avangin theihtawp chhuaha tanpui ngaite tanpui tura ringtute kan inpek zual deuh deuh theih nan leh he programme Assembly-in a duan hi a lo hlawhtlina, Pathian hnathawh a lan chhuahna hmanrua a nih theih nan i tawngtai ang u.

3. Relief kan thawhna kawngah hian kristian leh kristian lote pawh pek thin an ni a. Kristian lote pawhin he Relief an dawn atanga Lal Isua an lo hmuh theih nan i tawngtai ang u.

…………..

Relief Sunday lo chhuah dan

Kum 1966-1968 lai vel khan Mizoramin hun khirh tak tak mai a tawk chho va, Mau tamin min nuai hnu lawkah Mizoram buaiin min han nang leh ta a. Chubakah tihluihnaa khawsawikhawmin kan awm a, Mizo mipuite kan mangang tak tak a ni. Heng harsatna laka min chhawm dawl turin India ram leh ram pawn thlengin Kohhran kal tlangin tanpuina (relief) kan dawng thin a. Heng tanpuina kan dawnte hi mumal taka kan sem chhuah theihna tur leh Kohhran pawhin mipui mangangte tanpuina tur thawhlawm (Relief Fund) a bika siam tha a ti ta bawk a. He chhawmdawlna rawngbawlna hi Kohhrante thinlungah tuh thar zela, uar deuh deuh a lo nih theih nan kum tinin June thla Pathianni vawi thumna zel hi he mi pual hian Kohhranin hman ni se tih a lo ni ta a ni.

Chhawmdawlna hna thawk turin tunah chuan BCM Headquarters-ah chauh ni lovin Bial leh Tualchhung kohhranah pawh Relief & Development Committee chu din a lo ni ta zel a. Tangkai takin chhawmdawl ngaite chhawmdawl hna a thawk ta a ni.

………

BCM REIEF AND DEVELOPMENT REPORT 2019

Lalrinawma, Director, Relief & Development Departemnt

Pathian rawngbâwlna tiin Biak inah leh kohhran Program-ah te kan tel a, tawngtai inkhâwm leh Mission field pawh i lo tlawh fo tawh thîn, thil tha tak leh pawimawh tak a nih a, hemi tluka pawimawh Rethei, Pachhhia tanpui ngai kan bulhnai lawka awm te kan thlauhthlâk si chuan, Pathian ram ngheh leh lanfiahna kawnga pawimawh tak kan hloh dâwn tihna a ni.

Tanpui ngaite puihna leh chhawmdâwlna rawngbâwl hna pawimawhzia hriain Mizoram Baptist Kohhran pawhin kum 1990-ah Relief & Development dinin vawiin thlengin he rawngbâwl hna hi a la chhunzawm zêl a ni. Mi inpe te thilphalna leh Pathian mite tawngtaina zârah BCM Relief & Development Department rawngbâwlna pawh harsatna han tawh deuh châng awm mahse, Pathian hruainain hma kan sâwn ve zêl a ni. Relief & Development hmanga kan rawngbâwl mêkna chanchin tlângpui i han thlirho teh ang u.

Thawktu: Tûnah hian Thawktu Contract leh a ngheta rawih mêkte nên mi 12 kan awm mêk a, Pathian khawngaihna zârah kan buaina khawp hna kan nei ve reng a ni. Hmalâkna thenkhatte:

 

1. SKILL TRAINING:

(1) Puanthui zirna: Hei hi hmeichhe tân bîka buatsaih niin thla ruk course a ni a. Kum 2018-2019 khan mi 30- in tha takin an zir zo thei a. Central sorkar kaltlangin Indianeers te nên he Program hi kalpui a ni. Kum 2018- 2019 batch-a zir chhuakte hian Central lam atanga examiner lo kalte hnuaiah Practical leh Theory uluk takin exam an paltlang hnuah result tha tak neiin an zir chhuak a ni.He ta zirchhuakte hi Puanthui khâwl (Ke khâwl) leh Certificate tha tak pêk vek an ni bawk.

(2) Nursing Training : General Nursing & Mid wifery zir tûrin thalai hmeichhiate chu Christian Medical Centre, Pithapuram, Andra Pradesh-ah tirh thin an ni a. Tûn reporting period chhûng hian  Batch 3-in zir mêkin zirlai 32 an awm mêk a, result pawh tha tak an nei a ni. Tin kan tirh hmasak ber 2014 batch-a zirlai 2 te chuan First Division-ah Pass-in an zir chhuak tawh bawk.

2. WOMEN DEVELOPMENT PROJECT:

Lydia project hnuaia Hmeichhe tân bika Self Help Group pawh Aizawl leh Lunglei area-ah te enkawl chhunzawm zêl a ni a. Hemi hmang hian mi tam zâwk chuan eizawnna ngêlnghet leh rintlâk zâwkin hma an la mêk a. Lunglei Area ah Group 26-ah member 224 awmin, Aizawl Area-ah Group 30-ah member 260 vêl an awm bawk. Group-te hi loan pêk thin an ni a, Member-te hian an loan lâk atang hian eizawnna atân hna kawng hrang hrang an thawk a, Group ang leh mi mal anga hmang tangkaiin hma an la a, an hlâwkpui hle a ni. Hêng kan SHG te hi a remchân d?n angin UD & PA lam leh concern Department-ah te affiliate an ni a. An hnên atangin tanpuina leh loan te pêk an ni. Tin, an sum lâk luh tih punna leh thiamna neihna turin thiam thil chi hrang hrangah training pêk an ni a. Micro credit loan, Lydia Loan fund atangin pêk thin an ni bawk. Kumin chhûng hian Self Help Group thlan chhuah 13 te hnênah Rs. 630,000 /- (Chêng Nuairuk leh singthum) pêk chhuah a ni bawk.

3. ZO-CLINIC:

Zo-clinic, Malaria leh natna tlânglâwn endikna hmun leh damdawi pêk chhuah theihna hmun hi Kum 2000-ah Chawngte ‘P’-ah bul tannin Khaw hrang hrang, Doctor leh Damdawi hmun awm lohna-ah te leh Malaria tamna lamah theihtâwpin hma lâk tan a ni a. Tûnah khaw 75-ah tha taka kalpui chhunzawm zêl a la ni a. He Zo-clinic hi mipuiten an hmang tangkai hle zêl a ni. Kum 2000-2010 inkârah chuan Positive case pawh thla khatah 1000 chuang dawn hmuh châng te a awm thin a, tûnah chuan Pathian zârah a lo tlahniam ta hle a ni. Kumin chhûng hian thisen exam 280 report kan dawng a, hêng zingah hian Positive case 9 hmuh chhuah a ni. Malaria vânga thi report kan dawng lo va, Malaria vânga harsatna pawh a tlahniam ve zêl niin kan hria a, thisen test pawh an vâng ta viau a, Malaria leh a kaihhnawih inzirtîrna kan neih bâkah Clinic centre kan neihte hi Mizorama Malaria vânga thihna leh harsatna lo tlâkhniamna chhan pawimawh tak niin kan ngai a. Kuminah Technician-te thiamna tih hmasâwn nân leh a khua miten an mamawhna hriain Zun exam (Urinalysis) training kan buatsaih a, heath hian kan Technician mi 13 training pêk tawh niin tûnah hian mi dangte training pe leh tûrin kan inbuatsaih mêk bawk.

4. AGRICULTURE DEVELOPMENT

 Huan lo neitute tih hmasâwn nân Tlângram lo neih dân SALT zirtîr thin an ni a, hei bâkah hian Lei tha siam te, ran vulh te leh chuktuah huan siam leh enkawl dân zirtîrna pêk thin a ni. Kumin hian khaw hrang hrangah he program hi neihpui niin huan neitute zingah Group din a ni a, group kaltlang hian Thlai chi leh Thlai tiak te man tlâwm zâwka an lei theihna tur ngaihtuahsak an ni bawk. Tin loneitu pâwlte hi Central sorkar lamin exhibition a buatsaih chângin kalpui ve thin an ni bawk.

5. RELIEF

Khuarêl chhiatna Tui lian Leimin, Thli leh Rial bâkah Kângmei avânga chhiatna thleng kumin hian an awm leh nual a, hêng tuartute chhawmdâwl nân  Local budget atang leh pâwn lam tanpuina kan hmuh atangin pêk thin a ni. Kumin  chhûng hian Emergency relief atân pawisa Rs. 400,000/- chuang sên ral bâkah Rangva phêk 50, Silpouline 104, Buhfai Bag 150, Secondhand Bag 40 leh Thosilên 133 te sem chhuah tawh a ni a. Hêngte hi Bialtu Pastor kal tlang te, Tualchhung kohhran kal tlangte leh R&D Staff te a hmuna kalin pêk an ni. Kumin chhûng hian Tlabung Area Kawrpuichhuah, Tiperaghat bâkah Putlungasih, Zâwlpui, Tuisen, Bolia, Buarpui leh Kauchhuah, Vairengte, Diltlang, Mamit-ah te kalin Relief buhfai leh pawisa te pêk a ni. Bialtu Pastor kal tlangin khaw hrang hrangah relief sem chhuah a ni.

Tin, ‘Habitat for Humanity’ pâwlte nêna thawhhonain Tlabung khua leh Serhuanah Tuilian tuarte chhawmdâwlna bungraw hrang hrang kan dawn Water filter, Blanket, Thosilên, Bungbêl leh thuamhnaw  a vaiin Rs. 15,00,000 ( Nuai sawmpanga) man hu chhûngkaw 126 hnênah pêk a ni bawk.

6. DISASTER RISK REDUCTION WORKSHOP:  

BCM Relief & Development Department leh APBAid te tangkawpin  kumin 2018-2019 hian Chhiatrupa lo thleng theite inzirtîrna leh a ti tlêm tura inzirtîrna leh ngaihtuah hona ‘Disaster Risk Reduction Workshop’ chu Tlabung, Chawngte-P, Phairuang leh Kawrpuichhuah te neih a ni. Hetah hian khaw hrang hrang 9 atangin thalai leh zirlai 400 chuang an lo tel bawk. Hêng hunah hian mipuite an kal thain, hun tha tak hman a ni a. He Program-ah hian Asia Pacific Baptist Aid (APBAid) Director pawh lo telin hun min hmanpui bawk.

 

7. BCM CHARITY PROGRAMME:

BCM Assembly 2018-in a lo rêl tawh angin BCM Charity Programme chu kalpui mêk a ni a.

Tualchhûng kohhran leh mi mal inpe te kaltlangin Chêng Nuaithum chuang lai kan dawng tawh a, tanpui ngaite khuarêl chhiatna leh damlohna harsatna bîk neite hnênah sem chhuah a ni. Kan Local Budget atanga kan pêk theih bâkte tanpui nân Chêng 140,000/- pêk chhuah a ni.

8. IPED PROJECT:

CASA India te nêna thawhhonain Kolasib District chhûngah Initiative of Peace & Economic Development Project kalpui mêk a ni a. He Project atang hian mihring dikna chanvo, Human rights, Women & Child rights and Protection chungchâng te, Hmeichhiate hmasâwnna leh Economic dinhmun siam nân Thiamna chi hrang hrang Pangpâr siam te, Chhang ur te leh Pa khawite zirtîr an ni bawk. Kolasib-ah hian Office neiin he project-ah hian thawktu mi 3 kan nei mêk bawk.

 

 

 

 

 

 

 

 

 

 

Posted in BCM News.

admin

Leave a Reply