RELIEF SUNDAY (June 17,2018)

Tunkar Pathinni–June 17, 2018 hi Mizoram Baptist Kohhran Nipawimawh “Relief Sunday” a ni a. Mizoram Baptist Kohhran Biak In tinah he Ni pual hian Pathianni chawhma Inkhawm hun hman a ni ang. Kumin Relief Sunday Thupui chu “In rit phurhte chu inchhawk tawn rawh u” (Galatia 6:2) tih a ni ang a. Headquarters atanga Relief Sunday thuchah buatsaih Kohhran Nipawimawh Bu ami chu Kohhran tinah chhiarchhuah a ni ang.

Kum 1966-1968 lai vel khan Mizoramin hun khirh tak tak mai a tawk chho va, Mau tamin min nuai hnu lawkah Mizoram buaiin min han nang leh ta a. Chubakah tihluihnaa khawsawikhawmin kan awm a, Mizo mipuite kan mangang tak tak a ni. Heng harsatna laka min chhawm dawl turin India ram leh ram pawn thlengin Kohhran kal tlangin tanpuina (relief) kan dawng thin a. Heng tanpuina kan dawnte hi mumal taka kan sem chhuah theihna tur leh Kohhran pawhin mipui mangangte tanpuina tur thawhlawm (Relief Fund) a bika siamtha a ti ta bawk a. He chhawmdawlna rawngbawlna hi Kohhrante thinlungah tuh thar zela, uar deuh deuh a lo nih theih nan kum tiin June thla Pathianni vawi thumna zel hi he mi pual hian Kohhranin hman ni se tih a lo ni a.

Kum tinin Relief Sunday hi June Pathian ni vawi thumnaah hman a lo ni ta a ni. Chhawmdawlna hna thawk turin tunah chuan BCM Headquarters-ah chauh ni lovin Bial leh Tualchhung kohhranah pawh Relief & Development Committee chu din a lo ni ta zel a. Tangkai takin chhawmdawl ngaite chhawmdawl hna a thawk ta a ni. Hemi nia thawhlawm hi tualchhung kohhran tinin Headquarter-a thawn lovin mahni kohhranah relief hna thawh nan hman tur a ni.

………………..

 

BAPTIST CHURCH OF MIZORAM
RELIEF AND DEVELOPMENT DEPARTMENT REPORT

– Lalrinawma, Director R&D.

Pathian khawngaihna zârah Relief Sunday 2018 kan lo thleng ve leh ta reng mai! Relief & Development Department pawhin a kum 28-na a hmang ve mêk bawk a ni. Pathian malsâwmna leh kohhrante thilpêk avângin Department pawhin hma a sâwn ve zêl a. Tanpui ngai, chhiat tâwkte chhawmdâwlna kawngah leh khawsak harsa zâwkte hmasâwnna tur ngaihtuahin theihtâwpin hna a thawk a, mi thahnem tak thiamna a zir chhuahtîr bawk a ni. A hnuaia mi ang hian kumina kan activities neih thenkhatte han târlang ila:

A. SKILL TRAINING:

Hmasâwnna kawng hrang hranga hmalâkna neih zêl a ni a. Hma lâk mêkna te chu:
1. Tailoring training: He Training hi hmeichhe tân bîka buatsaih niin thla ruk course a ni a. Kuminah hian mi 20 lâk an ni a. May thla atanga tanin November thla hian an zo dâwn a. Tin, Training chhuak te hnênah hian Certificate leh Puanthui khâwl pawh hlan thin an ni.
2. GNM Training: General Nursing and Mid-Wifery (GNM) zir tûrin Christian Medical Centre, Pithapuram, Andra Pradesh-ah zirlai tirh thin an ni a. Tûnah hian mi 15 zirtîr mêk niin, kumin hian mi 2 tha taka zir chhuak kan nei bawk.
3. Flower Arrangement Training: Tualchhûng kohhran-ah Biak In leh Inneihnaahte pangpâr kan khawi thîn a, mumal nei taka thiamna nei tûrin thalaite training pêk an ni thîn. Kumin hian BCM Rahsiveng te nêna tangkawpin thalai mi 20 training pêk an ni. Thalai dangte pawh training la pêk lehzêl tum a ni.

B. WOMEN DEVELOPMENT:

Hmeichhiate hmasâwnna tûr leh eizawnna zawn kawngah an lo intodelh zâwk theih nân Lydia Project neih niin Self Help Group din a ni a. Hemi hmang hian mi tam zâwk chuan eizawnna ngêlnghet leh rintlâk zâwkin hma an la mêk a ni. Tûnah hian SHG 65 awmin Member 635 an awm mêk a, Group te hi loan pêk thin an ni, member-te hian an loan lâk atang hian eizawnna atân hna kawng hrang hrang an thawk a, an hlâwkpui hle thîn a ni. NABARD te nêna thawhhonain Self Help Group member ho tân Training chi hrang hrang a hnuaia mi ang hi pêk an ni.
SHG Management training, Artificial flower Making, Food Processing (Pickel, Jam, Fermentation & Fast food), Piggery & Paultry farming, Handi Craft (Hand Bag, Door Mat, Soap Making (Beauty, Washing, Liquid soap), Mushroom Cultivation ( Pa khawi).

C. HEALTH DEVELOPMENT:

1. Health awareness: Hrisêlna kawnga hma kan sâwn theihna tûrin khaw hrang hrangah zirtîrna neih thin a ni a. Kuminah hian Lunglei khawpui chhûng BKHP member thlanchhuah te pualin Hepatitis, Diabetes, Scrubtyphus (Rannung seh),HIV/Aids chungchâng te Doctor thiam ruaiin inzirtîrna hun hman a ni a, BCM Vaisam kohhranah hman a ni bawk.
2. Zo-Clinic: Hrisêlna lam leh Malaria do kawnga hma lâk nân Techinician Training neih thin a ni a. Khaw hrang hrang atangin Training tur koh thin niin, Training chhuakte hnênah hian Microscope, BP Set, Zunthlum check-na pêk thin a ni. Malaria leh natna tlânglâwn endikna hmun leh damdawi pêk chhuah theihna hmun Zo-Clinic hawngin tûnah hian khaw 85-ah tha taka kalpui chhunzawm zêl a la ni a. He Zo-clinic hi mipuiten an hmang tangkai hle zêl a ni.
3. Up-gradation Training: Mamawhna avângin tûnah hian technician te skill up-gradation Training neih mêk a ni a, 1st Batch atân tûnah Technician 8 te hnênah Zun exam (Urinalysis) zirtîr mêk an ni.

D. AGRICULTURE DEVELOPMENT:
Lo/Huan neia ei zawngte hmasâwnna tûrin SALT, Lei tha siam dân training pêk an ni thîn. Tin, Farmers club 15 kan nei mêk bawk a, Thlai chi leh Tiak tha chah chhuahsakin man tlâwm (Subsidised rate)-in kan pe mêk bawk.

E. RELIEF:

Khuarêl chhiatna – Tui lian, Lei min, Thli leh Rial bâkah Kângmei avânga chhiatna a awmin Relief pêk thin a ni a. Hêng tuartute chhawmdâwl nân Local source (BCM thawhlâwm) atang leh hmun hrang hranga kan thawhpuite atanga tanpuina kan hmuhtein Relief hi pêk chhuah thin a ni a. Tin, Emergency relief atân Pawisa, Silpouline leh Thosilên sem chhuah thin a ni bawk. Tin, Transform Aid International Austrailia leh BCTA te nêna tangkawpin tuilian leh leimin tuar chhûngkaw 300 chuang hnênah tanpuina pawisa fai te, Blanket, Thuamhnaw, Buhfai, Sylpouline, Thosilên, Chini, Bâwnghnute, Dâl,chi, Noodle, Sahbawn te pêk an ni a. TAI te leh DM&R Government of Mizoram te nêna thawhhonain khaw 4-ah chhiat rupna lo thleng thei laka inrâlrin leh tihtlêm dân chungchâng Disaster Risk Reduction inzirtîrna neih a ni bawk.

F. STAFF SKILL DEVELOPMENT TRAINING:
Staff te thiamna leh hriatna tihpun/hmasâwn nân training-a in tirh thin a ni. Pathian khawngaihna zârah Relief Sunday kan lo thleng ve leh ta reng mai! Relief & Development Department pawhin a kum 28-na a hmang ve mêk bawk a ni.

G. HMA THAR LAK NA TUR INBUATSAIHNA:

1. Spawn Production & Cultivation (Pa chi siam leh khawi) hi NABARD te nêna tang hova hma lâk tum mêk a ni a. Inpuahchahna pawh neih mêk a ni. Self Help Group leh hetiang lama tui mite Training pêk leh zêl tum a ni bawk.

2. Church Auxiliary for Social Action (CASA) te nên kum thum chhûng (2018-2020)-a thawhhona kan ziak thar a. Kolasib District ah thawkho tûra duan a ni a. Tûnah hian kan thawhpui tur community zîngah Baseline survey neih mêk a ni.

3. BCM Charity: BCM Charity Program hi Assembly 2018-in min phalsak angin tûnah hian inbuatsaih chhoh mêk a ni a. A pawimawhzia hriain hemi atâna charity fund (Sum) tuakna tûrah pawh kan General Secretary leh AGS-te bâkah kan Mizo Celebrities Nl. Pensy B. Lalthangliani, Nl.Bethsy Larinsangi, Tv. Jeje Lalpekhlua, Pu. Lalrindika Ralte (Didika) te pawhin theihtâwp min chhuahpui a, kan lâwm hle. A hnuaia mi ang hian ruahmanna pawh siam a ni a, kohhranhote theihtâwp chhuaha he tanpui ngaite tâna rawngbâwlnaah hian lo tel tûrin ka sâwm bawk che u a ni. Tha thawha kan tel thei lo a nih pawhin thilpêk hmangin Department office-ah emaw BCM Charity Fund. SBI Ac no. 37736797255 ah hian thilpêk rawn pe tûrin thahnemngai takin kan sâwm che a ni e.
BCM Charity Programme:

Mathaia 25: 35: ‘Tihtakmeuhin ka hrilh a che u, hêng ka unau tê berte zinga mi pakhat chunga in tih chu ka chunga ti in ni’.
A nihna : BCM Charity hi Relief & Development, Baptist Church of Mizoram enkawlna hnuaia mi harsate leh tanpui ngaite tanpuina tur Program a ni.

Din duhna chhan: BCM Relief&Development Department hian khuarêl chhiatna leh mihring siam chawp chhiatna (Chênna In kâng angte) tuar hnênah chhawmdâwlna a pe thîn a. A tangkai êm êm lai hian a huam chin hi a zîm deuh hlek nia hriatna a awm a. Kohhran chhûngkuaa natna khirhkhân tuar, eizawnna mumal nei lo te, Ramtuileilo a khawsa, enkawltu nei mumal lo tanpui ngai kohhran leh khawtlângin theihtâwpa an lo buaipui hi khaw hrang hrangah an awm fo thîn a, Bialtu Pastor leh Tualchhûng kohhran hruaitute atanga tanpui dîlsakna pawh Department hian a dawng fo mai. Amaherawh chu, kan tanpui theihna dânin min phal chin pâwn lam a nih avângin a buaithlâk hle thîn. Tin, Khuarêl chhiatna tam tham deuh a lo thlen hian kan Relief Budget neihsa hi a beitham thin hle mai a, pawnlam atanga tanpuina a remchan tum a nih loh phei chuan a mangan thlak thin viau mai. BCM Charity Fund hi kan siam thei a nih chuan, hemi a tanpuina sum lo lut te hi Mi harsa zual tanpui ngai kan sawi tak te tanpuina leh chhawmdawlna atan te, khuarel chhiatna alo thlen a, tanpuina kan budget neihsa in a daihloh chang a phuhru tu atan kan hmang thei anga, kan harsatna tamtak a sut kian theih ngei kan beisei a ni.
A tih tûrte:
1. Sum tuak:
– Mi inpe, tanpui ngaite tâna inphal zawng chhuakin hêng atang hian tanpuina lâkkhâwm hna a thawk thîn ang.
– A tul leh remchân dâna zirin tanpui ngaite pual Special Program a buatsaih thei ang.
– Tualchhûng kohhranah a tûl dâna zirin BCM Finance Rules pawm chin angin tanpuina a dîl thîn ang.
– Tualchhûng kohhranah awareness campaign a nei thîn ang.
2. Tanpui duhtuten awlsam zâwka an dah theih nân BCM Charity Fund Account a hawng ang. Relief & Development Dept. chu Account vawngtu a ni ang.
3. BCM Charity Fund hian a tûl dân leh tanpuina tur fund a neih dâna zirin chhawmdâwlna a pe thîn ang.
4. Department lamin Committee remtihnain, Tualchhûng kohhran, Bialtu Pastor te kaltlangin tanpui ngaite zawn chhuah leh tanpuina pêk hna a thawk thîn ang.
5. BCM Department dang Audio Visual lam te, a remchân dân angin a thawhpui ang.
6. Media lamah a theih anga zauvin a puangzâr ang.
7. Tanpuina hi a tul hmanhmawh dâna zir leh fund awm dân thlîrin pêk thin a ni ang a, tanpuina tûr zât pawh Committee-in a ngaihtuah ang.
Tanpuina dawng thei tûrte:
1. Chhûngkua, eizawnna mumal nei lo, hrisel lohna avânga natna khirhkhân/benvawn Inah emaw Hospital-a enkawl reng ngai te.
2. Chhûngkua, Pianphung leh rilru lama mi phâk lo enkawl lai nei, eizawnna mumal nei lo te.
3. Khuarêl chhiatna avânga In leh Lo chân, tanpui ngaite.
4. Rehabilitation centre leh Orphanage te (Special Occasions-ah)

Posted in BCM News.

Leave a Reply