Relief Sunday – June 20

Tunkar Pathianni June 20, 2021 hi Mizoram Baptist Kohhran Ni pawimawh “Relief Sunday” a ni a. Kumin Relief Sunday Thupui chu “Retheite ngaihtuah mi chu malsawmin a awm ang”. (Sam 41: 1-2 ) tih a ni.

Kum dangah chuan Relief Sunday-ah hian Pathianni zing inkhawmah Headquarters leh Tualchung Relief rawngbawlna chanchin te leh thupui thlan sa hmanga thuchah te sawiin ngaihthlak thin a ni a. Kuminah erawh chuan Covid-19 hrileng avangin Relief Sunday Programme pawh hi Biak Inah hman theih a ni dawn lo a, amaherawhchu Relief Sunday Puala Tawngtai thupui siam sa hmanga mahni remchan ang ang a tawngtaina hmang turin Kohhran hote kan in sawm a ni.

Relief Sunday puala Tawngtairual thupui chu:-

  1. Tanpui ngaite tanpui thei tura Lalpan min la ruat zel avangin lawmthu i sawi ang u.
  2. Khawvel hmun hrang hranga chhiatna thleng mekte hian a tuartu teah Isua lam a hawitir theih nan.
  3. Tanpuina hna kan thawh zel theihna turin mi inpe, Kohhran mi leh pawn lam thawhpuite Lalpan min pek zel theihna turin.
  4. BCM Relief & Development Department hnuaia thawktu zawng zawng te tan.

………

Relief Sunday Thu chah :

Mizoram Baptist Kohhran, Relief & Development Department hi Kohhran leh Pawl, Mimal inpete thilpek leh tawngtaina zarah vawiin thlengin harsatna leh buaina em em nei lovin, tanpui ngaite tanpui leh zirtirna hna thawkin kum 1990 atang khan chawl lovin a la kal ve zel a ni. Biblea kan hmuh angin ringtute chu tanpui ngaite tanpui turte, pachhiate tuamhlawma, ei tur neilote ei tur pe a, midang tana malsawmna ni tura hriattir kan ni.

Chu rawngbawlna chu Lalpa duh zawng tak a ni a, a te ber atanga a lian ber thlenga kan tih theih a ni. Chuvangin Mizoram Baptist Kohhran pawhin he rawngbawlna hi a ngai pawimawhin, chanchin tha hrilh nan , ringtute inpumkhat zel nan leh tihnghehna hmanraw pawimawh takah a hmang mek a ni. Kan ram dinhmun azirin, mite mangan leh harsat laia tanpuina rang zawka pek an nih theih nan BCM Assembly chuan ruahmannate a siam a.

Chu ruahmanna chuan, kangmei, tuilian, thlipui, leimin leh chhan hrang hrang avanga chenna in chan hlauhte tan Rs.2000-3000, BCM Emergency response atan a pe thin a. Heng tanpuinate hi chhiatna tawk an awm veleh, Bialtu Pastor leh Tualchhung Kohhran Hruaitu ten an kuta pawisa remchang awm atangin an lo pe thuai thin a. Chu chu BCM Relief and Development Budget atangin rulh leh thin an ni. Tin, hei bakah hian natna khirh khan bik tuarte, Chhungkuaa enkawl reng ngai rualbanlote, Home leh Hospitala awm tanpui ngai zual bik nia hriatte leh, khuarel chhiatna nasa zawk a awm changa, pawn lam atanga puihna a harsat chang atana hman tur BCM Charity Programme buatsaih , he programme atana Kohhran, Pawl leh mimal thahnemngai te thilpek tlingkhawm chu tanpuina atan hman a ni bawk thin.

Tin, R & D Department hian khawtlang hmasawnna, nu leh naupang dikna chanvo leh hmasawnna programme te, huan/lo neitute hmasawnna turte, thalaite thiamna leh eizawnna tur ngaihtuahpuite, khawtlang hriselna lam inzirtirte, khuarel leh mihringte siam, chhiatna thleng thei tihtlem leh inven dan zirtir thlengin a hma a ni. He rawngbawlna tawmpuia kan tel theuh theihna tur hian Thilpek leh Tawngtaina hmanga theihtawp min chhuahpui turin Kohhran mipuite thinlung takin kan sawm a che u.