Relief Sunday-June 21

Tunkar Pathianni June 21, 2020 hi Mizoram Baptist Kohhran Ni pawimawh “Relief Sunday” a ni a. Kumin Relief Sunday Thupui hi “Sem darh chu pun lehzualna” (Thufingte 11 24) tih a ni.

Kum dangah chuan Relief Sunday-ah hian Pathianni zing inkhawmah Headquarters leh Tualchung Relief rawngbawlna chanchin te leh thupui thlan sa hmanga thuchah te sawiin ngaihthlak thin a ni a. Kuminah erawh chuan Covid-19 hrileng avanga Kohhran Programme te hman theih a nih loh avangin Relief Sunday Programme pawh hi Biak Inah hman theih a ni dawn lo a. TV lamah erawh Relief Sunday Puala thuchah leh Relief lama Kohhran rawngbawl dan chanchin te pekchhuah a ni ang. Mahni chhungkua theuhah Relief Sunday puala hun hmang thei kan awm chuan a lawmawm hle ang.

Tawngtai thupui:

1) Thawhlawm hlanna (Chhungkuaa inkhawm leh thawhlawm lakhawmte tan)

2) Lalpan mi dang tanpui ngaite tanpui thei dinhmuna min dintir avanga lawm thu sawina.

3) Chhiat tawk tanpui ngai leh dinhmun chhe zawka dingte chhawmdawlna hna thawk thei tura mi inpe leh thil phalte an lo pun zel theihna turin.

4) BCM hian chhawmdawlna hna kan thawhnaah thawhpui tur tha kan neih zel theihna turin dil ila.

5) BCM Relief & Development Department hnuaia thawktu zawng zawng te tan.

Kum 1966-1968 lai vel khan Mizoramin hun khirh tak tak mai a tawk chho va, Mau tamin min nuai hnu lawkah Mizoram buaiin min han nang leh ta a. Chubakah tihluihnaa khawsawikhawmin kan awm a, Mizo mipuite kan mangang tak tak a ni. Heng harsatna laka min chhawm dawl turin India ram leh ram pawn thlengin Kohhran kal tlangin tanpuina (relief) kan dawng thin a. Heng tanpuina kan dawnte hi mumal taka kan sem chhuah theihna tur leh Kohhran pawhin mipui mangangte tanpuina tur thawhlawm (Relief Fund) a bika siaminin a enkawltu Department hran a din ta a. Chhawmdawlna hna thawk turin tunah chuan BCM Headquarters-ah chauh ni lovin Bial leh Tualchhung kohhranah pawh Relief & Development Committee chu din a lo ni ta zel a. 2018 atang phei chuan ‘BCM Charity Fund’ siam alo nil eh ta zel a, tangkai takin chhawmdawl ngaite chhawmdawl hna a thawk thin a ni. Chhawmdawlna kawnga kohhran hote intih chak tawnna ni atan June thla Pathianni vawithumna hi Relief Sunday atan a hmang ta zel a ani.

Relief Sunday Thuchah

BCM Relief & Development Department chuan a din chhan leh a thil tumte tihlawhtling turin, Kohhran hote tawngtaina leh Pathian hruainain kum 1990 atang khan vawiin thlengin a tul ang zela chhawmdawlna hna thawkin hma a la chho ve zel a. Pathian thua kan hmuh angin, tanpui ngaite tanpuina hna thawh, thilpek emaw, an tana thawhsak leh zirtir emaw hi ringtute tih makmawh a ni a. Pathian hnen ata malsawmna kan dawnna hnar pawimawh tak a ni bawk.

Tin, Pathian hnen atanga malsawmna kan dawnte avanga, a hnena lawm thu kan sawi lêtna pawimawh tak chu tanpui ngaite kan tanpui leh thilpek kan hlante hi a ni tih naupang atanga kan inzirtir uar zel hi a tul hle a ni. Kan fimkhur tâwk lohna leh hmasawnna chak tak duhna vangin kan chênna khawvel, kan enkawl tura Pathian min pêk hi kan dimdawih lovin kan ti bawrhbâng nasa hle mai. Chungte chuan sik leh sa mumal lo siam chhuakin khawvelah tuilian, kangmei, khawlum lutuk leh thlipuite nasa takin a siam chhuak a. Chumi-in a nghawng chhuah chu retheihna, tam, hri tha lo, thihna, helna leh buaina chi hrang hrangte a ni.

Heng chhiatna thleng theite pumpelhna tur emaw, chhiatna nasa zawk a thlen zel lohna tura lo inven lawkna dan te, kan tu leh kan fate chauh pawh ni lovin, puitling zawkte pawh kan inzirtir nasat a tul hle a ni. Heng ang chhiatna a lo thlen changte hian tanpuitu mamawh tak tak, keini aia dinhmun chhe zawk, an ni khat ei pawh harsa taka thawh chhuah ngai mi tam tak an awm thin. Heng mite tanpui thei tur hian kohhranhote thilpek hi a hlu-in a tangkai thin hle mai. Harsatna leh chhiatna an tawh hun lai taka kan theih ang tawk tanpuina kan pêk hian kan hmangaihna kan lan tir a, a dawngtu tan pawh nasa taka thlamuanna leh hlimna a thlen thei a ni.

He rawngbawlna pawimawh tak kan kova Pathianin a dah hi kan kohhran pawh hian a ngai pawimawh hle a. Tanpui theihna tur huang pawh zauh zelin BCM Charity Programme te a buatsaih belh a. Natna khirhkhan tuar, khawsak harsate leh piangsual tanpuina dante pawh a siam belh zel a ni. He rawngbawlnaa tel ve tur hian Naupang atanga upa ber thlengin tih theih kan nei vek a ni tih hriain, vawiina ringtu lo kal khawmte hian kan lo tih tawh thin aia nasain ke pen i tum zêl ang u.