Rev. F. Lalchungnunga thlah liam ta

BCM hruaitu pawimawh leh President lo ni tawh – Rev. F. Lalchungnunga(81) chu Lung na avânga Aizawl Civil Hospital ICU-a hun engemaw chen a awm hnuin nimin, December 11, 2017 (Thawhtanni) zîng dâr 8:20 khan Lalpa hnêna châwl tûrin a kal ta. Hemi ni vek chawhnu dar 01:00-ah an chenna in, Zonuma, Aizawl-ah amah thlahna programme neihpui a ni. Chawhnu dar 2:00-ah BCM Zonuam Biak Inah inkhawmpui leh a ni.

Luangmual Bialtu pastor Rev. L. Lalsawmliana’n Vuina Inkhawm kaihruaiin thlamuanna thuchah a sawi a, BCM aiawhin Rev. Dr. K. Lalrinthnga, Executive Secretary, Aizawl-in thu a sawi bawk. Zonuam Kohhran Zaipawl zai leh  chhungkaw aiawh thusawi ngaihthlak a ni a, Rev H Sangchema’n Chhungkaw tana tawngtaisakna a nei a, Rev. Lalbiaksanga Chinzah, BCM President elect-in Malsawmna-in Inkhawm a khar.

Mizoram Baptist Kohhran chuan Rev. F. Lalchungnunga thihna hi a sun takmeuh a, A sulhnu leh rawngbawlna te hian BCM chanchin-ah hmun pawimawh tak a awh reng dawn a ni. A kal san a chhungte leh a rawngbawlpui zawng zawng te Lalpa’n thlamuan zel rawh se.

……………..

Rev. F. Lalchungnunga Chanchin tlangpui

Rev. F. Lalchungnunga hi 27th August, 1936-ah Thingsai khuaah alo piang a. A pa chu Lalbuana, Thingsai Lal a ni a, a nu chu Lianchâmi Ralte Siakêng hnam a ni. Anmahni hi Fanai Pakhûp hnam an ni a, Kristian chhûngkua atanga seilian a ni. A pa hi Thingsai lal niin, hmanlai Middle English School Examination Passed a ni a, a nu pawh Middle passed a nih bâkah Missionary-te hnuaia Nurse zir puitling hmasa ber zînga mi a ni.

A naupan lai, kum 3 mi lek a nihin thia ngaih theih hial khawpin a dam lo va, kum 11 mi lek a la nih laiin thih ngamin a damlo leh a, a vawi thumna atân kum 30 mi vêl a nihin thi tûr khawpa ngaihin a dam lo leh a ni. Hêng ang thih teuhna khawpa a dam lo a lo dam leh ta mai hi Pathian tihdamna changtute zînga chhiar tel loh theih loh ni vein a inhria a ni.

Thingsai Primary School atangin kum 1947-ah Primary a passed a, Thingsai Middle School atang vekin MSLC a passed ve leh a ni. Lunglei High School-ah kum 1951-ah Class VII zawmin, kum 1954 thlengin a zir a, kum 1955 atangin Gov’t Mizo High School Aizâwl-ah zir lehin kum 1957-ah HSLC a zo va, hemi kum vek hian St. Anthony’s College, Shillong-ah I.A. a zawm nghâl a. Infiamna lamah a mi sa ve viau a, an khuaa lehkha a zirlai atang rêngin Tuichâng ral naupang hockey khel thiam berte zînga chhiar tel a ni tawh a. High School a kal chhun zawm hnu pawhin an School Team-ah a inkhêl thiam pâwl a ni zêl bawk. Gov’t High School Aizâwla a kal hnu phei chuan Mizoram Hockey Team-ah thlan niin Inter District Hockey Tournamnet of Assam (tûna North East India tih hi) Shillong-a February 1957 kuma awmah Mizoram aiawhin a kal nghê nghê a ni. Hetih hun lai vêk hian Assam (Tûna North East India hi) aiawha Bombay-a National Hockey Championship khêl tûra thlan a ni leh bawk. Kum 1958 June-ah Indian Air Force a zawm a, Air Force-ah pawh a awmna Command Team-ah hockey a khêl zui zêl a ni.

Indian Air Force-a a tanlai hian Delhi-a a awm laiin kum 1964-ah piantharna a chang ta hlauh mai a. Chuta tang chuan a rilruah Lalpa rawngbâwl a pawimawh zia hi a lang lian ta hle mai a. Indian Air Force-a a tan chhan hi “Pilot” nih a châk vâng a ni. Air Force atang hian Civil Flying Club a zawm a, Competitive exam a bei a a tling ve a. Mahse China râl a len tâk avâng khân a zir puitling ta lo va. Airman-ah kum 10 leh thla hnih zet a awm a, a bâng thei ta a. Kum 1965 March 3, khân Air Force-a a tan laiin nupuiah F. Hrangziki, anmahni khua a mi a nei a, ani hi Durtlâng Hospital-a Nurse zirzo, Thingsai Dispensary-a thawk lai mêk a ni. Thingsai Biak in-ah dân puiin Upa Nikunga’n a kutsuih. Kum 1968-ah Air Force atangin a bâng a, DST NEFA-ah sorkâr hna a hmu a, a han thawk leh rih a, mahse kum 1969 kum chanve hnuah a bânsan leh ta a, an khaw lamah a hâwng a, Pathian rawngbâwltu Team zawmin rawngbâwl hna a thawk zui ta zêl a ni. An khuaa rawngbâwla a awm lai hian mi thahnem ngai dangte nên, Assam Rifles-ho zîngah rawngbâwlna an neia sipai 6 vêl chuan Baptisma an chan phah nghe nghe a. Pathian rawngbâwla Zoram dung leh vanga a tei vêl laiin Pathian thu zir duhna a lo nei ta a, kum 1970 khân Assembly-in Pathian thu zir tûrin a la a. B.Th zirin Eastern Theological College, Jorhat-ah a kal leh ta a ni. Kum 1970 atangin kum 1974 thlengin ETC-ah chuan a awm a, heta a awm lai hian SCM, NEI-ah (Students Christian Movement of India, North East India-ah) President hna a chelh nghê nghê. Kum 1974-ah chuan Pro. Pastor atân lâk a ni a, a rawngbâwlna hmasa ber atân Chawngte bial-ah dah a ni. Kum 1980-ah B.D. external-in a zo leh a ni.

June 13.1976 kuma Special Assembly Mizoram Baptist Kohhranin Sêrkâwna a nghah tum khân Rev. K.T. Chungnunga’n a ordained ve ta a ni. Chutichuan Rev. F. Lalchungnunga chu hêng bialah te hian a lo thawk ve tawh a.

  1. Chawngte Bialah Pro. Pastor-in – 1974 June – September -1976
  2. Zobâwk Bialtu-ah – 1976 May – 1980 May
  3. Tlabung Bialtu-ah – 1980 May – 1983 May
  4. MTKP Secretary – 1983 May -1989 April
  5. Lunglei Chanmari Bial – 1989 April -1994 January
  6. Aizâwl South Bial – 1994 January -1995 April
  7. Executive Secretary, Aizâwl – 1995 April -1997 April
  8. President Elect leh Aizâwl ‘W’ Bial – 1997 April -1998 March
  9. BCM President -1998 March – 1999 March
  10. Aizâwl ‘N’ Bial – 1999 April atangin pension hnua rawih nawn leh pawh a zawh vek hnu, May 4, 2001 thlengin Pastorin Bâwngkâwn-ah a awm. May 4, 2001 ni hian a ma In, Zonuam, Aizâwl-ah a lût thla ta a ni.

Baptist Church of Mizoram aiawha hmun hrang hranga rawngbâwla a kal vêna te chu hêngah te hian a ni :

  1. Kum 1976-1977 December-January chhûngin Tripura, Assam, Meghalaya-ah te Missionary Zaipâwl te nên Speaker-in a kal
  2. MTKP Secretary a nih laiin, MTKP hruaitute leh zaipâwl te nên an vaiin member 25 lai hruaiin Nagaland District paruk lai a fanpui, March-April 1986 chhûngin
  3. BWA Youth Conference leh BWA Congress 1986 Singapore-a nghah a nih khân BCM thalai aiawhin MTKP Secretary a nihnain June 1986 thla chhûng a tel ve
  4. Third Asia Baptist Congress, Sydney, Australia-a January 1988 chhûnga an nghah tum khân thalai aiawhin MTKP Secretary a nihna bawkin a tel ve.
  5. Birpara Field tûr te, Bhutan rama phâr puala rawngbâwlna dap chhuakin chutih laia ZBM Secretary, Rev. H.S. Luaia kal chuan a hruai ve a, hemi rual hian CBCNEI Inkhâwmpui Jorhat-a awmah BCM aiawha palai atân rin nghâl ve ve an ni nghê nghê, hei hi 1975 January thla a ni.

Mizoram chhûngah, bial a neihna leh a bial pâwnah te pawh hmun hrang hrangah Camping, Crusade-ah te Speaker atân sawm fo a ni ve thîn. A rawngbâwlna nuam tih zâwng chu thlarau bo man leh mite’n Pathian thua harsatna an neihte hrilhfiah leh tanpui hi a ni ve fo thin a ni. A pension kum chu September, 1996 a ni a, kum 2001 thlengin pawhsei sak a ni. May 4, 2001 khân tûna an awmna Zonuam-ah hian an chhûngkuain an in sawn thla ta a, an lawina Kohhran a ni nghâl ta a. An fate, mipa pakhat leh hmeichhe pahnih te leh midang te nên an khawsa ta a ni. A pension hnu hian a awmna Kohhran, Bial, ABC leh Assembly thleng pawhin Lalpa leh a Kohhrante zârah a la inhmang ve thei zêl a. Hemi thu ziak lai (2007) hian Tualchhûng Kohhran Secretary te, Sunday School Supt-ah te an hmang a. Bial leh ABC-ah te Chairman hnate la chelh thinin, khawtlâng lamah pawh pawimawhna hrang hrang hêngahte hian a chelh ve a ni. MUP Unit President, MUP Area President, Vice President, HQ. MUP Executive Member, Corruption do, Sub-Committee member, Cultural Committee member, Golden Jubillee pêng Committee member, Village Education Committee member YMA, MHIP Adviser-te a lo ni thin bawk.

Posted in BCM News.