Rev.Dr.KT Chungnunga ropui taka thlahliam a ni

Mizoram Baptist Kohhran ban pawimawh berte zing ami, Rev. Dr.KT Chungnunga (93) chu June 5, 2019 (Nilaini) zan dar 7:30 khan a rawng a lo bawl sak thin, Lalpa hnenah thlamuang taka chawl hlen tawh turin min haw san ta. Amah thlahna hi June 6,2019 Chawhma dar 10:30-ah a chenna In, Ramzotlang-ah neih a nih hnu-in chhun dar 12:00 hian vui inkhawm Mother Church, Serkawn Biak In-ah neihpui leh a nih hnu-in Serkawn Thlanmualah ropui taka thlahliam a ni.

Biak In lama thlahna inkhawm hi Rev. V. Laltlanzuala, Bialtu Pastor, Serkawn Pastor Bial-in a kaihruai a, Rev. C. Chhuntluanga, Pastoral Coordinator-in BCM aiawhin a rawngbawlna chanchintawi a sawi a, General Secretary Rev. F. Ramdinmawia’n thuchah a sawi bawk. Anni bakah hian Upa C. Vanlalmuana’n, Ramzotlang Kohhran aiawh leh chhungkaw aiawh Rev. Dr. K. Lalrinthanga ten thu an sawi bawk.

Rev.Dr.KT Chungnunga thlahna Inkhawm

Vui Inklhawm-ah hian BCM Headquarters aiawh te, Serkawn Pastor Bial aiawh te, Ramzotlang Kohhran aiawh leh Serkawn Kohhran aiawh ten a kuangah pangpar an dah a, Upa J. Lawmsanga, Serkawn Kohhran leh Upa H. Hrangchhuana, Secretary, Ramzotlang Kohhran ten Pathianthu chhiarin Rev.Dr.CL Hminga’n Malsawm tawngtaina-in Vui Inkhawm a khar a ni.

Rev.Dr.KT Chungnunga thlahna Inkhawm

Mizoram Baptist Kohhran chuan Rev. Dr.KT Chungnunga thihna hi a sun takmeuh a, BCM History-ah a chanchin hian hmun pawimawh berte zing ami a awh reng tawh dawn a, Kohhran khaipa leh sulsutu pawimawh te zingah chhiar tel a ni reng tawh ang. A kal san a chhungte leh a rawngbawlpui zawng zawng te Lalpa’n thlamuan zel rawh se.

“Mizoram Baptist Kohhran tan hian Rev. Dr. KT Chungnunga hi ‘Kohhran Pa’ Pathianin min pe hi kan vannei em em a ni. Min lo kalsan ta mai hi BCM tan channa nasa tak a ni”. 

– Rev. F. Ramdinmawia, General Secretary, BCM

…………..

REV. DR. KT CHUNGNUNGA CHANCHIN TLANGPUI

(Src: BCM Pstor te Chanchin: 2012 Edition – By Rev. C. Ngurhnema : Publish by BCM Publication Board)

Rev.Dr.KT Chungnunga

Rev. Dr. K.T. Chungnunga,
Dip. L.Th; B.D; DD

Rev. Dr. K. T. Chungnunga hi Roruma Khiangte leh Sailianzîngi te fa pangana niin Lalluauva Bualpui khuaah October 1926-ah a piang a. Bualpui-ah hian School a awm lo va, 1933-ah Mission Primary School awmna Hmuntlângah an pem a. Chutah chuan school a kal tan. 1944-ah Serkâwn-ah Rev. Challiana’n baptisma a chantîr.

A lehkha zirnate:
1941 – Primary School , Hmuntlang.
1942-1944 – Middle School, Serkawn

Pathian Thu (Theology) zirna lam:
1947-1948 – Jubilee Bible School, Serkawn
1949-1951 – Diploma, Cherra Theological College.
1955-1957 – L.Th, Cherra Theological College
1961-1963 – B.D., Serampore Theo. College.
1971 – Dip. in B. R. E., Whitley Baptist College, Australia.

Rawngbawl hna a chelh tawhte:
1945-1947 – Mission Primary School Teacher.
1947-1949 – Jubilee Bible School, Serkawn
1949-1951 – Cherra Theological College
1951-1953 – Pro. Pastor, Thiltlang Bial.
1953 – Rev. Challiana’n a ordain
1955-1957 – Cherra Theological College.
1957-1960 – Bialtu Pastor, Lunglei Bial, JBS zirtirtu, Office Gen. Secretary
1961-1963 – Serampore Theological College.
1963-1965 – JBS Zirtirtu, TKP & SS Secretary
1966-1971 – Principal, Jubilee Bible School.
1971-1972 – Whitley Baptist College., Australia
1973-1980 – General Secretary (kum 5 term hnih)
1980-1988 – ZBM Secretary
1989-1993 – Zotlang (Lunglei) Bialtu Pastor.
1995 – Assembly Chairman
1996 – BCM President
1997-1998 – Kohhran Beng Editor
1998-2001 – ZPMBK Bialtu Pastor, Shillong

Mi mal nuna thil thleng pawimawhte:

1. Primary Scholarship a exam kum hian mi 152 zîngah 12-na a ni a, Mission scholarship a hmu. 1944-ah Middle exam-ah an pâwlah a ti tha ber.

2. 1954-ah Nl. Lalbiakthangi Pûkpui khua nen inneiin fapa 4 leh fanu pakhat an nei. Vanduai thlak takin a nupui hian 1979-ah cancer natnain a boral san.

3. January 3, 1983-ah GNM pass Nl. K.Vânchhûngi Missionary tang lai nen inneiin, Rev. H.S. Luaian a invawntîr a ni.

4. Cherra-a L.Th a zir laiin, 1956 kumah a nupui fanaute a dahna Pukpui khua chu a kang a, a nupui fanaute pawhin engmah an chuh hman lo va. A nupui leh a chhungte fuihna avangin, hawng chhuak lovin, a zirlai chu 1957 kumah zir zovin Second class-ah a passed.

5. Senate of Serampore chuan kohhran leh khawtlâng tâna a hna thawhte avângin February 9, 2008-ah chawimawina ropui tak, Doctor of Divinity (D.D) a pe.

Rawngbawlna kawnga thil thleng pawimawhte:

1. 1959-ah Rev. H.S. Luaia General Secretary chu Sapramah zin rei tura a kal avangin Rev. K.T. Chungnunga hian a ai a lo awh a, Bialtu hna leh General Secretary hna chu a kawp.

2. 1959 Assembly-in a rel angin 1960 Assembly-a pawm hman tûrin 1959 chhungin BCM Constitution siam tur a ni. A thawhpui tura ruatte nen theihtâwp chhuahin an thawk a. Rev. Khuanga chu Lunglei-ah Court Officer-a a awm lai a ni a, ama hovin Constitution chu siamin pawm mai theih tûrin an chhu thlap a, 1960 Assembly chuan lâwm takin a pawm a, hman nghâl a ni. Hei hi Baptist Church of Mizoram-in Constitution a siam hmasak ber a ni. Assembly zawh atang chuan Rev. H.S. Luaia hnênah General Secretary hna chu hlân kîr leh a ni.

3. 1963-ah Sêrkâwn-ah J.B. School zirtîrtu, Sunday Sikul leh Thalai Kristian Pâwl Secretary hnate a thawk kawp.

4. 1966 March thlaah Mizoram a buai tak avangin Thalai lehkha thiam tam tak leh mi dang tam tak ramhnuaiah an awm ta thup mai a. Sorkâr pawhin India sorkâr laka hela ruatin na takin kut a thlak ta a. Khawsakphung a buai zo vek a, BCM chuan Peace Mission a din ta ngawt mai a. Rev. H.S. Luaia te, Rev. C.L. Hminga leh Rev. KT. Chungnunga te chu member atan ruat an ni. Sorkâr hna thawk leh mipui Lunglei khawpui chhuahsan a mahni sahimna zawnga kal darhte Lungleia hruai lût leh tûra thawh chu an hna hmasa a ni ber a. Chutianga kal vêlna atân Jeep pakhat pêk an ni a, ‘Peace Mission’ tih inziakna puan varin an khuhtîr a, a tulna hmun apianga kalin sorkâr hnathawkte leh mipuite chu ‘Lunglei-ah a haw leh theih tawh e’ tia hrilhtu ber an ni. Mipui pawisawi lote chunga hlei hluak taka thil ti lo tûrin Peace Committee member-te hian India sipai leh MNF sipaite chu an thlêm tawn reng bawk a ni.

5. 1967-ah Australian Missionary-te hawsan tûr Debitola hmuna Raba-ho chuan anmahni enkawl tûrin BCM an rawn sâwm a. Tute nge an nih a, Debitola pawh chu khawi laia awm nge tih pawh an hre lova, zawng chhuak turin amah leh Upa R.T. Bawia chu tirh an ni. Thil awmdân hriat chian hnuah chuan Missionary intirh ve tum a ni ta a. Rev. Rokhama leh a nupui Pi F. Lalrochâmi chu 1968-ah Debitola-ah chuan Rabha hnam zinga Missionary ni tûrin tirh an ni ta a, an ni hi Mizoram pâwna BCM-in Missionary a tirh chhuah hmasak berte an ni.

6. Australian Baptist Mission sâwmnain 1971-ah Australia ramah a zin a. Dip. in B. R. E. zir tûrin Whitley Baptist College-ah seat an lo hmuhsak a. Deputation-a zir a nih loh vangin hlawh a nei lo va. An harsat avângin a nupui pawhin awm rei lova haw hma tûrin a duh deuh va. A zirlai pawh chu zir zo hman lovin a haw leh ta a. Australia ram hi BCM hruaitute la tlawh ngai loh ram a ni a. Rev. K.T. Chungnunga zin hnu lamah chuan Kohhranin nasa takin kan chhawr a ni. Dr. C. Silvara te, Dr. Lallâwma te, Dr. Lalsângliani te leh Rev. Dr. K. Thanzauva te va zin vêna kawng inhawnna bul a ni. Tin, Sêrkâwn Hospital pawhin thilpêk ropui tak tak a dawn phah a. China ram lamah pawh Australia ho avângin kan thalaiten rawngbâwlna an neih theih phah a ni.

7. 1973-1975 chhungin Mizo thalai tam tak rambuai tlansana Shillong-a kal khâwmte chu pawl thu sawi lovin Shillong Mizo Biak inah hlim takin an lawi tlang a. Presbyterian an tam ber avângin 1973 vêlah chuan an zingah Presbyterian Kohhrana siam duhna chak tak a lo chhuak ta a. ‘Zoram pâwn Mizo Kristiante hian tu kohhran enkawl nge an duh thlang sela, hetianga Kohhran intâwm anga an awm hi a tha lo ve’ tiin Khâwmpui rorêlna lamah chuan thu a lut ta a. Dan zawh rual a ni ta lova, Presbyterian Kohhran ta bîk ang maiin a kal ta a. Mizo Biak in pawh an ta bîk angin an chuh hauh tak zêl avangin Baptist leh pâwl dangte tân chuan a hrana inkhâwm ve loh theih a ni ta lo va. Biak in chu nei bîk thei an nih loh dân sawi chhuah ve loh theih lohvin thil a awm ta a, tûn thlengin Court case neiin a la awm ta reng a. Mahni chauhvin hmachhawn lo mahse, a mawh phurtu tak dinhmuna ding tân chuan a rit hle ang.

8. 1975 Assembly-ah General Secretary atan thlan a ni leh ta a. Hetih hun chhûng hian BWA leh ABF zawmin member kan lo ni ta ve ve a. Amah hi 14th Congress of Baptist World Alliance, Toronto, Canada-ah BCM palai hmasa berah a tang ta a ni.

9. 1980-ah ZBM (Mission) Secretary atân thlan a ni a, he hna hi 1988 Assembly thlengin a thawk. Hetih lai hian ZBM sum chu a hranpain enkawl a ni a, Mission lamah mipui an phur hle a, BCM thawhlâwm hmuh zawng zawng zâtve aia tam ZBM in a dawn kum pawh a awm a ni. 1985 atang chuan ZBM sum chu a hranpaa lakhawma enkawl lovin BCM chhunga thawhlawm zawng zawng chu hmun khatah chhung khâwm vekin, ZBM pawh chuan Assembly zêmpui a zen ve ta zâwk a ni. Hei hi Mission lam harsatna avang ni lovin Assembly duh dân a nih vâng a ni.

10. 1989-1993 chhungin Zotlângah Bialtu Pastor a ni a, hetih chhunga Bial hmalâkna ropui tak pakhat chu Carey English Medium School din a ni. He School hi BCM Compound chhûnga awm ve tura duh a nih laiin Committee-in remchang lova an hriat avangin Zotlâng khaw chhûnga dah a ni ta.

11. 1995-ah Assembly Chairman a ni a, Planning thar ruahman pawm kum a ni a, Kohhran hruaitu ber pawh President a nih tawh dawn avangin inthlan that a ngai ta a. Inthlanna neih a ni a, Rev. Dr. C.L. Hminga chu President atân thlan a ni a, Rev.K.T. Chungnunga chu President Elect atân thlan a ni. Assembly floor lamin charge inhlan nghal mai chu thaa an hriat loh avangin, rorêl tâwp lamah Rev. Dr. C.L. Hminga hnênah President nihna chu hlan a ni ta a. President Elect hna chu a thawk zui leh ta a, 1996-ah chuan President nihna chu a chelh ve leh ta a ni. 1997-ah Kohhran Beng Editor hna full time-in a thawk.

12. 1998 April-ah a châwl a. Pastor indaih lohna avangin ZPMBK Bialtu pastor atan tlawmngai tura sawm a ni leh a. Hnial chiah ngai lovin, a nupui dam lo thla engemaw zat mu reng chu kalsanin July 1998-ah a zawm a. Rei lo deuh awm tura a inngaih laiin kum 3 zet a zu awm a. Baptist House a sak zawhpui a. Pastor Quarters Bialtu Pastor leh Pi Lalpari Mithran sak tûra tih chu Pi Pari chuan nasa taka inseng sovin chak takin hma a lâkpui a, an sa zo. Pastor K.T. Chungnunga ngei pawhin a luah hman a. Kum 3 chiah an awm hnuah Rev. Rokhaman a rawn thlâk a. 1987-a pension-a kal tur chu 2001 August thla atangin a chawl ve thei ta a ni. Serkawnah in leh lo neiin a awm.

BCM pawn lama Rawngbawlna a chelh tawhte:
1. Council of Baptist Churches of Northern India (CBCNI) Vice President leh President

2. North East India Baptist Fellowship (NEIBF) Vice President leh President.

3. 1980 kuma BWA Khâwmpui 14-na a hman tumin London-ah chawlhkar thum a châm a. Feed the Mind Office a zawng chhuak a, rambuai avanga Press leh Bookroom tlâk chhiatzia hre rengin tanpuina a dil a. An hotupa Rev. Gilmore (Baptist Minister) chuan pêk a lo tiam a. Kum hnih hnuah Rs 70,000/- lai a rawn pe a, Press and Bookroom-in intun din nân an hmang ta a ni.

4. North East India Committee On Relief and Development (NEICORD) 1980 a dintute zingah telin, member a ni nghal.

5. NEICORD din tum hian Tear Fund Hotunu Miss Jeniffer hnênah ZBM hman atân Jeep thar a dîl a, pêk a ni.

6. Baptist Union of India (BUI)-ah 1984- 87 chhung President a ni.

7. 1990-1994 ah Serampore College Council member a ni. Hei hi kan la chan ngai loh thil a ni.

Rev. Dr. K.T. Chungnunga chuan, “ Heng chanvo leh dinhmun ka luah zawng zawngte hi ka fel vang leh tlin vâng a ni lova, ka phu loh vek an ni. Pathian thatna leh BCM hming thatna zâr ka zova, tling lo tak chungin ka lo luah hmasa ve mai a ni” a ti.

Posted in BCM News.

admin