Rev.Dr. Rodinmawia Ralte-in Senate of Serampore College (University)-ah hna thar a zawm

Rev Dr. Rodinmawia chuan Senate of Serampore College (University)-a Branch pakhat, SCEPTRE (Senate Centre for Extension and Pastoral Theological Research) -a a khaipa ber ‘Dean’ ni turin Rev.Dr. Rodinmawia Ralte chuan June 10, 2020 khan a hna thar a zawm fel ta. He hna hi kum thum term a ni a, BCM pastor zingah he hna chelh hmasa ber a ni.

Rev Dr. Rodinmawia

Senate of Serampore College University hnuaiah hian Pathian thu zirna hi thuang hnihin kalpui a ni a. Pakhat zawk chu kan hriat lar sa, BD, M.Th. DTh. etc zirna hi a ni a. A dang leh chu SCEPTRE hnuaiah Diploma in Christian Studies (Dip.CS) te, BCS (Bachelor in Christian Studies) te leh MCS (Master of Christian Studies) te a awm a. SCEPTRE hnuai heng zirna te hi Dean hian enkawlin a mawhphurtu ber a ni. 

Pastor Posting thenkhat kumin chhung atan siamrem a ni

Rev. Rodinmawia chhuahsan Hnahthial Bazar Bial-ah hian Rev. V. Lalzarliana a awm ve thung dawn a ni. Hetihlai hian Pastoral Committee-in thuneihna a pek angin, Mizoram Baptist Kohhran, Administrative Committee chuan Pastor Post a la kal thei lo Rev. HS Lalramnghaka, Odhisa Field-a awm tura tih chu  Covid-19 avangin Field thar hawn a la theih rih loh a, chuvangin tuna a awmna Bial, Phawngpui North Bial-ah kum 2020 chhung atan awm rih tura tih a ni a. Tin, Rev. FP Lalnunrema, M.Th zir zo lo chhuak, Phawngpui North Biala awm tura tih pawh hetianga Posting in tawk buai lai a awm tak avang hian kumin chhung atan Headquarters Office, Administrative Department ah awm rih tura tih a ni bawk.