Rev. Dr. V. Laldingliana

Rev Dr V Laldingliana

Rev.V.Laldingliana hi April 16, 1952-ah Mêlthum, Aizâwl-ah a piang a. A pa chu Pu Saihlîra Vanchhawng a ni a, a nu chu Pi Sângluaii Sailo, (Hmâwngkâwn lal tunu) a ni. Pianpui unau 10 a nei a, an upa berin 1959 khân a boralsan. Ani hi feet 5. 5”-a sâng a ni. Pastor Liangkhaian baptisma a chantîr. A pa hi Mizo zînga Serampore, Culcutta a\anga B.A. pass hmasa te zînga mi a ni. 1953 kum khân an chhûngkuain sawrkar hna avangin NEFA-ah an pem.

A naupan lai hun chu Arunachal Pradesh hmun hrang hrangah a hmang a, zirna lama NEFA ram dinhmun a la hniam avangin amah pawhin school a kal har phah hle a ni. A pa zirtîrna hnuaiah tûnlaia KG level chu in lamah a zova. Lower Primary School chu Assam Rifle School, Pasighat-ah te, Tezu leh Doimukh Govt. School-ah te a zir a. Middle School chu American Baptist hovin an din-John Firth English School, North Lakhimpur, Assam atangin a pass a. High School chu Don Bosco School, Dibrugharh atangin a pass a,1977-ah St.Edmund’s Collage, Shillong atangin B.A. (Hons) a zo.

April 17, 1987-ah Nl.Lalroziki Hnamte d/o Dr.H.L.Malsâwma, Aizawl nên an innei a, BCM Ramhlun North-Biak Inah Rev.H.Sangcheman a inneihtîr a. He kohhrana innei hmasa bera record an ni nghe nghe. Fapa 2 leh fanu 1 an nei.

A pianthar dân leh Rawngbâwl tûra kohna:
A naupan laia a nu leh paten nitina chhûngkaw tawngtaina an lo neihpui thinna te chuan a thlarau nun a kaihhruai nasa hle a. Thuhriltu hmingthang tak Dr. Sam Kamaleson leh Rev.Augustin Salina ten Shillong khawpuia rawngbâwlna an neih tumin 1973, April 1st-ah piantharna a lo chang ta a. Hemi tuma amah counsel-tu chu Rev.Vânlalnghâka a ni.

Fulltime Ministry-a a luh hmaa a rawngbâwlnate:
A pianthar hnu lawk atangin rawngbâwlna hrang hrangah chanvo a nei thîn a, chûngte chu-
1. Shillong Inter-Collegiate Evangelical Union-ah President leh Secretary.
2. Youth Fellowship (Y.F)-ah President leh Secretary
3. ZPMBK Shillong-ah S.S. Intermediate zirtîrtu.
4. ZPMBK Shillong-ah Rawngbâwltu.

Full time-a rawngbâwl tûra koh a nihna hrechiang tûrin hun eng emaw chen chu “Pathian aw” a ngaihchâng a. Hetih lai hian hun rei lo te chu NEHU Library-ah hna a thawk. Missionary hmingthang- Adoniram Judson, Hudson Taylor, William Carey etc te biography a chhiar ten a rilru an hneh thîn hle. A châk ber chu Missionary niha Chanchin Tha la hre lo te hnênah rawngbâwl a ni. 1979 kum khân Lalpan full time-a rawngbâwl tûra a kohna chu chhângin BCM-ah Pathian thu zir a dîl ta a, lâk a ni.

Theology zirna leh Rawngbâwlna:
1980-1983 – B.D., UBS, Yavatmal .
1983-1986 – Pro. Pastor, Pângzâwl Bial
1986 – Chanmari Assembly-ah Rev. Dr. C.L. Hmingan minister atân a ordain.
1986-1991 – Tawipui Pastor Bial, Tawipui.
1991-2007 – Mission Field Director, A.P. East.
2008-2010 – Aizâwl East Bial, Chanmari, Aizâwl.
2011 – 2013 – Mission Field Director, North-India. Delhi.
2013-2016 – Executive Secretary, Aizawl Area
2016-2017 – Aizawl East Pastor Bial
May 1, 2017-ah Suppernnuation Pesnsion-in a chhuak
2020-2021 – President Elect
2021-2022 – President

Arunachal Pradesh Mission Field-a a awmlai atangin Kohhran phalnain D. Min (Senate) external-in a zir a. Kum eng emaw zat a beih hnuah hlawh-tlingin 2012-a Dehradun Senate Convocation chuan Doctor of Ministry Degree a pe a ni.

Rev. Dr. V. Laldingliana hi a naupan lai atanga infiam mi a ni a, Pro.Pastor a thawh tirh thlengin Foot ball a la khêl a ni. A school kal laiin an school football team captain-ah 1970-71-ah thlan a ni a. An school hian a hovin 1970 kuma All Assam School Football champion shield chu an la a ni. Tin, hemi kum vêk hian Assam School player zîngah thlan niin, Gandhinagar, Maharastra hmuna All India School Tournament-ah India ramah 3rd position niin Bronze medal an la. B.D. a zir laiin an Collage-a Football captain a nih kum 1982-ah Maharastra Police team chu hnehin Trophy an la nghe nghe a ni.

Mi nun nêm, mi pawi sawi hlau tak, Pathian Thu sawi thiam tak, English leh Assamese tawng thiam tak a ni a, hnam dang zînga rawngbawlna atân a tangkai hle.