Rev. H. Lianngaia, Former BCM Pre. & GS
Mizoram Baptist Kohhran-a Pastor hna leh BCM hruaitu hlun, mawhphurhna lian tak tak lo la tawh Rev. H. Lianngaia chu vawiin, August 1, 2018 atang hian full Pension-in a chhuak ve ta. Vawiin, Pension-a a chhuah ni hian BCM Headquarters Office, Serkawn-ah Morning Devotions hmanpuiin Office-a a thawhpui thin te leh, a rawngbawlpui pastorte leh BCM hruaitute, Mizoram puma Kohhran ho zawng zawng chibai bukna thu a sawi..
Kum 38 chhung zet BCM hnuaia rawngbawlna hna hrang hrang a chelh thei chu Pathian hruaina leh Kohhran hote tawngtaipuina vang a ni tih sawiin, pension-a a chhuah hnu-ah pawh rawngbawlna kawng a kova lum chu Pathian chakna rinchhana hlen chhuah zel a tum thu a sawi.
A sawi zelnaah chuan, “Hetia Pension-a ka chhuah dawn takah chuan, engtia awmzui zel tur nge tih ka ngaihtuah a. Pathian rawngbawlnaah hian retire (chawlh) a rem lo va, Holiday a awm chuang lo va, ka phak tawk leh tlin tawka Pathian kohna chhang zel turin commitment ka siam ta a ni, ka Service-ah rawngbawl tura ka lut ang bawk khan, ka service a lo tawp ni atang hian Pathian rawngbawl tur bawkin ka inpe thar leh a ni”, a ti a, he testimony a neihna hla chu “Krista hmangaihtuten, Lungawina leh muanna chu an chang, Rinna-in an kal zel, ram te an la, kir an rel lo; keipawh rinnaa ding a, ral do thei turin, thlarauvin min hruai zel ang che”, tih a nih thu a tarlang bawk.
Rev.H.Lianngai hian Mizoram Baptist Kohhran hnuaia a thawh chhungin mawhphurhna lian tak tak – BCM President, BCM President Elect, General Secretary – term thum, Associate General Secretary te bakah Kohhran Beng editor, Communication Director, Executive Secretary (Aizawl & Lawngtlai) te a lo chelh tawh a ni.
A chanchin tlangpui:
Rev.H.Lianngia, Former BCM President & GS
Rev.H. Lianngaia hi Hauchhum hnam a ni a, a pa chu H. Thangkima a ni a, a nu chu P. Dengbuaii a ni. Kum 1953 July ni 12-ah khân Pângzâwl khuaah a lo piang a, ft 5’, 8”-a sâng a ni. An unau hi mipa 3 leh hmeichhe 3 an vaiin 6 an ni a. Kum 1968 November thlaah Pângzâwl Baptisma a chang a, Kum 1978 July ni 10 niin Nl. R. Lalsiami nên Pângzâwl BCM Biak inah an innei a, Rev.B. Thangseia’n a vawntîr a, fapa 1 leh fanu 2 an nei.
Kum 1975 khân October thlaah Pângzâwl Pastor Bial |KP ten Camping an buatsaih a October ni 24 zâna Pathian hnêna a inhlanna chu piantharna bâkah dam chhûnga Pathian rawngbâwl tûrin a thinlungah a nung ta reng a ni. Tichuan H.S.L.C. a pass veleh 1975 kum khân Pathian thuzir a dîl ta a. Tualchhûng Kohhran te Pastor Bial te ABC-ah te a dîlna chu a kal chho zêl a, Assembly pawh chuan duhsak takin a dîlna chu a hlawhtlin tîr ta a ni. Hetiangin Pathian thu a zir.
(1) B.Th. – E.T.C (Eastern Theological College) Jorhat-ah 1976-1980. An Batch-ah a ti tha ber a ni a, ti tha ber lâwmman (General Proficiency Prize) a dawng nghê nghê.
(2) B.D. – U.B. S. (Union Biblical Seminary) Pune-ah 1988-1989. Kum 8 zet Pastor Bial neia a thawh hnuin a zir ve leh a, kum khatah B.D a zir zo thei a ni. Pathian thu zirnaah a kal tluang hle.
>B.Th a zir zawh veleh 1980 atangin BCM chuan Pro. Pastor-ah lain a ruai nghâl a, 1984 khian Lunglâwna BCM Assembly-ah chutih laia General Secretary Rev. Dr. C.L. Hminga’n Minister-ah a nemnghet (Ordained) ta a ni. Pastor a nih chhûnga a awmna bial leh hna hrang hrang a vawnte chu hetiang hi a ni.
- Probationary Pastor-a lâk ni 18.05.1980
- Pro.Pastor – Paithar Bial – 1980-1981
- Pro.Pastor – Vaseitlâng Bial – 1981-1984
- Ordination Lunglâwnah – 12.3.1984
- Bialtu Pastor – Phâwngpui Bial – 1984-1988
- Bialtu Pastor -Kawrthah Bial-ah – 1989-1992
- Bialtu Pastor -Aizâwl ‘N’ Bial – 1992-1995
- Revival & Evangelism Pastor (Bial bîk nei lo) – 1985
- Executive Secretary – Lawngtlai Area – 1995-1998
- Communication Secretary (Hqrs. Office) – 1998-2001
- Kohhran Beng Editor – 1999-2000
- Associate General Secretary– Sercvice– 2001-2004
- General Secretary – 2004-2007
- Executive Secretary – Aizâwl Area –2007-2010
- General Secretary –2010-2013
- General Secretary –2013 – 2016
- President Elect – 2016- 2017 & Bazar Pastor Bial
- President – 2017-2018
- 2018 (April) – July 30, 2018 (pension thleng) : Lecturer, JBS