Rev. K. Lalchhuangliana Ropuina ramah a haw ta.

Mizoram Baptist Kohhran Pastor pensioner, Rev. K. Lalchuangliana (82) chu May 13, 2021(Ningani) zing dar 7:10 khan a rawng a lo bawl sak thin, Lalpa hnenah thlamuang taka chawl hlen tawh turin min haw san ta.

Rev.Lalchhuangliana hian a pum lam a sawisel avangin May 10, 2021(thawhtanni) khan Faith Hospital, Lunglei-ah admit a ni a. Investigation atangin a lung leh prostrate vung chu hmuh ani nain Doctor in Heart attack intanna niin a sawi thung a. May 12 (Nilaini) tlailam khan a thaw a rawn hah ta a. Oxygen-te pe in zan dar 8:00 velah Christian Hospital, Serkawn ah phurh chhoh a ni a. May ni 13 zing dar 7:00 ah Heart attack a rawn neih nawn leh chu zo ta lovin 7:05 am khan a rawng a lo bawl thin  a Lalpa hnenah thlamuang takin a chawl ta a ni.

Rev. K. Lalchhuangliana thlahna inkhawm hi hemi ni vek, Chawhma dar 11:30-ah Mizoram Baptist Kohhran Biak In, Chanmari, Lunglei ah neih a ni a. Vui inkhawm hi Rev. Dr. K. Sapthanga’n kaihruaiin Rev. R. Zohmingliana, Bialtu Pastor, Chanmari Pastor Bial-in vuiin, thuchah a sawi a, Upa Rosangliana, Chanmari-in Pathianthu chhiarin, Rev. F. Ramdinmawia, General Secretary-in BCM aiawhin a chanchin leh tuarpuina thu sawiin, Chamari  Kohhran aiawh leh chhungkaw aiawh ten thu an sawi bawk. Biak In lama vuina inkhawm hman zawh a nih hnu hian, Chanmary thlanmual ah Pro.Pastor, Lalmuanpuia’n tawngtaina-in a thlahliam ta a ni. Rev. Lalchhuangliana hian a nupui Pi Lianthangpuii, a fate pathum leh a tute a kalsan a ni.

Mizoram Baptist Kohhran chuan, Kohhran kut-ke tangkai leh rawngbawlna ngaipawimawh tlat mi,  mi inngaitlawm leh zawldawh em em, Pastor K. Lalchhuangliana hi a uiin a sun takzet a. BCM chanchin-ah a hming hi lam tel a ni reng tawh dawn a ni. A kal san a chhungte leh a rawngbawlpui zawng zawng te Lalpa’n thlamuanin awmpui zel rawh se.

……………………..

Rev. K. Lalchhuangliana Chanchin tlangpui

Rev K. Lalchhuangliana hi Kristian chhûngkua atangin September ni 30,1940-ah Liankhuma leh Dârrohnûni te fa hmasa ber niin Kawrthah-ah a  piang a. June 12,  1964-ah Lianthangpuii nen an innei a. Fapa pakhat leh fanu pahnih an nei.

Matric thlengin Kawrthah-ah a zir a, Mamit Private M.E. School, Kawrthah Jr. High School leh Mamit Private High School-ah te zirtirtu hna a thawk tawh a, Suarhliap M.E. School-ah Headmaster hna a thawk tawh bawk. Mamit Project Office-ah 1964 atanga 1968 thlengin LDC hna a thawk a. Kum 1961-ah piantharna changin, hemi atanga kum 7-naah Pathian thu zira, fulltime-a Pathian rawn bawl turin rilru a siam fel a. Sorkar hna a vawn lai te chu bansanin an in leh lo leh thildang hralh theih chi zawng zawng hralhin Bangalore-ah 1968 May thla-ah an chhûngin an kal ta a ni. Berean Baptist Bible College, Bangalore-ah kum 1968 – 1971 chhung khan  G.Th a zir a, a nupui pawhin Child Study Subject la in a zir ve nghal bawk.

Kum 1971-ah Mizoram-ah lo chhuakin Kawrthah tlângdungah Baptist Kohhran a din a. Hlawh lovin a thawk a, a hlawh neih hmasak ber chu thlakhatah Rs 50 a ni. Kohhran hmingah New Testament Baptist Church an vuah a. American Baptist Mid-Mission nên an thawk ho va. 1972-ah Rev. P.M. Malakaran a ordain a. Hemi kum hian Zâwlnuam-ah an nupa-in Baptist English School an din a, tun thlengin Baptist English School, Zawlnuam tih hming pui-in BCM Education Department-in a la enkawl chhunzawm ta zel a ni.

Pastor a nih hnuah Baptist Bible College Silchar-ah BRE a zo ve leh a. Tin, M.A.B.S. (Master of Arts in Biblical Studies) Northwest Baptist Seminary, Tacoma, USA atangin MABS degree a hmu ve leh bawk.

Kum 1985-ah BCM hruaitute nên inbe remin Kohhran 10 member 800 vêl nên February 1986-ah Rev. Hrangena, General Secretary-in an nihna te pawmin BCM-ah a lâwmlût a. Hemi kum hi  Fundamental Fellowship of Baptist Churches, India a Vice Chairman kum thum term a zawh kum tak a ni.

1986-a BCM-a a luh atangin a pastor nihna chhawmin Bial hrang hrang a enkawl a. Kum 2000-ah Pension-in hemi atang hian rawih nawn (re-employ) a nih hnu-ah 2009 ah full retirement-in a chhuak ve ta a ni.

Rev. K. Lalchhuangliana hian Zephania bu hrilhfiahna a siam a, Tualchhung Kohhran leh Bial-ah rawngbawlna chanvo hrang hrang a chelh tawh a, Assembly hnuaia Committee hrang hrangah member a lo ni tawh bawk.