Rev. Sialngêna kan then ta:

Rev. Sialngena leh a nupui Pi R.Liantluangi

Mizoram Baptist Kohhran Pastor hmasate zinga min la dampui tu tlemte zingah Rev. Sialngena chuan October 12, 2018 zing dar 8:45 khan A rawng a lo bawl thin Lalpa hnenah min haw san ta. Zanah tlaivarpui niin a tuk October 13, 2018 chhun dar 12:00 khan Lungsen-ah ropui taka vuiliam a ni. 

Rev. Sialngêna chanchin tlangpui

Rev. Sialngêna hi October 21,1929-ah Bêlkhai khuaah a piang a  ft 5. 4”-a sâng a ni a, Punte hnam a ni. A pa chu Chawngdinga a ni a, a nu chu Lairochawngi Tochhawng a ni. A pa hi pasaltha, sa kâp thei tak a ni a, chutih laia an lal Sângkhûma chuan Tumpâng lu hi a it êm êm mai a, kâp tûrin pasaltha Chawngdinga chu a duh a, Sialngêna a lo pian hian chumi chawi chuan a hming hi an sa a ni. An unau hi mipa 1 leh hmeichhe 2 an ni.

A pa-in a naupan laiin a thihsan a, a farnute pahnih nên a nu hovin an awm ta a. October 1,1945-ah Bêlkhai-ah Rev. F. Aihrângan Baptisma a chantîr.  R.Liantluangi, Rev. Rokûnga fanu nên Nov.13.1953-ah Buarpui Biak inah an innei a, Upa Thansei-an a invawntîr. Fapa 1 (adopted son) leh fanu 5 an nei. Amah hi a tlangvâl lai atanga Kohhran bêl tlat thîn a ni a, kum 18 mi chauh a nih laiin an Kohhran Upaten rawngbâwltu atan an ît a, an la ta a ni.

Lehkha lamah a zir sang lo. Kum 7 mi chauh a nihin a pain a thihsan a, an awmna Bêlkhai khuaah Primary School-ah 1942 kumah Class III a pass a. Chutih laiin an awmna khua atanga Middle School hnai ber chu Serkâwn a ni a, hmeithai fate tân zir chhunzawm ngaihna a awm lo a ni. Rualawt takin zirna lam chu a tâwpsan ta a, a tlangvâl thlengin a nu ho chuan thlawhhma neih chu an eizawnna a ni ta a.

Kum 1947 khân an khuaah harhna a thleng a, chu harhna chu sual inhriat harhna a ni. Chu chuan a nun a hnehin a tidanglam nasa êm êm mai a. Chanchin Tha hril chu a vei nasa ta hle a. An khaw bul Bru leh Chakma te chu tlawhin Pathian thu a hrilh thîn a, ram thim veina chu a nei lian ta hle mai a ni.

Kum 1949-ah Bru leh Chakma tirhkohah a inpe a, November 1, 1949-ah an la a, tirhkoh hna chu a zawm ve ta a. Lehkha thiam si lo, Pathian thu zir bawk si lova tirhkoh nih chu hrehawm a ti a. Kum 1950-ah Jubilee Bible School-ah Rev. R. F. Tucker-a hnuaiah thla 6 chhûng a zir ve leh ta rih a. Tirhkoh hna hi kum 17 (1949-1966) lai a thawk a, June 19, 1966-ah Sêrkâwn Biak inah Rev. Challiana’n   minister-atan a ordain.

Tirhkoh leh Pastor hna a thawh chhûnga a awmna bialte:

1947-1949     –    Tualchhûnga Rawngbâwltu

1949-1950     –    Tipperaghat-ah (Chakma an ni)

1951-1952     –    Matisora (Chakma)

1953-1959     –    Kânghmun ‘W’ (Bawm hnam)

1959-1962     –    Tlabung

1963-1966     –    Thingsen (Bru hnam)

1966-1968     –    Rotlâng ‘W’ (Bru hnam)

1966 – Minister atan nemngheh a ni

1967-1977     –    Lungsen Bial thar form-tu a ni

1972-1976     –    Parva Bial thar form-tu a ni

1977              –    Chawngte. Thla 6 chauh a awm

1966-1980     –    Bûnghmun Bial thar form-tu a ni

1980-1988     –    Lungsen (A pension thleng)

1991-1992     –    Tlabung (Re-employ a ni)

Rev. Sialngêna hi Bru leh Chakma te hnêna Chanchin |ha hriltu hmasate zînga mi a ni a. Khaw kâr kawng pawh awm mang lo, lui dung leh  kawng tum chhe tak tak, inkal pawh theih chang changnaah Pathian thu hril tûra zin zin thîn a ni. A thawhna rama mite hi in tlêm tê têin an awm a, an insawn zung zung bawk thîn a. Chutiang ram pilril leh hrehawmah chuan hun rei tak a thawk a. Kum 1966-ah Mizoram a lo buai ta a, mi tam tak ramhnuaiah an awm a, zin vêl a harsa a. Thawktu indaih lohna a nasa zual a. Kohhranin Bru-Chakma tirhkohte hi nemnghet ila, Mizo khua te pawh bial ve se tiin an rêl ta a. Kum 1966 atang chuan Mizo khuate pawh a bial ta a ni.

Pastor hna bâkah Bial Chairman-ah vawi 14, heng kumahte hian a tang tawh-1959, 1962, 1965, 1967, 1971, 1972, 1975, 1983, 1985, 1988, 1994, 1999, 2000, 2001. (ABC Chairman Elect-ah vawi 9 thlan a ni a, a Chairman dawn kumin vawi 3 chu transfer a ni a, vawi 6 chauh ABC Chairman-ah a tang a ni.

Khawtlâng thila a inhmanna:

  1. Side Allotment Advisory Board (SAAB).  Sorkâr-in term 3 promiment citizen member atan a ruat.
  2. Village Development Committee (V.D.C)  term 1 member a ni.
  3. Consummer Committee-ah term 2 member a ni a, Treasurer-ah a tang.
  4. Private H/S dinnaah Board member term 3 a chelh
  5. Private M/S II din laiin Board member a ni.
  6. Baptist Centenary English School, Mahanaim Kohhranin an din tirh 2003 atanga 2007 thlengin Managing Board Chairman a la ni.

Amah hi mi nunnêm mi pawisawi lo a ni a. A kut a themthiam a mistiri hna pawh a thiam. Pathian malsâwmna dawngin Lungsen-ah in leh lo ngelnghet tak a nei a. A thawhna ram mite a hmangaih hle a. Middle School leh High School thlengin naupang pakua a enkawl hetiangin :-

Bru        –    hmeichhia leh mipa     –     3

Bawm   –    hmeichhia                    –     1

Pang      –    hmeichhia                    –     1

Mizo     –    hmeichhia                    –     4

A enkawlte hi an vaiin hlawhtling vek lo mahse a then hi chu hlawhtling  tih theih ve mai tur chuan  an khawsa.  Rev.  Sialngêna hian Chakma te Bru te leh hnam chekhnawk zîngah Pathian rawng a bâwl a, Kristianah mi tam tak a siam a ni. Rawngbâwlna kawng hrang hrangah  Mission lam leh Kristian nun thanlenna lam hi a tuina a ni a. Kawng hrang hrangah phu loh malsâwmna dawngin a inhria.

A nupui R. Liantluangi hi Mission-in Buarpui Dispensary-a an thawhtîr a ni a. Rev. Sialngena nên an inneih hian Bru leh Chakma zînga thawh chu tha an tih zâwng tak a ni a. Dispensary chawp chuan an awmna apiangah an chhawmtîr zêl a. An lo chhangchhiat hnu 1956 atang chuan a hna chu tih tawp tûr a ni a. Mahse Missionary Pi Zoduhi (Miss Oliver) chuan sâp ram atangin a hlawh tûr chu a rawn thawn zêl a, a ruaitu thih thlengin Part time-in a thawk ta a ni. An awmna apiangah Thingsen, Rotlâng ‘W’ leh Lungsen-ah te pawh rawngbâwltu tangkai tak a ni zêl a ni.

 

Posted in BCM News.

admin