Rev. V. Lalthlamuana ropui taka thlah liam a ni ta

Rev. V. Lalthlamuana’n Rev. V. Lalthlamuana, Lecturer, Jubilee Bible School chu June 1, 2021 zing dar 8:15 khan, N Tagore Hospital, Kolkata-ah Kal natna (Kidney failure)avangin Chatuan ram min pan san ta. Rev. V. Lalthlamuana ruang hi June 2, 2021-ah Mizoram panin rawn phurh haw a ni a, June ni 3 (Ningani) zing dar 2:30 ah a chenna In rawn thlengpui niin hemi ni vek chawhma dar 11:00 ah BCM Biak In, Zotlang-ah vuina Inkhawm neiin Zotlang thlanmual-ah thlah liam a ni.

Biak In lama Vuina inkhawm tan hma hian In lamah thlahna hunserh tawi hmana ni a,. Upa CK Mawia’n kaihruaiin, tawngtaina-in a thlah a. Biak In lamah kalpui niin, Rev. V. Vanlalchhunga, Bialtu pastor, Zotlang Bial-in Vui Inkhawm a kaihruai a. BCM aiawh-in Rev. F. Ramdinmawia, General Secretary leh Rev. C. Chhuntluanga, Director, Pastoral Ministry Department-in thu an sawi. Minister awm zawng zawng leh Kohhran Upa leh BCM Zotlang, Tualchhung Committee Rev. Dr. C. Vanlaldik, AGS (Mission)-in vuiin thuchah a sawi Chhungkaw aiawhin Rev. V. Lalthlamuana nau Rbt V. Lalhlimzauva leh Tualchhung Kohhran aiawh Upa Lalrinliana Punte, Secretary, BCM Zotlang ten thu an sawi bawk. Rev. Dr. V. Laldingliana, BCM President-in an chhungka tana tawngtaisakna neiin Rev. B. Lalrinawma’n Malsawm tawngtaiin Vui Inkhawm a khar a ni.

Rev. V. Lalthlamuana hi May 17, 1979 ah Christian Hospital Serkawnah Upa V. Thanglura leh Pi R. Saimawii te inakrah a piang a. Kum 2004 khan Pathian thu zir tura kohna a dawng a, AICS ah BD a zir a. BD tha taka a zawh hnu-ah, Kum 2009 ah Pro Pastor atana lak a ni a.Probationary pastor a nih lain  Zotlang Pastor Bial, Lunglei , Thingsai Pastor Bial leh  Electric Pastor Bial, Lunglei-ah a awm a, Pkum 2013-ah Minister atan ordain a ni a,  Thingfal Pastor Bial-ah kum 5 a awm hnu-in Chhipphir bial-ah kum 1 awrh a awm hman tihin a natna hian a rawn tlakbuak leh tak avangin Pastoral Committee chuan Mahni in atanga kal leh inenkawl pah theih turin Lecturer, Jubilee Bible School, Serkawn-ah an dah leh ta a ni.

Rev. V. Lalthlamuana hi Kal natna avangin vawi tam tak Damdawiin-ah te awmin a tuar tawh a. Kal thlak ngai niin chumi ti tur chuan Kolkata hi 2020 October khan Kolkata an pan a. Rabindranath Tagore Institute of Cardiac Sciences, Kolkata-ah admit a ni a. A kâla bâwk (cyst) awm chu hlawhtling takin an paih phawt a. A kâl thlak theih dawn hnaiah, harsatna hrang hrangin a tlak buak chho leh ta a, tlemin a kang deuh chang awm ṭhin mahse hniam lam a pan zel a lo ni a, June 1, 2021 zing dar 8:15 khan duh taka a rawng a lo bawl sak thin, LALPA angchhunga chawl tawh turin min lo kalsan ta aa ni.  Rev. V. Lalthlamuana hian a nupui Judy Lalramdinpuii Chhakchhuak bakah a chenpui, an upa ber Nl. V. Lalrinthangi leh a nau Rbt. V. Lalhlimzauva nupui leh fanu a kalsan a ni.

Rev. V. lalthlamuana thihna hian Mizoram Baptist Kohhran pumpui a fan chhuak nghal a, a chanchin hria apiangin an lainatin an sun takzet a a ni.  BCM chuan Thahnem ngai taka rawng a lo bawl tawhna te hre rengin a rawngbawlna avanga lawmthu sawi chungin ui leh zah takin thlah liam ta a ni. A kalsan, a nupui  leh a unau te, a chhung te leh a rawngbawlpui zawng zawng te Lalpa’n thlamuanin awmpui zel rawh se.

“A mi thianghlimn thihna chu LALPA ngaih chuan hlu tak a ni”

Rev. V. Lalthlamuana Chanchin(PDF)