Sap Upa leh Pu Buanga te hriatrengna inkhawm (Memorial Service) buatsaih

Mizorama Chanchin Tha rawn thlentu, Sap Upa leh Pu Buanga te hriatrengna lungphun, United Kingdom-ami chu Mizoram Baptist Kohhran Assembly, 2017-in siam that ni se ti-a a rel bawhzuiin siam that a ni a. Tunah hian a pahnihin siam zawh tawh a ni. September 14, 2019 hian He lungphun thar hlanna leh anmahni hriatrenga inkhawm hi a hmunah buatsaih a ni ang.

He hun hmang tur hian BCM hruaitu pali – Rev. Lalbiaksanga Chinzah, BCM President, Rev. F. Ramdinmawia, General Secretary, Rev. Dr. C. Vanblaldika, AGS i/c Mission leh Rev. R. Zohmingliana, AGS i/c Service te chu Administrative Committee-in kal tura a tih angin an kal dawn a ni.

Memorial Service hi September 14, 2018 (Friday)-ah Haven Green Baptist Church, Ealing, London-ah neih a ni ang a, he biakin hi hi Pu Buanga lawina Kohhran a ni a, Biak In atanga Pu Buanga thlan hi   mel 1.5 lek a hla ah a awm a,  Bus in minute sawm vel kal a ni. Tin, Sap Upa thlan hi Stretham, Cambrigheshire-ah a awm thung a ni.

Hemi ni Chawhma lamah Sap Upa thlan tlawh in, Chawhnu ah Pu Buanga thlan an tlawh leh ang a, thlan-ah hian hunserh hman ve ve a ni ang a, BMS lamin an kaihruai ang a, BCM President / General Secretary-in BCM aiawhin Welcome Speech, Tribute to FW Savidge & JH Lorrain te sawiin tawngtaina neih a ni ang.

Official Memorial Service inkhawm – 4pm to 5pm ah Haven Green Baptist Church-ah neih a ni ang. He Inkhwm hi Rev. Dr. C./ Vanlaldika, AGS i/c Mission (BCM) in a kaiahruai ang a. BMS leh BCM aiawh ten thu an sawi bakah  Sap Upa tunu Anne Quick leh UK mizo community  te aiawhin thu an sawi ang a, Pi Lalrindiki Khiangte (Daduhi) leh Pi Felicia Singson te an zai bawk ang. Sap Upa leh Buanga hriatrengna hun leh an chanchin chhiarchhuahna hun hman a ni bawk ang.

He hun hmang tura Mizoram atanga kal turte hi naktuk (Zirtawpni) hian Aizawl-ah an phei anga, Inrinni Kolkotta an pan ang a, Pathianni leh thawhtanni-ah Kolkata a BCM rawngbawlna hmun Mission Field-a Kohhran te an tlawh kual ang a, September 12 (Thawhlehni)-ah UK panin an chhuak ang. Rev. Dr. C. Vanlaldika, AGS Mission chu tunkar Niulaini (September 5) khan Orissa apanin  chhuak a, Orissa ah hian Mission Field Survey a nei ang a, September 10 hian Kolkata-ah chhovin, hotu dangte a zawm ang a, U.K. an pan ho dawn a ni.

Kum 2016 khan Pu K Lalsanga, Chanmari, Lunglei, England zin chuan Pu Buanga thlan an lo zu hmuchhuak tawh a. BCM Assembly Executive Committee January 24-25, 2017-a neih chuan Pu Buanga thlan hmuh chhuaha awm ta chu lawmawm tiin, chei that dan kawng zawn ni se la, hemi rual hian Sap Upa thlan pawh zawnchhuah tumin hma lak ni se, tiin an rel a. Hetih mek lai hian February 3, 2017 khan Lalrinawma Zadeng te chhungkua chuan Sap Upa thlan hi an lo hmuchhuak ve leh ta a ni. Tichuan 2017 BCM Assembly chuan Sap Upa leh Pu Buanga thlan chjei that chu a remti a, Administrative Committee-in lo bawhzui se tiin thu a dah ta a.

A tir atanga sul lo sutu Pu Lalrinawm Zadeng, U.K a awm mek chu hma la tura ruat a ni a. Tin, BMS (Baptist Missionary Society) lam pawhin a tul ang angin an pui bawk. Ani hian theihtawp chhuahin chak takin hma a la a, a tul apiang buaipuiin thlan pahnih chu mawi taka siam zawh a lo ni ta a, Pu Buanga thlan hi 31st July 2018 ah zawh fel niin Sap Upa thlan hi 31st August 2018 ah zawh fel a nih ve leh a ni.

………………….

REPORT

PU BUANGA LEH SAP UPA THLAN SIAMTHAT

by Lalrinawma Zadeng

 

Kum 2016 kum tawp lam leh 2017 kum tir lama Pu Buanga leh Sap Upa thlan kan zawnchhuah dan kha chu document fel tak a awm tawh a. Chumi hnu a kan bawhzui dan tlem azawng ka han ziak ve a ni e.

Khatia an thlan te zawnchhuah a han nih tak a chinah khan mi te pawh an tha in a Kohhran mi te atang pawhin phur taka hmalak zawm duhna a awma. Massi 2017 leh kumthar 2018 hmang tura zoram kan rawn haw in BCM hruaitute nen inkawmna te nei in hmalak dan tur kan sawi hova.  Hetah hian an thlan siamthat ngei tur a nih thu te leh siamthat an nih hunah a hawnna memorial service te pawh neih tur a nih thu kan sawi hova. Tichuan keini chhung chu kumthar hnu ah UK lamah kan liam thla leh ta a.

Kan thiam ang angin hma kan han la ve a, a thuthlung in thlan siamthat permit hi kan be fel hmasa a, tichuan thlanmualneitute nen in rawn in anmahni in an approve sa thlansiamtute (Memorial Masons) hnen atangin quotation te kan la kual ta a. BCM te nen in rawn zel in EM Lander Memorials of London chu a thlan siamthat hna thawk tur hian kan be fel a. Tin a thlan design atan hian BCM lam atangin a siamtute design neih sa fel tak Probyn design thlan a ni a, a thu ziah tur mawi tak pawh BCM lamin fel takin an rawn phuah thlap a. Tin thlan lung ah hian Pu Buanga leh Sap Upa te nupa ve ve an pianni leh thih ni dah tha a kan hriat avangin a ni tak confirm turin historian leh archivist hrang hrang te biakrawn an ni a. Tin Sap Upa tunu ngei hian a pi boral ni hi a rawn confirm bawk a.

Tichuan thlan lung chu kan order fel a. A man pawh pek tlingtlak fel nghal a ni a. Hetah hian hriat tur pawimawh deuh mai chu Sap Upa phumna thlanmual hi thingtlang khaw thlanmual te tak te a nih avangin thlanlung design ah an lo strict deuh a. Pu Buanga leh Sap Upa tan design inang chiah kan order chu Sap Upa phumna thlanmual neitute an lo strict tak si ah chuan an phal ang tawkin design hi tihdanglam leh a ni a. Original design ah thlanlung leh a hung kualna design kan thlan sa kha Sap Upa thlan ah hian hman rem ta lovin thlan lung chauh dah a ni ta zawk a ni. Pu Buanga thlan ah erawh min phal sak ziktluak angin original design ang chuan kan kalpui ta a ni.

Heta senso hi a zavaiin BCM lamin Kohhran mi te inphalna zarah a tum a. Hetiang hi kan senso chu a ni:

  • Pu Buanga thlan siam nan: GBP 6913.20 (India pawisa in Nuai Ruk leh tlem)
  • Sap Upa thlan siam nan: GBP 4096.80 (India pawisa in Nuai Li tlinglo hret)

Sap Upa thlan hi kan tih simple a tul tak avangin a tlawm phah ta a ni.

An thlan te hi nakin zela la tlawh duh tur te tan heng hi an awmna tak chu a ni e:

  • Sap Upa thlan: Stretham Cemetery, Cambridgeshire, UK, CB6 3JN (GPS: 52°21’00.1″N 0°13’26.7″E, Google: 52.350038, 0.224069)

  • Pu Buanga thlan: South Ealing Cemetery, London, UK, W5 4RU (GPS: 51°29’51.3″N 0°18’07.0″W, Google: 51.497583, -0.301944)Sap Upa thlan, Stretham Cemetery, Cambridgeshire, CB6 3JN (GPS: 52°21’00.1″N 0°13’26.7″E, Google: 52.350038, 0.224069)

Pu Buanga thlan hi 31st July 2018 ah zawh fel niin Sap Upa thlan hi 31st August 2018 ah zawh fel a nih ve leh a. Tin a hawnna leh Memorial Service pawh 14th September ah neih tura buatsaih a ni. Hetah hian Baptist Missionary Society, UK (BMS) leh BCM te tangrualin program fel taka duan a ni a. BCM lam atang pawhin mi engemawzat rawn kal thei tura beisei a ni a. Tin program ah hian a tul angin UK Zofate (UK a mizo khawsa te) pawhin lo tawiawm tura ruahmanna siam a ni.

Sap Upa thlan thar

Tin Memorial Service hi Pu Buanga lo lawina thin Kohhran, Haven Green Baptist Church, London ah neih tur a ni a. He Kohhran ah hian amah Pu Buanga tak lo hria chu an awm tawhlo na in a chanchin hi chu an Kohhran history ah te hian ziaka hmuh turin a awm a. Anhmahni pawh hi hetia inkhawmna nei tura kan va biak hian an lo inhawhngin an lo lawm der ve em em a ni.

Pu Buanga thlan lung hlui pawh Mizoram lamah display turin August thla chawhnu lam khan rawn thawn chhoh a ni tawh a. A rih em avangin lawngin a rawn kal a. A rawn kal rei deuh dawn a. Kolkata atanga la rawn thawn chhawn leh tur te a ni nen Zoram tak chu October thla lama a rawn thlen beisei a ni.

Pu Buanga thlan (Lung) hlui.

Thlan lung hlui.. kalkawngah thang mek

 

 

 

 

 

 

 

Related Links:

Sap Upa thlan hmuchhuak veleh ta.

Sap Upa leh Pu Buanga thlan siam dawn

Posted in Uncategorized.

admin