Sap Upa leh Pu Buanga thlan siam dawn

Pu Buanga thlan

MI THAHNEMNGAITE HNENA NGENNA

Zofate, thingbul-lungbul be mai mai thîn, hnam boral mai tûr Pahian hmangaihna min rawn hriattîr a, chatuan nunna kawng min kawh hmuhtu, A AW B min siam sak a, tûn dinhmuna min hlângkaitu, Krista Pasaltha huaisen pahnih Sâp Upa leh Pu Buanga te thlân chu hmuh chhuah a ni a. Hêng thlânte hi chhinchhiahna awm mumal tawh lo leh chhe tawh tak an ni. An nun thâpa min rawn zawng chhuaktute thlân hi hun lo la kal zêl tûrah hriat reng leh hmuh theiha a awm reng nân 2017 BCM Assembly chuan chei that a rêl a.

Assembly rorêl hi Concerned Committee-in ngun taka a ngaihtuahin thlânte hi September 2018 thla chawhma lam ngeia siam peih ni se, a ti a. Thlân Lung siam dân tûr leh ziak dân tûrte pawh a ruahman a. Ram hla tak (Sâp ram)-a awm a nih avângin sênso pawh a hautak deuh dâwn a, hêng thlân pahnih siamna leh kawng hrang hranga buaipuina tûr atân hian chêng Nuai 20 vêl mamawh rin a ni.

Amaherawhchu, kohhranhote tangrualin Pathian chakna ring chunga tih kan tum chu kan tihlawhtling leh thei ngei ang tih beisei tlat chungin Committee chuan Budget-ah pawh dah lovin Tuialchhung kohhranhote hnênah an

Sap Upa thlan – Plot B281

remchân ang tâwk tâwk dîlin appeal a siam a. Mahse, hei hian sênso tûr a daih loh theih avângin mi thahnemngai, chhûngkua leh mi mal pe duh apiangte thahnemngai taka pe tûrin kan inngênin kan insâwm a ni. Kan inhuam zau deuh pawh a pawimawh hle ang, pawisa thehluh dân pângngaiin Designated Fund-ah thehluh tûr a ni ang.

 

Hei hi mi mal leh kohhranhoten in rawn ngaipawimawh a, a tam zâwk erawh chuan hma kan la lova, hei hi ngaipawimawhin July thla chhûng ngeia tih fel ni thei se, a lâwmawm hle ang.

 

 

 

Sd/-Rev.F.Ramdinmawia
General Secretary
Baptist Church of Mizoram

Posted in BCM News.

admin