Shillong-ah Inremna ruai

Shillong Kohhran 2 hruaitute inremna ziak

October 14 & 15, 2017 (Inrinni leh Pathianni) hian Shillong Mizo Baptist Kohhran(BCM) leh Shillong Mizo Kohhran (PCI) te chuan “Amah chu kan inremna a ni”(Eph 2:14)  tih thupui hmangin Inremna Inkhawm an buatsaih dawn a. He Progamme hi Mizo Baptist Kohhran leh Mizo Kohhran Joint Committee buatsaih a niin, Shillong Mizo Kohhran Biak-inah hman a ni ang. Inrinni tlaiah Inremna ruai an kilho ang.

Inrinni chawhma dar 11:00-ah Inkhawm tannin Upa Sailoliana Sailo(BCM)-in Inkhawm a kaihruai ang a, Pastor Lalbiakchhunga Pachuau(PCI)-in thuchah a sawiin, SMBK zaipawl leh Baptist Choir, Aizawl ten pathin fakna hla an sa ang. Thingpuiin chawlh neih zawhah Chawhnu dar 1:30-ah Inkhawm awm lehin Upa dr. C. Nunthara’n(PCI) Inkhawm a kaihruai anga, Pastor R. Lalrintluanga’n thuchah sawiin  Shillong Mizo Baptist Kohhran Zaipawl, BCM Shillong Pastor Bial zaipawl leh Baptist Choir, Aizawl ten Pathian fakna hla an sa ang. Tlai lamah inremna ruai ropui takin an theh dawn a ni.

Pathianni-ah pawh nilengin hun hman a ni leh ang a. Dar 11:00-ah inkhawm awmin Pastor Lalbiakchhunga Pachuau-in Inkhawm a kaihruai ang a, Rev. Dr.K.Lalrinthanga, Executive Secretary(BCM), Aizawl-in thuchah a sawi ang. SMBK Zaipawl, Baptist Choir Aizawl leh Shillong Pastor Bial Zaipawl(BCM) ten Pathian fakna hla an rem ang. Chawhnu dar 1:30-ah Pathian biak inkhawm awm lehin Pastor R. Lalrintluanga’n Inkhawm a kaihruai ang a, BCM Madandriting Zawipawl, Madandriting Mizo Presbyterian Zaipawl, Shillong Mizo Kohhran Zaipawl, Shillong Mizo Baptist Kohhran Zaipawl, Baptist Choir, Aizawl ten zaiin rawng an bawl ang a, Synod hruaitu zing atangin thuchah ngaihthlak a ni ang.

Hun hmasa lamah te kan rawn tarlan tawh ang khan Shillong-ah hian Kohhran pahnih – Shillong Mizo Baptist Kohhran(BCM) leh Shillong Mizo Kohhran(PCI) te hian Biak In intawmin hun rei tak inkhawm ho thei si lovin hun ruat angin an inkhawm hrang thin a. Hei hi Kohhran pahnihte tan thil buaithlak leh remchan loh hun tam tak a lo awm thin a. September 1, 2017 khan Shillong Mizo Kohhran leh Shillong Mizo Baptist Kohhran te chuan inremna thuhlung an lo ziak thei ta a. Inremnaah chuan Shillong Mizo Baptist Kohhran chuan Biak In hran an sa ang a, chumi an sak zawh hunah Shillong Mizo Kohhran chu chhuahsanin an Biak In thar an luah ang. Shillong Mizo Kohhran chuan tuna Mizo Kohhran Biak In hi an rochun thung dawn a ni. Shillong Mizo Baptist Kohhran indan nan hian Sillong Mizo Kohhran (PCI) chuan cheng nuai 300 a pe thung dawn a ni. Shillong Mizo Baptist Kohhran hian Biak In hmun hi lei fel tawhin sa nghal mai turin an inbuatsaih mek bawk.

Hetianga Kohhran pahnihte inkara hun rei tak haratna lo awm tawh chinfela a awm ta hi a lawmawm hle a.  Inremna Inkhawm leh Inremna ruai hial buatsaih ho theia an awm hi Pathian hnathawh ropui leh chhinchhiah tlak, Kohhran History-a hriatreng tur a ni dawn ta a ni.

Related links about this topic

Posted in BCM News.

Leave a Reply

Your email address will not be published. Required fields are marked *