South Vanlaiphai Pastor Bial kum 75-na (Platinum Jubilee) lawm a ni.

Inrinni, May 7, 2022 khan S. Vanlaiphai Pastor Bial chuan an Bial din atanga kum 75-na (Platinum Jubilee) an lawm a. He hun hmanpui hian Headquarters atangin General Secretary, AGS Service leh Director, Pastoral Ministry Department te bak ah Pastor leh thawktu thenkhat an kal.

Jubillee lawmna hi zing dar 7:00 ah Bial chhung Kohhran tinah Jubilee Dar vua-in tan a ni a, chhun dar 12:00 – ah Platinum Jubilee Hriatrengna (Monument) hawnna nei in he hun hi Upa F. Lianzara’n a kaihruai a, Rev. R. Lalbiakliana, General Secretary-in Monument hawngin Upa H. Vanlalmuana’n Report tlangpui a pe a, Pro.Pastor Lalrammawia’n Malsawm tawngtaiin Monument hawn programme a khar.

Monument hawn zawh hian Jubillee lawmna Inkhawm BCM Biak In, S.Vanlaiphai ah neih chhunzawm nghal a ni a, Upa C. Lianvunga’n Inkhawm a kaihruaia, Rev. Zadingliana Pachuau-in Jubillee lawmna hun hmang tura kohhran mi kalkhawm te leh hmun hrang hrang atanga Jubillee hmang tura kal te lawmna sawiin, Upa F. Laltlanzuala, Bial Secretary-in thu pawimawh puanna a neih zawhah Upa F. Lalkhawmzova’n Jubilee lawm a nih dan leh Bial dinhmun tlangpui a sawi a, S. Vanlaiphai Pastor Bial Zaipawl ten fakna hla sa-in, Rev. R. lalnunzira, AGS – Service-in Jubilee Chibaibukna leh duhsakna thutawi a sawi a, Rev. R. Lalbiakliana, General Secretary-in thuchah sawiin, Rev. Vanlalmuankima’n Souvenir a tlangzarh nghal bawk.  Nl. C. Lalhunmawiin fakna hla a sa a,  Upa S. Lalthanzuala’n lawmthusawina neiin Rev. Rc. Lalthanzama, Bialtu Pastor, Rahseiveng Pastor Bial-in Malsawm tawngtaiin Inkhawm a khar ta a ni. Inkhawm banah Jubilee ruai  an kilho bawk.

Vanlaiphai Pastor Bial hi kum 1947 ah Pastor F. Aihranga chu S. Vanlaiphai leh a chhehvel enkawl turin dah a ni a, S. Vanlaiphai chu Pastor thuthmun a nih avangin S. Vanlaiphai Bial din tanna atan hman a ni a, hemi hnu hian Pastor Bial then mumal tak neiin Phawngpui Pastor Bial-ah dah leh a ni a, Kum 1967 ah Phawngpui Pastor Bial chu Bial hnih ah thenin Phawngpui Pastor Bial leh S. Vanlaiphai Bial-ah te then a lo ni ta a ni. Tun dinhmunah Tualchhung Kohhran 7 – Ariel, Bethel, Darzo, Ebenezer, Sikulveng, S. Vanlaiphai leh Vengpui te awmin Kohhran member 3128 an awm mek a, Tuna `Bialtu Pastor chu Rev. Zadingliana Pachuau a ni. Kum 2021-2022 BCM Target cheng 77,00,000/- chu Rs. 26,200/- in an khum a, Kumthar 2022-2023 a an Target Rs. 86,70,000/- pawh Pathian chakna rinchhana tlin ngei an in beisei a ni.