St.James Higher Sec. School-in Affiliation nei fel ta:

Mizoram Baptist Kohhran Mission School hlun ber pawl, St.James Higher Secondary School, Gongrai,Tripura Field chuan May 15, 2018 khan  CBSE affiliation a hmuh avângin Pathian hnenah lawmthu sawiin a lawmna an nei. Heprogramme-ah hian Tripura Minister an sawm tepawh an tel. Tin,he school-a lo zir tawh mi tam tak an lo tel bawk.

St.James school hi Mizoram Baptist Kohhran Hmeichhe Pawl (MBKHP) ten bul tanin Tripura ram buai kum 1980 khan din a ni a. Field director Rev B.Thangchina’n he school hming mawi tak hi a phuah a ni. A hmun hi kan missionary pension ta Pu F.Ngunkara khan Leipui siamna atân Gongrai pa hnên atangin Rs.20/- (Twenty only)-a a lei a ni. He hmun hi tûn hma chuan “ramhuai awmna hmun” tiin Gongrai khua ho chuan an hlau êm êm thin a. School pawh hi a din that theih pawh an ring lo a. Tûna kan school field lai takah hian Leiruangtuam kan tih ang kha a awm a, an hlau êm êm a ni. School din tirh atang hian dodâlna tam tak tawkin, vawiruk (6) teh meuh mi sualin an hâl a, tûnah hetiang hi Pathian hruainain kan thleng ta a ni.

Kum 2015 khan State government atangin class 12 recognition hmuh a ni a. BCM-in school kan neiha CBSE affiliation hi hmu hmasaberin April, 2018 khan Class X thleng Central Government affiliate kan lo ni ta a ni. CBSE affiliation hmuh hi thil awlsam lo tak a ni. He school din tirh atang hian mi 564-in matric an pass chhuak tawh a, Kuminah hian student 986 an nei mek a, class IX hi la rawn luh belh tur an la awm a, hei ai hian an la tam ang.

Kan BCM mission field school zingah St.James school hi kan hlawhtlinna ber pâwl nia a ngaihtheihna chu he school atanga Matric pass chhuak ho hi kohhran leh mission school hrang hrangah thawkin mi tangkai tak takin an chhuak a, tin, anmahni tualchhûng kohhranah pawh mi tangkai taktak an ni thîn hi a lâwmawm êm êm a ni.

Affiliation lawmna inkhawmah hian zirlai hnam hrang hrangten an hnam lâm mi sâng chuang kalkhâwmte an entîr a, “Nang erawh chu chatuanin, hnam tin tân kulhpui nghet i ni” tiin Pathian chawimawina hla an sa a ni. Tripura missionary boral ta Nl. F. Vanlalremi khan BCM-in rawng kan bâwl tirh chuan Molsom naupangte hi an bâl lutuk a, chirha vawk note inbual ang mai an ni, a ti thîn. Mahse, tûnah chuan Chanchin Tha avângin hnam mawi tak a lo ni ta hi a lâwmawm hle a ni.

Posted in BCM News.

admin