Sunday School, Kumchanve Exam: June 30

Mizoram Baptist Kohhran chuan kum tinin June Pathianni hnuhnung ber hi Sunday School kum chanve exam hun atan an hmang thin a.  Kuminah pawh June 30, 2019 hian Mizoram pumah Pathianni zing inkhawm banah Sunday School kum chanve Exam hi neih a ni leh dawn a ni. Senior A leh Senior B chu  Pathianni hmasa khan Question semchhuakin zirlaibu enin in lamah an chhang a, Pathianni hian an chhanna an thehlut ang. Intermediate chin hnuailam zawng chu exam dan pangngaiin a hmunah exam tur a ni ang.

Sunday School Kum chanve Exam Question hi Headquarters atanga siam lovin, Pastor Bial Sunday School Committee-in an bial chhung theuh atan Question hi a buatsaih thin a ni.
Mizoram Baptist Kohhran Sunday School Inchhiarna 2018 in a tarlan danin Kohhran member 144,668 -ah 125,707 (82.82%)-in Sunday School-ah hming an ziak a. Kum 2018 kumtawp exam-ah khan 61.61-in an exam a ni. (Hmingziak zat leh pecent chhutnaah hian kum 4 chin hnuai lam bakah CBC leh BBC a huam tel lo)

Christian Education Department Director, ZD Rodingliana chuan Pathia thu zirna tha tak Sunday School kan nei a vang leh Sunday School-in hma a sawn zel chu lawmawm a tih thu sawiin, Sunday School kai taima deuh deuh tur leh tan la thar zel turin Kohhran hote a chah a. Thlarau nun leh Pathian Thu tak hriatnaa kan than zel theih nan Sunday School Exam hi ngaipawimawh a, theihtawp chhuah turin Kohhran hote a chah a ni.

Posted in BCM News.

admin