Tawngtai Inkhawm Golden Jubilee

BCM Lunglawn

August 3, 2014 (Pathianni) hi Lunglâwn Kohhranin Zing Tawngtai inkhawm leh Zan Tawngtai inkhawm an neih tan atanga kum 50-na Golden Jubilee  a ni a. He mi hriatrengna Monument hi Pathianni zing karah Bialtu Pastor Rev.R.Lalbiaklian’n a hawng ang. Chawhma lam Inkhawmah  1964 a zing tawngtai inkhawm tantute zinga pakhat Rev.H.Rokham’n thuchah a sawi ang. Bul tantu dang Upa H.Lallian’n report a pe bawk ang. 

Lunglâwn Kohhran hian  1964 atanga tûn thlengin kum sawmnga chhung zet Zing leh Zan Tawngtai an lo nei ta a. Heti taka an tawngtai avang hian Pathian malsawmna an dawng nasa hlein an inhria a, an lawm em em a ni. An hriat chinah hei hi Zing Tawngtai inkhawm Mizorama neih tanna a ni a, Pathian khawngaihnaa tan hmasatu an ni hi an lawm hle a ni.

……………………

 

   BCM  LUNGLAWN  IN  ZING  TAWNGTAI  INKHAWM  A NEIH  TAN DAN

                                                                                                         – Upa RK. Hmangaiha , Chairman

 BCM Lunglawn chuan Zing Tawngtai Inkhawm a neih tirh atangin kumin hi a kum Sawmngana (1964 – 2014)‘Golden Jubilee’ a lo ni ta hial a. Kohhran committee-in Aug. 3, 1964 a Zing tawngtai inkhawm neih kan rel kha, Mizorama Zing Tawngtai inkhawm bul tanna niin kan hria a, a hriat reng nan he thu hi kan han ziak a ni. Kum sawmnga chhung chhum lo chat lova Zing leh Zan Tawngtai hun kan hmang thei hi Pathian vang a ni chiang a. Chhim leh Hmara Kohhran tam takin Zing Tawngtai  phei chu an lo hmang ta nghe nghe a, a lawmawm em em a ni. Kan Kohhran hotuten a bul intan dan te pawh hi kan kohhran unau dangten an hriat theih nan chanchinbu engemaw talah chuan tar chhuah ve ni sela an tih avangin ka han  ziak a ni. Mahni kohhran bil intar lanna ni lovin, kan Zoram puma Pathian inpuanna leh hnathawh ropuizia tarlanna ni zawk se, tih hi Lunglawn Kohhran duh dan chu a ni e.

April ni 13 – 17, 1964

(Thawhtan – Zirtawp) chhung khan World Vision International chuan All India Pastor Conference Gwahati-ah a buatsaih a. Hetah hian Pastor-te chauh ni lovin, Kohhrana inhmang mipa leh hmeichhiate pawh tel theih a ni a. Kan kohhran atangin mi pali Upa Sapkunga (R.I.P), Tv. Vanlalliana (Dec. 24, 1968 a Vaseitlanga Krista tana Martar ta), Pro. Pastor H. Lalliana (tuna BCM Venglai, Lunglei Upa) leh Tv. H. Rokhama (May 29, 1968 a Rampawn Missionary tura tirhchhuah) te an zu tel ve a. He Conference-ah hian World Vision President  Dr. Bob Pierce leh Vice President Dr. Paul Rees te pawh an lo kal a. Tin, Kohhran thawhlawm Sawma Pakua pe thin Millionaire Dr. Richard C. Halverson te, India Pastor S. Sahu te, South Korea Pastor Dr. Samuel Moffat te pawh an lo kal a, thusawitu ropui tak takte an ni hlawm.

South Korea Pastor Dr. Samuel Moffat -an an kohhran a nuna, a harh a, Missionary tam tak an tirh chhuah theihna chhan ber chu tuk tin zing dar 4:30 a khawpui daia tawngtaina tlanga mi tam tak an tawngtai mup mup thin vang nia a hriat a han sawi chuan Tv. Vanlalliana thinlung a khawih nasa em em a, Zorama tih ve ngei tumna thinlung a nei lian hle a. April 17, 1964 chawhnuah Conference chu a tiak ta a. Mahni khaw lam panin an haw ta sung sung a. Lunglawn atanga kalte pawh April 25, 1964 Inrinni chhunah khua an lo thleng ta a. Chumi zan chuan Tv. Vanlalliana chuan report pekna leh thuchah sawina hun a chang a. A thusawi a tuiin a ap hle mai. Inkhawm banah Upa Sapkunga Inah inpawlhona kan nei a, Kan hlim hle mai. A tuk Pathianni zingah P/P H. Lalliana’n thuchah a sawi ve leh a, a ni pawh a tui hle mai. Zanah Tv. H. Rokhama’n hun a chang ve leh a, a ni pawh a tui hle mai. Ani hi BCM Assembly-in B.D zir tura a lo thlan tawh a ni nghe nghe a.

Tv. Vanlalliana rilru-a thi thei lo chu South Korea Kohhran tawngtai inkhawm neih dan anga zinga tawngtaina neih kha a ni a. Tlangval then khat sawmin tawngtaina an nei thin a. Zanah pawh hun awlah Biak inah tawngtaina an hmang thin a ni. Tunlai angin Biak in hi kalh a ni lem lova, a duh tan chuan fianrial tawngtai nan hman a ni thin reng a. He an inpekna leh tih tak zeta Pathian an pawlna hian, Kohhranah nghawng a nei chho zel a, Kohhran pawhin kohhran puma hman dan a lo ngaihtuah ta a. Kohhran Committee Dt. 3.8.1964 chuan hetiang hian Zing leh Zan Tawngtai thu chu a ngaihtuah ta a.

“Tunlai hian kan kohhran chu Pathian khawngaihna avangin kan lo hlim deuh va, tuk tin leh zan tin Tawngtai  Inkhawm neiin a duh apiang an kal khawm thin a, a lawmawm em em a ni. Hetiang Tawngtai Inkhawm (Zing leh Zan) hi nei zel ila, amaherawhchu, thusawi leh thil dang engmah fawm tel lovin tawngtaina ngawt tak tak atan hman nise, tih remtih a ni. A vawngtu tur ruat lawk zel a ni ang a, chumi lo ruattu atan Upa Sapkunga leh Pu Tuaha an ni ang. Tun hmaa lo relbawltu deuhte relpuitu tur an ni ang,” tiin. Heta tang hian Kohhran committee-in umzuiin Zing leh Zan Tawngtai inkhawm chu tun thleng hian neih a ni ta zel a ni. Kan Kohhran chuan Tawngtai inkhawm hi thlarau lam malsawmna dawnna – a bik takin Camping, Chanchin Tha hrila zin chhuah leh Mission rawngbawlna hlawhtlin nana infuih kawngah te kan hlawkpui hlein kan hria a, tun thleng hian kan thlah phal tawh lo a ni.

Tichuan,  kan kohhran chuan Pathian khawngaihna avangin Zing leh Zan Tawngtai hi Dt. 3.8.1964 atangin vawiin thleng hian chhum lo chat lovin kan lo hmang ta a. Dt. 3.8.2014 Pathianni hi a kum sawmngana – ‘Golden Jubillee’ a ni a, Pathian hnena lawmthu sawi inkhawm pawh neih a ni. He thu chhiartute chu, Pathian malsawmna in dawn theih nan, thahnemngai taka Kohhran Tawngtai inkhawm nei zel turin kan fuih che u a; keini Lalpa hriatpuitua awmte hi kan awm hle hle tur a ni lo va, Amah pawh hi kan awm hle hletir hlek tur a ni lo a ni (Isaia 62:7). Kohhran Tawngtai inkhawm in neih atanga Pathian malsawmna in dawnte in rawn puan chhuah theih phei chuan a lawmawm em em ang.

One thought on “Tawngtai Inkhawm Golden Jubilee”

Comments are closed.