Thisen unit 17 an pe

January 30, 2021 khan Thalai Kristian Pawl, College Veng Unit Lawngtlai te chuan District Hospital, Lawngtlai Blood Bank a dah tur thisen Unit 17 an pe.

Lawngtlai Area TKP Co-ordination Committee Chairman Rbt. Elvis Lalthangzuala’n he hun hi a hmanpui a, TKP college veng Unit te chuan Lawngtlai Area TKP Co-ordination Committee in Blood Donation Calendar a buatsaih piah lama mahni unit thurel bawhzui a, thisen pek runpui an buatsaih thin chu lawmawm a tih thu a sawi a.

Thisen pek hi midangte malsawmna kan nih theihna kawng awlsam leh rawngbawlna peng pawimawh tak a ni a. Krista leh kohhran tan rawng kan bawlna kawngah hian nun vawng uluk ila. Thisen pek hmanga rawngbawlna chhunzawm zel tura nun fimkhur taka hmang turin TKP member te a chah bawk a ni.

Blood donation Camp ah hian thisen Unit 17 pe-in, thisen petu te hi mipa 12 leh hmeichhia 5 an ni. Nikum 2020 khan TKP Colleg Veng Unit te hian a mamawhtute hman atan Thisen Unit 39 an lo pe tawh bawk a ni.