Thlai thar hlan Ni

August Pathian ni hmasa ber

Hman dan chungchanga hriat tur:

September thla Pathian ni hmasa ber hman thin a ni a, hei hi thingtlang hmun thenkhatah chuan thlai thar chuai tawh lam a nih avangin kum 1993 BCM Assembly chuan August Pathian ni hmasa ber hi Thlai Thar Hlan Ni atan a ruat ta a ni.

Kan pi leh pute hun laiah September thla hi Mîmkût Thla tih a ni. Kristian an nih hma chuan he mi thlaah hian mitthi pualin thlan-ah thlai leh ei tur thildang an chhiah thin. Kristian kannih hnuah he ni hi Pathian hnena kan thlai tharte hlanna niah kan hmang ta zawk a, chu chu Thlai Thar Hlan Ni tih chu a lo ni ta a ni.

Hun rei tak chu September Pathian ni hmasa berah hman thin a ni a, he mi ni hian lo, leipui leh huan a thlai thar remchang apiang la khawmin biak inchhung leh hulhliap-ah an chhung vum thur a, Inkhawm banah an lilam thin a ni. Hmun thenkhatah chuan he ni hi Inrinni atanga hmangin ruaite thehin Pathian faka zaikhawmin an lam mup mup thin, Thlai Thar Kût an ti hial thin.

A tirah chuan he mi nia pawisa tling khawm hi Headquarters a thehluh tura tih a ni a, kum 1984 BCM Assembly chuan mahni tualchhung kohhran pual atan a dah a, tun thlengin tualchhung kohhran pual a ni ta a ni.

Tunah chuan kan khawsak dante a lo danglamin thlai thar hlan tur nei kan tlem tial tial ta. Amaherawhchu thlai thar hlan tur neilote pawhin kan thinlung leh kan thil neih hlu, malsawmna kan dawnte Lalpa hnenah hlanna hun atan hman i tum theuh ang u.

Mizoram Baptist Kohhran hian “Thlai Thar Hlan Ni” hi kum tinin August Pathian ni hmasa berah kan hmang ta zel a. Tun hma deuh chuan awmni khama Inrinni-ah te hmangin Pathian hnena lawmthu sawina leh zaikhawm nan, a then phei chuan ruai nen hial hmang pawh thingtlang lamah chuan an awm thin. Lo, leipui leh huan lama thlai thar remchang apiang thawh khawmin, Biak in hulhliapah an chhung vum thur a, inkhawm banah lilamin an tiral thin a. Darkar rei fu fu a awh hial thin a ni. Kohhran leh khawtlangin a nghahhlelh hun pawimawh tak a ni thin. Tunah erawh chuan huan leh lo neiha eizawng kan tlem tial tial a, khawpuiah phei chuan thlai thar hlan tur nei lo hi chhungkaw tam zawk kan ni hial ang. Heti chung hian Thlai Thar Hlan Ni hi Special Sunday-ah kan hmang zel a. Thlai thar hlan tur nei lote pawhin kan thinlung leh kan thil neih hlu dangte hlanna hun atan hmang ila. Pathian miten Pathian kan zawmna leh kan inkungkaihna tithar zeltu chu thil hlan inthawina (rawngbawlna) hi a ni. Thil hlan inthawina hi awm lo ta se la, Pathian chibai buk kan tih hi Israel-te nunah a khingbai hle ang. Pathian chibai kan bukna, lawmthu kan hrilhna, kan hmangaihna leh Amah nena kan inkungkaihna tihlanna a ni. Malsawmna minpetu kan Pathian a ni a, Ama ta kan ni tih chhinchhiahna pawimawh tak a ni tih hriain kohhranhoten Lawmna thinlung puin i hmang theuh ang u.