Thlai thar hlan Ni – August 6

Tunkar Pathianni – August 6, 2017 hi Mizoram Baptist Kohhran ni pawimawh zinga mi ‘Thlai Thar Hlan ni’ a ni a.  Kumin Thlai thar Hlanni thupui chu “ Lalpa lawmtlak thilpek,” tih a ni ang. Hemi Ni hian thlai thar nei chhungkua ten an thlai thar te Pathian hnenah hlan turin Biak Inah an keng khawm thin a. Chu chu Pathian ram rawngbawl nan hman thin a ni.

Thlai thar hlan ni hi kan hman tan kum tak hriat a har a. Kum 1950 hma lamah pawh an lo hmang tawh tih chu 1950 Assembly minute-ah a hriat theih a. Hun rei tak chu September Pathian ni hmasa berah hman thin a ni a, he mi ni hian lo, leipui leh huan a thlai thar remchang apiang la khawmin biak inchhung leh hulhliap-ah an chhung vum thur a, Inkhawm banah an lilam thin a ni. Hmun thenkhatah chuan he ni hi Inrinni atanga hmangin ruaite thehin Pathian faka zaikhawmin an lam mup mup thin a, Thlai Thar Kût an ti hial thin. September thla hi thingtlang hmun thenkhatah chuan thlai thar chuai tawh lam a nih tawh avangin kum 1993 BCM Assembly chuan August Pathian ni hmasa ber hi Thlai Thar Hlan Ni atan a ruat ta a ni.

Kan pi leh pute hun laiah September thla hi Mîmkût Thla tih a ni. Kristian an nih hma chuan he mi thlaah hian mitthi pualin thlan-ah thlai leh ei tur thildang an chhiah thin. Kristian kannih hnuah he ni hi Pathian hnena kan thlai tharte hlanna niah kan hmang ta zawk a, chu chu Thlai Thar Hlan Ni tih chu a lo ni ta a ni.

A tirah chuan he mi nia pawisa tling khawm hi Headquarters a thehluh tura tih a ni a, kum 1984 BCM Assembly chuan mahni tualchhung kohhran pual atan a dah a, tun thlengin tualchhung kohhran pual a ni ta a ni.

Tunlaiah chuan huan leh lo neiha eizawng kan tlem tial tial a, khawpuiah phei chuan thlai thar hlan tur nei lo hi chhungkaw tam zawk kan ni hial ang. Heti chung hian Thlai Thar Hlan Ni hi Special Sunday-ah kan hmang zel a. Thlai thar hlan tur nei lote pawhin kan thinlung leh kan thil neih hlu dangte hlanna hun atan hmang ila. Pathian miten Pathian kan zawmna leh kan inkungkaihna tithar zeltu chu thil hlan inthawina (rawngbawlna) hi a ni. Thil hlan inthawina hi awm lo ta se la, Pathian chibai buk kan tih hi Israel-te nunah a khingbai hle ang. Pathian chibai kan bukna, lawmthu kan hrilhna, kan hmangaihna leh Amah nena kan inkungkaihna tihlanna a ni. Malsawmna minpetu kan Pathian a ni a, Ama ta kan ni tih chhinchhiahna pawimawh tak a ni tih hriain kohhranhoten Lawmna thinlung puin i hmang theuh ang u.

Posted in BCM News.

Leave a Reply

Your email address will not be published. Required fields are marked *