Thlarau Thianghlim thlen Ni – June 4

Tunkar Pathianni, June 4, 2017 hi Thlarau Thianghlim thlen champha phak (Pentecost Ni) a ni a. He Ni hi khawvel pumah Kristian te chuan urhsun takin kan hmang thin a. Mizoram Baptist Kohhran pawhinin he ni hi Special Sunday atan kan hmang thin a ni. Kuminah pawh he ni hi Kohhran hrang hrangah urhsun taka hman a ni leh dawn a. Kumina Pentecost Ni thupui atan Tirhkohte 1:8  – “Thlarau Thianghlim chu in chunga a lo thlen hunah thiltihtheihna in la nei ang,” tih thu hman a ni ang.

Mizoram Baptist Kohhran hian hun rei tak chhung chu Penticost ni hman dan tur programme hi Headquarters atangin a hranpa-a buatsaih a ni ngai lo va. Tualchhung Kohhran tinin tha kan tih dan angin kan hmang thin a. Service Committee meeting November 25 & 26, 2009 chuan he ni hi inang tlanga hman thin turin programme buatsaih ni se tiin a rel a. Hemi kum atang hian kum tinin Thlarau Thianghlim Thlen Ni tiin Nipawimawh Programme-ah telh thin a ni a, Headquarters-in thupchah Chhiar tur te a buatsaih a, tin,  Tawngtai rual thupui pawh a siam sa thin a ni.

Thlarau Thainghlim Thlenni-ah hian Sunday School-ah pawh hemi Pual thuzir tura buatsaih chu Department tinah zir thin a ni a. Intermediat-Senior B te chuan Thuzir In ang an zir a, Baptisma zirlai chin hnuai lam zawngin thu zir in ang an zir thin bawk a ni.

Tawngtairual: Thupui-

1) Thlarau Thianghlim min pek avanga Pathian hnen a lawmthusawina

2) Thlarau Thianghlim kan tihlungngaih thin leh kan tihvui thin avanga thuphachawina

3) Thlarau Thainghlim tihharhna kan chan theih nana dilna

……………………

THLARAU THIANGHLIM THLEN NI

Hun rei tak chhung chu Penticost ni hian programme hranpa buatsaih a ni ngai lo va. Tualchhung Kohhran tinin tha ka tih dan angin kan hmang thin a. November 25 & 26, 2009-a Service Committee Meeting chuan he ni hi inang tlanga hman thin turin programme buatsaih ni se tiin a rel a. BCM Ni Pawimawha chuantir a lo ni ta a ni. A ni erawh chu BCM Calendar-a mi anga hman tur a ni.

Khawvel pum huapa Kristiante Calendar-a ni pawimawh, kum tin an hman thin zawm vein kan ramah pawh hian kohhran tiah tirh atangin kan hmang a ni. “Penticost ni” tiin kan lam ve mai a, Sunday School zirlai buah pawh kan dah dan tam ber a ni thin. BCM Assembly chuan hei hi dik chiahin a hre lova, (Judate kût chhawm zui zel kan nih loh avangin) “Thlarau Thianghlim Thlen ni” tiin hman turin a pass hial a ni. Thuthlung Thar hun lamah chuan Tirhkohte Thiltih Bung 2-a kan hmuh Thlarau Thianghlim thlenna chuan Juda-te kût chu Kristiante kûtah a chantir (transformed) a. (The New Compact Bible Dictionary). He ni hi Baptisma channa ni atan an ruat bawk thin. Hemi nia Baptisma chang zoten kawrfual var an hak thin avangin, White Sunday (Sunday Vâr) tiin an vuah phah bawk. Isua thawhleh ni atanga chhuta ni sawmngana a ni. Isua Thawhleh ni atanga chhiar a nihna chhan hi Lev 23 : 15-a Pawl kût chhiarna “Chawlhni tuk tuk leh (from the morrow after the sabath) … atangin in chhiar ang a…tih hi, ni sarih ni hmasa ber (Sunday) hi a ni si a. Khawvel Kristian tam berten kan hman dan a ni vek a ni. A pawimawh ber zawk erawh chu Thlarau Thianghlim thlennain kohhran a din a, a tiharh a, a chenchilh a, thiltihtheihnain a thuam hi a ni.

A lo chhuah dan:

Judate kût pawimawh tak Chawlhkar kût tia an sawi, Pawl kût tih leh Buhseng kût (cf. Lev. 23:15-16; Ex. 23:16; 34:22; Deut. 16:9-10) tia an sawi bawk chu Grik tawngin Pentecost tih a ni a, sawmngana tihna a ni. Thuthlung hlui hun atangin Kalhlen kût dawna Sabath ni hmasa ber atanga chhiar a, ni 50-naah he kût hi a thleng thin. Thlarau Thianghlim hi Lal Isua thawhleh ni atanga chhuta ni sawmnganaah a lo thleng a, Thlarau Thianghlim ringtute hnena leih a nih ni chiah a lo ni bawk a. Chuvangin Thlarau Thianghlim thlen ni tiin kan sawi ta a ni.

Kristiante tana a pawimawhna:

  1. Pathianin Mosia kaltlanga Sinai tlanga Dan a pek ni nia ngaih a ni a, a pawimawh hle.
  2. Pathian hnena lawmna thilpek an hlan hun kha a ni (cf. Ex. 23:16; Lev. 234:21).
  3. Pathian be tura Judate Jerusalema an kalkhawm thinna kût ni a ni, an tan a hlu zual.
  4. Ringtute chenchilh tur leh thlarau lam dan thar pe tura Thlarau Thianghlim lo thlen ni a ni.
  5. Thuthlung thar kohhran pian niah ngaih a ni a, a pawimawh hle.
  6. Chi tin leh hman tin hnena kristiante thuchah (message) puan tur chhinchhiahna a ni.
  7. Khawvel pek theih loh ringtuten kan chan ni a ni.

Tualchhung kohhran tinah Thlarau Thianghlim lo zalên sela, min hruaitu leh min tichaktu lo ni kumkhua rawh se.

 

Posted in BCM News.

Leave a Reply

Your email address will not be published. Required fields are marked *