THLîRTU NUN

“Nimahsela, thu ngaithlatute mai ni lovin zâwmtute lo ni zâwk rawh u,
chutilo chu mahni inbum in lo ni dah ang e” (Jakoba 1:22).

– Rev.P.C.Lalropuia

Mihringte kan khawsak phungah hian a tak ram thleng lo, a phawvuaka thâm ral ta mai hi a awm theih viau awm e. Jakoba 1:22-23-a kan hmuhah pawh hian Pathian Thu leh thu \ha tinrêng ngaithlaa zâwm chuang lote dinhmun leh chutiang nun chu thil \ha a nih lohzia uar takin a sawi a ni. Chutiang bawkin Pathian ram tâna kan thawhna leh kan rawngbâwlnaah pawh hian a tak taka thawktu ni lo; a nuam chin tâwk a\anga thlîrtu hi a awm theih a, chutiang thlîrtu nun chu eng ang nge a nih tih kan zirho dâwn a ni.

1. Nun ngêlnghet lo:

Zofate chauh ni lo, khawvêl mipui tam zâwkte hi infiamna, a bîkin fooball tuipui leh ngaisângtute an ni ti ila kan sawi sual lutuk awm lo ve. Inkhelhna hmunah inkhêlte lo \an êm êm a lo thlîrtu mi tam tak an awm \hîn bawk a. Hêng inkhêl ve si lo, inkhêlte lo \an êm êmtu (fans)-te nun hi zir tham tak a awm awm e. Inkhêlte lo \anin lo insangmar ve viau \hîn mahse, inkhelhna hmunah an tel ve tak tak loh avângin an nun a zalênin a ngêlnghet lo êm êm a ni. Inkhêl an en reng chungin an duh duhnaah kal kualin, kânghlâng takin an awm \hîn.

Pathian ram rawngbâwlnaah pawh hian rawngbâwlna huang chhûnga zuang lût tak tak lo, rawngbâwl nia inngai ve tlat hi a awm theih viau awm e. Thlarau nun kawngah pawh Kohhran huang chhûnga tel ve si, kohhran thiltihnaa tel \ha peih tak tak si lo, kohhran mi nih loh hlau êm êm te an awm ve châwk \hîn a ni. Jakoba’n thu ngaithlatute mai ni lovin zâwmtute lo ni zâwk rawh u a tih nun hi an pawh pha meuh lo. Duh duh ti kual thei ringtu nun hi Pathianin min beisei dân a ni lova, a duh dân pawh a ni hek lo. Kan rawngbâwlna leh kan ringtu nun kalpui dânah hian a taka dai ve lo leh luhchilh ve lo nun hi thlîrtu nun, nun kânghlâng leh ngêlnghet lo, ringtu tisa mi kan tih hi a ni. Mahni kan inenfiah a pawimawh hle mai. Ni si, ni si lo an tih fiamthu ang deuhin ringtu, rawngbâwl inti ve si, a tak takah chuan \angkaina nei lutuk lo nih te pawh hi a awm ve theih a ni. Chuvângin, thlîrtu nun, nun ngêlnghet lo nei mi kan nih chuan a taka luhchilhtu ni tûrin, puan ven sawi chhînga Pathian ram tan kan in pêk thar leh hi a pawimawh hle a ni.

2. Sawisêl tûr an hria:

Matthaia 7:1- ah chuan Sawisêl suh u, sawisêla in awm loh nân tiin kan hmu a, hei hi Pathian Thu, vawiin thlenga kan nun min khalh ngîl tûra thupêk la awm reng chu a ni. Vawikhat chu pa pakhat hian fiamthu ti tak deuh hian kan hotute lah hi tihsual an ngah thei lutuk a, a ninawm ka ti lutuk tiin ka bulah a rawn âng chiam mai a. Kei chuan engmah i tisual ve ngai lo em ni? tiin ka zâwt vat a, tisual ve fo \hîn tho e, tiin min chhâng a, engmah a sawi zui ta lêm lo a ni. Mihringte hian mi dang tihsual hi kan hre fuh thei khawp mai hi a lo ni a. An tih \hat lai leh fakna tûr laia rilru sêng peih miah si lo, an chêt chhiatna laia mark pêk châk tlat hi kan tam awm e. Inkhelhnaah te pawh hian field kotlâng a\angin a inkhêlte tih dân tûr kan lo hrilh a, an khelh dân kan duh khawp loh laiah zirtîrtu (Coach) ang maiin kan lo sawisêl chiam chiam \hîn. Kan lo thlîrna a\anga tih dân tûr hre hle si, a taka khêl ve ni ta ila, eng ni chuang si lo tûrte hi kan tam viau awm e.

Kohhran hi kan chhangchhe êm êm a, mi chi hrang hrang awmkhâwm kan nih avângin kan dêl dûl êm êm a ni. Kan rawngbâwlna leh hmalâkna pêng hrang hrangahte hian a âtchilhtu mi tlêmte an awm fo \hîn a, an zârah rawngbâwlna hlenin a lo awm leh hrâm \hîn a ni. Chutiang kârah chuan a inpe leh rim taka thawktu lo sawisêl tâwk leh lo khawpkham lotu kan awm fo \hîn. Hei tak hi a ni thlîrtu nun chu ni. A tak taka thawk peih si lo, sawisêl tûr hre êm êm si, mahni’n ti ve dâwn se thiam tak tak neih loh bâkah peih tak tak si lote hi mualko A team kan sawi fo \hin kha an ni a, ringtu lâktlâk loh, a him tâwk a\anga lo thlîr a, sawisêl tûr ringawt zawng mi an ni duh khawp mai.

3. Nun khawhar:

Davida’n Sakhi, luite tui châka a thaw huam huang ang hian, Aw Pathian, ka nunna hi nangmah châkin a thaw huam huam a ni (Sâm 42:1) tia a lo sawi hi nun khawhar chu a ni. Davida thlarau nun hi a tuihâl a, a khua a har ngawih ngawih a ni tih hi thil chiang tak chu a ni mai. Ringtu \ha taka inngai, mahni thlarau nun hlimna tûr pawh thawk chhuak peih lo leh tum lo ringtu hi a awm theih khawp awm e. Chutiang nun khawhar a lo thlen fo-na chhan bulpui ber chu, kan tihtûr ti lo leh tih loh tûr tia kan awm \hin vâng a ni ber a. A tak ram luh chilh peih lovin, a kotlângah kan thlîr a, thawhrim avânga hlimna lo thleng tûr hian min thleng pha lo fo \hîn a lo ni. Chuvângin, thlîrtu nun chu a khua a harin a nun a chau \hîn a, ringtu \ha tak nia a inngaih laiin ringtu chak lo leh hmantlâk loh a lo ni thuai \hîn.

4. Lawmman:

Tûn lai World Cup inkhêl kan en mêkah pawh hian kan lo \ang ve viau hlawm a nih hi. Hmân deuha World Cup final an khelh \umin Brazil \an êm êm-tu pa pakhat chuan an ina TV en te ei tûr sawhchiar a chhûm khu vut vut a, Brazil-in an pêt goal apianga kah puah dur dur tûr silai mu a hem \ang \euh bawk a, a beisei ang ngeiin Brazil chu an chak ta a ni. Mahse, champion No mawi chawi a hlâwkna tak tak têltu chu Brazil players te kha an ni a, he pa hian engmah a chang ve hauh lo a ni. Thlîrtu nia, a \an lam te an chak theih nâna theihtâwp lo chhuah a, lo in sêngso ve êm êm kha chuan engmah chan a nei pha tlat lo mai. A ni, kan rawngbâwlna huang chhûngah hian a taka luhchilh a, rim taka thawktu kan nih chuan si loh chuan lâwmman hi kan chang ve ngai lovang. Thlîrtu nun a\ang chuan a hlâwkna têl ve tûr a awm lo a ni e.

Tlângkawmna:

Pathian rawngbâwl hi keini ringtute kovah a innghat tlat a. Hlimna leh lâwmna te pawh hi kan thawhrim rah a ni fo \hîn. A tak ram thleng lo, a nuam chin a\anga rawngbâwl \hîn, thlîrtute tân chuan chanvo a tlêm hle mai. Chuvângin, kan rawngbâwlna kawng hrang hrangahte hian a tak taka thawk a, a taka luhchilhtu nih hi a pawimawh ber a. Mi thlazâr hnuaiah, a nuam chin a\anga mi che vêl lo thlîrtu nih hi kan hlau hle tûr a ni. Ringtu kan nih chuan thlîrtu mai ni lovin a taka luhchilhtu, thawktu kan nih hi a ngai fo \hîn. Thlîrtu nun hi Setana min bumna a ni a, Setana rilru \âwmpui phâkna chauh a ni tih hriaiin, Pathian rawngbâwlna hi a taka luhchiltu kan nih a \ûlzia leh pawimawhzia hi i hre thar leh ang u. Lalpa’n a Thu kan za atân malsâwm rawh se. Amen.