TKP Day (July 30)

TKP  Tobul:

Kohhrana thalaite puala rawngbawlna huang hran siam tura uluk leh fimkhur taka an ngaihtuah hnuah, July 30, 1951-khan Serkawn-a thalai rualte leh kohhran upate chuan kan Zosap Missionary-te kaihhruaina hnuaiah Thalai Kristian Pawl hi an lo din a. Hruaitu hmasa te chu President – Pu Lungruala; Vice President – Pu Vanlalkunga; General Secretary – Pu K. Lalliana; Treasurer – Pu T. Ropianga; Senior Adviser – 1) Rev.H.S.Luaia; 2) Upa.C.Saizawna; 3) Zomawia Nu (Mrs FJ.Raper) 4) Pu Lalmama te an ni. Executive Committee members Nl. Rothuami; Pu Hrangthanga; Pu Lalsawma; Pu Remkunga leh Pu Thanghmuna te an ni. Thalai Pawl din hi Presbytery (tunah Assembly)-in a lo phalsak tawh avangin 1952 Presbytery inkhawmpui (Pukpui) chuan Thalai Kristian Pawl lo ding ta chu a pawmpui nghal a. TKP hi Presbytery hian Biala din phalna a pek nghal bawk avangin bial hrang hrangah pawh TKP hi din nghal a ni.

Hetih lai hian Mizoram hi Assam state chhunga district pakhat mai a nih avangin TKP inkhaikhawmna pawh District TKP tih a ni a. District TKP inkhawmpui hmasa ber pawh 1955 khan Pukpui-ah neih a ni. Hun rei tak chhung chu TKP Day atan hian District TKP inkhawmpui hmasa bera (1955)-a ni hmasa zawk, October 22 chu hman a ni thin a. Amaherawh chu he ni hi dik tawk lova hriatna a awm avangin MTKP Rorelna chuan vawi hnih/thum lai a ngaihtuah hnuin 1995 MTKP Rorelna (Sethlun) chuan Kohhran hruaitute leh kan missionary-te kaihhruaina hnuaia Serkawna TKP an din ni, July 30 hi TKP Day-ah hman ni tawh se a ti a, chu chu BCM General Committee pawhin a pawmpuiin 1997 atangin TKP Day hi July 30-ah hman a lo ni ta a ni.

TKP Rawngbawlna tlangpuite:

  1. Mission :

    TKP hian a din tirh atangin thlarau bo veina lian tak neiin, District TKP inkhawmpui hmasa ber 1955-a Pukpuia neihah pawh Agenda “TKP hminga Thuhriltu tirh” tih ngaihtuah nghal a ni a. Tun thleng hian TKP te hian theih tawkin hma kan la la ve zel a ni. Mission Support hi Bial leh Unit thahnemngaiten an pe zel a, Mission Support pe hi an la pung zel a ni. MTKP hian missionary damlo leh tanpui ngaite tanpui nan Mission Relief a sem ve thin bawk a. Heng bakah hian MTKP, bial leh unit ten Mission lama hma kan sawn theih nan thuzir tur te buatsaihin, mission consultation te neiin, work camp leh mission visit te neih thin a ni bawk.

  1. Kohhran leh TKP:

    ‘Krista leh Kohhran tan’ ti-a thupui kan dah angin TKP hian Kohhran tana a tangkai thei ang bera awm hi a tum fo thin. BCM project hrang hrang te chu MTKP chuan thalai te project-ah pawmin a hlawhtlin theih nan theihtawp a chhuah thin a. Tun hnai maiah pawh AICS leh HATIM tan te, Christian Hospital Lawngtlai leh Serkawn tan te, Nauhnuchham (BCO) enkawlna atan te pawisa faia a tanpui bakah hnatlang leh thil dangtein a tanpui thin a. Kohhran thlarau lam nun hmasawnna atan crusade, camping, discipleship/leadership/counseling training te buatsaihin, zaipawl hmasawnna atan pawh solfa camp leh zaipawl intawh-khawmna te buatsaihin hma nasa takin a la thin bawk.

  1. Khawtlang thatna tura hmalak:

    TKP hian khawtlang thatna turin kawng hrang hrangin hma a la thin a. Zirna lam te, khawtlang fai leh thianghlimna thu te, environment humhalh thu te, zu leh ruihhlo do chungchang te, HIV/AIDS chungchanga inzirtirna te, a thlawna thisen pek chungchangah te hma a la thin a. Kristian chhungkaw din chungchang te, ngaihhlut tur dik inzirtirna te, intodelh tura inzirtirna te pawh neih a ni. Heng hmalakna hrang hrangah hian sorkar leh tlawmngai pawl hrang hrangte bakah kohhran pawl dang thalai te nen pawh hmalakho thin a ni.

  1. Thalai Pawl dangte nena thawhhona :

    District TKP inkhawmpui hmasa ber (1955) chuan kohhran pawl dang thalai te nena thawhhona leh rampawn thleng pawha huang zauh a tul thu a lo ngaihtuah tawh a. Vawiin thlengin TKP te hian Mizoram chhungah leh kan state thenawmah te leh hmun hla zawk thleng pawhin palaina leh rawngbawlna a la nei zel a ni. North East India Christian Council Youth Assembly-ah a hnarkaitu te zinga mi kan ni a, Baptist Youth Fellowship India-ah pawh chanvo pawimawh tak tak changin, BYFI Inkhawmpui 2015 pawh Serkawnah kan dawl. National Council of Churches in India Commission on Youth (NCCI CoY)-ah te pawh kan tel ve ta a. Asia Pacific Baptist Youth Fellowship leh Baptist Youth World Conference-ah te pawh zaipawl leh palai kan intir ve reng thin a ni.

  1. Thalai Entu :

    TKP ten ziaka rawngbawlna hlu tak kan neih Thalai Entu hi 1978 atanga chhuah tan a ni a, Thalai Entu hi Pathian thua infuih thar nan te, chanchin inhriat tawn nante, rawngbawlna report tarlan nan te leh thalaite tana thu bengvar thlak tak tak inhrilh hriat nan te hman a ni thin a. TKP te rawngbawlna pawimawh tak a ni. Pathian malsawmna leh thawktute thahnemngaihna azarah kan semchhuah zat pawh a pung nasa ve hle a ni

 TKP Day Hmangtute Tana Hriattur Pawimawhte:

  1. TKP Day hi Kohhran leh khawtlangin kan hlawkpui theih nan hman tum nise. Social Service neih ngei tum theuh ila.
  2. Kohhran member tam zawkin min telpui theih nan uar takin sawm ila, a theih chuan Fellowship dangte (BKHP, BMP, KNP) pawh chanvo siamsak ve ni se.
  3. Thawhlawm lakkhawm a ni ang a, Bial kal tlangin MTKP-ah chhun luh tur a ni.