TKP Day – July 30, 2016

TKP Logo(New)July 30, 2016 (Inrinni) hi Thalai Kristian pawl (TKP) din champha vawi 65-na a ni a. Hemi ni hi Mizoram pumah TKP member ten urhsun takin an hmang leh dawn a ni. Kumin TKP Day thupui chu “Remna Siamtu” (Matthaia 5:9) tih a ni ang a. Hemi Ni hian Unit tam zawk chuan zing karah Vantlang hmun hma leh Biak In leh a chhehvel tihfai hnatlang an thawk thin a, a thei remchang ten chhun lamah Blood Donation Camp te neiin, Unit thenkhat chuan Intihlimna hun atan an hmang thin a ni. 

TKP Day hmanpuiin Mizoram Thalai Kristian Pawl (MTKP) hruaitute chu Unit hrang hrangah an fehchhuak dawn a, hetiang hi an hun hmanna tur a ni ang.

1. Rev. JC. Vanlalluaia, President : Chamari Unit, Lunglei-ah
2. Rbt. H. Lalthangliana, Vice President :  Venghlun Unit-ah
3. Rev. Lianchhunga Khiangte, Organiser : Chanmari Vengthlang Unit-ah
4. Pu V. Rokhawlkima, Asst. Secretary : Moria Unit, Rahsiveng-ah
5. Nl. Malsawmtluangi, Treasurer : Lunglawn Unit-ah
6. Upa Biakthansanga Khiangte, Sr. Adviser : Kikawn Unit, Bazarveng-ah

Hun hman dân tûr :

TKP Day-ah hian Chhun lamah emaw, zan lamah emaw, unit remchan dan angin Inkhawm buatsaih a ni ang a, Headquarters atangin Inkhawm kaihhruaina  hetiang hian siam a ni a, hemi zulzui hian Unit ten tul leh tha an tih angin Progamme an duang ang.

1. Unit tinin mahni remchân dân angin chhûnah emaw zanah emaw inkhawm buatsaih ni se. Thupui “Remna Siamtu”Matthaia 5:9 hman ni se.

2. Unit tinin Kohhran leh khawtlâng tâna tangkai zâwnga hun hmangin, Hnatlâng (Social Service) neih tum theuh ni se.

3. Inkhâwmah hian thawhlâwm lâkkhâwm thin a ni a. Bial kal tlangin MTKP-ah thehluh thin a ni. Thawhlâwm hmanna tûr hi MTKP Executive Committee-in a ngaihtuah ang.

4. TKP Day hi tha taka hman a nih theih nân mahni tualchhûng kohhranah thlenin Fellowship Organisation dangte pawh min telpuia, chanvo (special items, etc) te pawh chang ve tûra sâwm ni se.

5. TKP Day hun hman dân tûr programme kimchang chu Unit lamin an buatsaih ang.

——————–

TKP tobul:

Hun enge maw chen kohhrana thalaite puala rawngbawlna huang hran siam tura uluk leh fimkhur taka an ngaihtuah hnuah Serkawn-a Thalai rualte leh Kohhran Upate chuan kan Zosap Missionary-te duhsakna leh kaihhruaina hnuaiah July 30, 1951 khan Thalai Kristian Pawl hi an lo din a, Hengte hi hruaitu atan thlan an ni:-

Office Bearers :-

President : Pu Lungruala

Vice President : Pu Vanlalkunga

General Secretary : Pu K.Lalliana

Treasurer : Pu T.Ropianga;

Senior Advisers :-

1) Rev H.S.Luaia

2) Upa C.Saizawna

3) Zomawia Nu (Mrs FJ.Raper)

4) Pu Lalmama te an ni a.

Executive Committee member te chu:-

1) Nl Rothuami

2) Pu Hrangthanga

3) Pu Lalsawma

4) Pu Remkunga

5) Thanghmuna te an ni.

Thalai Pawl din hi Presbytery (tunah BCM Assembly kan ti) in a lo phal sa tawh avangin 1952 Presbytery inkhawmpui (Pukpui) chuan Thalai Kristian Pawl lo ding ta chu a pawmpui nghal ta bawk a. TKP hi Presbytery hian Biala din phalna a pek nghal bawk avangin bial hrang hrangah pawh TKP hi din nghal a ni.

Hetih lai hian Mizoram hi Assam state chhunga district pakhat mai a nih avangin Zoram huapa TKP inkhaikhawmna pawh District TKP tih a ni a, District TKP inkhawmpui hmasa ber pawh 1955 khan Pukpui-ah neih a ni. Hun rei tak chhung chu TKP Day atan hian District TKP inkhawmpui hmasa bera (1955) a ni hmasa zawk, October 22 chu hman a ni thin a. Amaherawh chu he ni hi dik tawk lova hriatna a awm avangin MTKP Rorelna chuan vawi hnih thum lai a ngaihtuah hnuin 1995 MTKP Rorelna (Sethlun) chuan Kohhran hruaitute leh kan missionary-te kaihhruaina hnuaia Serkawna TKP an din ni, July 30 hi TKP Day-ah hman ni tawh se a ti a, chu chu BCM General Committee pawhin a pawmpui tak avangin 1997 atang chuan TKP Day hi July 30-ah hman a lo ni ta a ni.

TKP Rawngbawlna tlangpuite:

1. Mission :

TKP hian a din tirh atangin thlarau bo veina lian tak neiin, District TKP inkhawmpui hmasa ber 1955-a Pukpuia neihah pawh Agenda “TKP hminga Thuhriltu tirh” tih ngaihtuah nghal a ni a. Vawiin thleng hian TKP te hian an theih tawkin hma an la la ve zel a ni. 2015-2016 chhung khan TKP Bial  leh Unit hrang hrangin Mission Support an pe a, Mission Support pe hi kum tinin an la pung zel a ni. Hemi bakah hian MTKP chuan Mission Support Rs 165,000.00 a pe mek bawk a, MTKP hian missionary damlo leh tanpui ngaite tanpui nan Mission Relief a sem ve thin bawk a. Heng bakah hian MTKP, bial leh unit ten Mission lama hma kan sawn theih nan thuzir tur te buatsaihin, mission consultation te neiin, work camp leh mission visit te neih thin a ni bawk.

2. Kohhran leh TKP :

‘Krista leh Kohhran tan’ ti-a thupui kan dah angin TKP hian Kohhran tana a tangkai thei ang bera awm hi a tum fo thin. BCM project hrang hrang te chu MTKP chuan thalai te project-ah pawmin a hlawhtlin theih nan theihtawp a chhuah thin a. Kohhran Project lian tak tak – AICS leh HATIM tan te, Christian Hospital Lawngtlai leh Serkawn tan te, Nauhnuchham (BCO) enkawlna atan te pawisa faia a tanpui bakah hnatlang leh thil dangtein a tanpui thin a. Kohhran thlarau lam nun hmasawnna atan crusade, camping, discipleship / leadership / counseling training te buatsaihin, zaipawl hmasawnna atan pawh solfa camp leh zaipawl intawhkhawmna te buatsaihin nasa takin hma a la thin a ni.

3. Khawtlang thatna tura hmalak :

TKP hian khawtlang thatna turin kawng hrang hrangin hma a la bawk a. Zirna lam te, khawtlang fai leh thianghlimna thu te, environment humhalh thu te, zu leh ruihhlo do chungchang te, HIV/AIDS chungchanga inzirtirna te, Blood Donation chungchang te, Human Trafficking chungchang in zirtirna te neiin hma a la a. Kristian chhungkaw din chungchang te, ngaihhlut tur dik inzirtirna te, intodelh tura inzirtirna te pawh neih thin a ni. Heng hmalakna hrang hrangah hian sorkar leh tlawmngai pawl hrang hrangte bakah kohhran pawl dang thalai te nen pawh hmalakho thin a ni.

4. Thalai Pawl dangte nena thawhhona :

District TKP inkhawmpui hmasa ber (1955) chuan kohhran pawl dang thalai te nena thawhhona leh rampawn thleng pawha huang zauh a tul thu a lo ngaihtuah tawh a. Vawiin thlengin TKP te hian Mizoram chhungah leh kan state thenawmah te leh hmun hla zawk thleng pawhin palaina leh rawngbawlna a la nei zel a ni. North East India Christian Council Youth Assembly-ah a hnarkaitu te zinga mi kan ni a, Baptist Youth Fellowship India-ah pawh chanvo pawimawh tak tak changin, National Council of Churches in India Commission on Youth (NCCI CoY)-ah te pawh kan tel ve ta a. Asia Pacific Baptist Youth Fellowship leh Baptist Youth World Conference-ah te pawh zaipawl leh palai kan intir ve reng thin a ni.

5. Thalai Entu :

TKP ten ziaka rawngbawlna hlu tak kan neih Thalai Entu hi 1978 atanga chhuah tan a ni a, tunah hian thla khatah copy 12,500 sem chhuah mek a ni. Thalai Entu hi Pathian thua infuih thar nan te, chanchin inhriat tawn nante, rawngbawlna report tarlan nan te leh thalaite tana thu bengvar thlak tak tak inhrilh hriat nan te hman a ni thin a. TKP te rawngbawlna pawimawh tak a ni. Tun hnaiah hian Pathian malsawmna leh thawktute thahnemngaihna azarah kan semchhuah zat pawh a pung nasa ve hle a ni

Inchhiarna : (Src: MTKP Statistics 2015-2016)

Mizoram Thalai Kristian Pawl hnuaiah hian Pastor bial 80-ah Unit 402 awmin, Member hmeichhia – 15474 leh mipa – 26147 niin an zavaiin member 41621 an ni. 2015-2016 chhungin dan puitlinga nupui pasal nei tuak 319 an awm a, Dante-a nupui pasal nei tuak 271 an awm bawk.

 

 

Posted in BCM News.

admin