TKP Day : July 30

Karleh Thawhtanni, July 30, 2018 hi Thalai Kristian pawl (TKP) din champha vawi 67-na a ni a. Hemi ni hi Mizoram pumah TKP member ten urhsun takin an hmang leh dawn a ni. Kumin TKP Day thupui “Pathian chung lam koh chhan” (Philippi 3:14)  tih a ni ang.  TKP Day hi Inkhawm Programme hi Unit tinah siam a ni ang a. Inkhawm thawhlawm hi Bial kaltlangin MTKP Hqrs.-ah thehluh tur a ni. Inkhawm-ah hian Tawngtai Rual a awm ang a, tawngtai thupui chu a hnuaia tarlan ang hi a ni ang:-

Tawngtairual thupui:

  • Thalai Kristian Pâwl min din avângin Pathian hnênah lâwmthu sawi ila. He pâwl lo dinna tûra Pathian hmanrua mithahnemngaite avânga lâwmthu sawiin TKP bul tantu la damte tân i tawngtaisak ang u (la damte hming leh an chanchin hi hruaitute atangin ngaihven ni se).

  • Hmun hrang hranga TKP member zawng zawngte tân Pathian malsâwmna dîlsak ila; MTKP, Pastor Bial leh Unit hrang hranga TKP hruaitute tân i tawngtai ang u.

  • Mizoram TKP hmalâkna leh rawngbâwlna hmachhawpte Pathian kutah hlânin a hlawhtlinna i dîl ang u (Hmalâkna leh hmachhawpte hi hruaitu lam atangin puan chhuah ni se).

  • TKP hi Krista leh Kohhran tân kutke tangkai a nih zêl theih nân Pathian tanpuina dîl ila. Chutiang tûrin mahni ngei pawh i inhlân thar ang u.

………………………..

Inchhiarna : (Src: BCM Statistics 2017-2018)

Mizoram Thalai Kristian Pawl hnuaiah hian Pastor bial 84-ah Unit 484 awmin, Member hmeichhia – 17711 leh mipa – 28444 niin an zavaiin member 46145 an ni. 2017-2018 chhungin dan puitlinga nupui pasal nei tuak 629 an awm a, Dante-a nupui pasal nei tuak 358 an awm bawk.

………………

TKP  Tobul

Kohhrana thalaite puala rawngbawlna huang hran siam tura uluk leh fimkhur taka an ngaihtuah hnuah, July 30, 1951-khan Serkawn-a thalai rualte leh kohhran upate chuan kan Zosap Missionary-te kaihhruaina hnuaiah Thalai Kristian Pawl hi an lo din a. Hruaitu hmasa te chu President – Pu Lungruala; Vice President – Pu Vanlalkunga; General Secretary – Pu K. Lalliana; Treasurer – Pu T. Ropianga; Senior Adviser – 1) Rev.H.S.Luaia; 2) Upa.C.Saizawna; 3) Zomawia Nu (Mrs FJ.Raper) 4) Pu Lalmama te an ni. Executive Committee members Nl. Rothuami; Pu Hrangthanga; Pu Lalsawma; Pu Remkunga leh Pu Thanghmuna te an ni. Thalai Pawl din hi Presbytery (tunah Assembly)-in a lo phalsak tawh avangin 1952 Presbytery inkhawmpui (Pukpui) chuan Thalai Kristian Pawl lo ding ta chu a pawmpui nghal a. TKP hi Presbytery hian Biala din phalna a pek nghal bawk avangin bial hrang hrangah pawh TKP hi din nghal a ni.

Hetih lai hian Mizoram hi Assam state chhunga district pakhat mai a nih avangin TKP inkhaikhawmna pawh District TKP tih a ni a. District TKP inkhawmpui hmasa ber pawh 1955 khan Pukpui-ah neih a ni. Hun rei tak chhung chu TKP Day atan hian District TKP inkhawmpui hmasa bera (1955)-a ni hmasa zawk, October 22 chu hman a ni thin a. Amaherawh chu he ni hi dik tawk lova hriatna a awm avangin MTKP Rorelna chuan vawi hnih/thum lai a ngaihtuah hnuin 1995 MTKP Rorelna (Sethlun) chuan Kohhran hruaitute leh kan missionary-te kaihhruaina hnuaia Serkawna TKP an din ni, July 30 hi TKP Day-ah hman ni tawh se a ti a, chu chu BCM General Committee pawhin a pawmpuiin 1997 atangin TKP Day hi July 30-ah hman a lo ni ta a ni.

Related links:  1. TKP tobul leh rawngbawlna chanchin     2. TKP History(Eng)

……………………

TKP Day Thuchah

PATHIAN CHUNG LAM KOH CHHAN (Phil 3:12-14)

– Rev. Lianchhûnga Khiangte

Chhiartu zawng zawngte, TKP Day chibai u le!  Kumin kan Day thupui chu, “Pathian chung lam koh chhan” tih a ni a, kan châng thlan ber chu Philippi 3:12-14 thu hi a ni. Ringtute hi Pathian mite kan ni a, mi chuangtlai tumah kan awm lo. A mi malin min hmangaih a, thihchilh khawp hiala a hmangaihte theuh kan ni. Chutichuan, kan lo pianthar hian Pathian fate kan ni a, Pathian chuan Krista avâng chuan kan nunah thil tum a nei thîn a ni. Chu chu Tirhkoh Paula chuan, ‘Krista mi man chhan’ tiin a lo sawi a, a chhunzawm zêlnaah, ‘Krista Isuaa Pathian chung lam koh chhan’ ti tein a sawi bawk a. Damaska khaw daia Isua’n min man ni atang khan (tûn lai tawngin, khami tuma ka pian thar ni atang khân) ka nunah hian Pathianin thil tum a nei a. Chu Pathian min kohna chu chhâng a, a duhna hmun leh a duh dân ang taka ka awm ngei theih nân ka bei tâlh tâlh a ni, a ti a nih chu.

Vawiinah hian kan zain hei hi i chhinchhiah ang u. Chhan neia tlan i ni a, Pathian tân i hlu a ni. Khawvêlah hian rawngbâwltu hming tha leh langsâr bîkte zawng an awm ngei e. Nimahsela chûng mite ai chuan Pathian mitah i tê chuang lo va. Pathian duh dân anga i nun, i hun leh i neihte i hlân zêl thîn a nih phawt chuan chung lam malsâwmna tinrêngin a hmuak mawlh ang che. A pawimawh ber chu, a kohna phûa awm hi a ni a. Kan mihring tisa duhzâwngte tihluma Pathian duh dân tung nungin, Thlarau Thianghlim zai ngaia kan kal a ngai a ni.

A nih loh leh, kan ûm ber tûr, chu Pathian kohna chu eng ang ti tûr leh engti anga awm tûra kohna nge ni ang le? Kan Baibulah chuan, Chanchin Tha Johana ziak 10:10-naah Lal Isua’n khawvêl a lo kal chhan a puang chhuak a, ‘Kei zawng nun an neih nân, tam taka an neih nân lo kal ka ni’ tiin. ‘Nun an neih nân.. coma (,) tam taka an neih nân’ a ti kher kher a ni. Isua Krista hian nun min pe satliah mai lovin” ‘nun tam’ min pe a nih chu. Chu ngei chu leia a lo kal chhan niin a sawi lehnghâl! Engnge a awmzia ni ta ang le?

He laia nun tam tih hi Greek tawngin Perissos an ti a. A ngial a ngana sawi dâwn chuan, ‘hnianghnâr, hman sên rual loh’ tihna a ni mai ang chu. Amaherawhchu, he thuin a kawh ber chu, a tam lam (quantity) ni lovin a that lam (quality) a ni a. Chuvângin, nun bi kim, tha tluantling tiin sawi ila a fuh ber ang. Chutiangin Sâp tawng Bible lehlin tam berah chuan, ‘Abundant life’ emaw ‘Life in fullness/Life to the fullest’ ti tein an dah hlawm a ni. Engpawhnise, mihring nun, famkim lo, sual leh chhiatnain a bawm reng mai hi Isuan a pêk tûr nun a neih hun chuan ‘nun famkim’ a lo ni tawh ang. Nun an neih nân, a bi kim, a tluantlinga an neih nân ka lo kal a ni, a ti a nih chu.

Pathian leh a Kohhranhote duhsaknain tûn kum 15 kal ta chhûng hi Mizoramah kum rual (Age Group) hrang hrangte zîngah rawngbâwlin hun ka han hmang kual ve a. Thil pakhat veiawm êm êm-a ka hriat chu kan rilru puthmang hniam lutuk hi a ni. Chu chu thlarau lam nunah ka tihna a ni e. Hei hi helhkam lian bera ka neih pakhat chu a ni – Mizo Kristiante hi kan rilru puthmang a hniam lutukin ka hria a ni. Chumi lan chianna pakhat nia ka hriat fo chu, Mizoramah zu khapna chungchânga dân siam that a nih dâwn lai khân a ni a – MLTP Act atanga MLPC Act-a kan tlâk thlâk dawn lai, kum 2014 vêl kha a ni. Ngaihdân leh duh dân a inang lova. Kawng hrang hrangin – TV leh chanchinbuah te, social media chi hrang hrangahte kan inhnial luai luai mai a nih kha; tin, hmaichhana lo inchapchâr tâwk lah bo lo. Khatih laia zu thlah zalên sawi mawituten an tanfung lâr tak pakhat chu – Zu hi sual a ni lo, zu in mi Kristian hnam dang zîngah an awm teuh va, Vân ram an kai awm tho si a! tih kha a ni.

Vawiinah hian zu hi sual a ni em tih emaw, zu in mi ringtu Vân ram an kai ang em tih vêl mai mai buaipuia inkhâp kual tûr hi kan ni lo asin! Kan Pathian hian a sâng thei ang bera min chawi chhuah a tum tlat a (Phil. 4:8). Khawvêl êng ni tûrin Kristaah chuan min hring a; keini Zofâ Kristiante lah chu a hniam thei ang berah thlâwkin Hremhmun ka tlâkpui tûr a nih loh chuan tiin a chhia leh tawp zawng zawng kan fawm khâwm a. Kristian thlâwk hniam lutuk – Kristian bawkvâk – A tlengin kan tleng lo chauh a nih hi!

Tum khat chu, tlâng lâwn zirna sikul, Mountaineering Institute pakhatah hian zirlai zir chhuakte tirhchhuah inkhâwm hun an hmang a. An zirtîrtu lû ber, Chief Instructor chuan thlahna thuchah (valedictory address) sawiin he thu hi a chah a ni:

“Tlâng in lâwn rêng rêngin a hlauhawm lai ber chu a laihâwla in awm lai hi a ni dâwn a. Hnuai lam in en a, in lâwn chhuah tawh khâm râng sâng tak leh ruam thim ruih mai in zu hmu a, a thaw vuih mai a. Chung lam in thlîr chhoh lahin in hmabâk khâm tohlâwt ko bûr mai leh a chhîpa vûr khâwn vâr vo mai in hmu a, huphurhawm tak a la ni. Chutah tak chuan tlâng lâwn mi tam tak zâmin an tâlbuai thîn a ni. Thenkhatin lâwn chhunzawm ngam lovin an beidawnsan a, thenkhat phei chu an chesual hial a ni. Chutiang dinhmuna in din hun chuan in rilru siam ula, hei hi vawng reng ang che u – In lâwn chhuah tawh hnuai lama tlâk in hlauhna chuan lâwn chhunzawm zêl tûrin nawr kal che u suh sela, tlâng chhîp vâr vo maia hnehna puan zâr in chhun bur hun tûr beiseina chuan hnûk kal zâwk che u rawh se,” tiin. A tawi zâwngin, ‘Hnuai lama tlâk in hlauh avângin tlâng lâwn suh ula, chung lam beiseina avângin lâwn zêl zâwk ang che u, chutichuan, hlawhtling takin in lâwn chhuak thei ang’ a ti a ni.

Ringtu nun pawh hi chuti tho chu a ni. Hremhmun tlâk hlauhna avâng maia Kristian kan nih chuan, hei hi ti ila Vân ram ka kai tho vang a ? Hei pawh hi ti ve ila Hremhmun ka tla chuang lo vang a ? tiin Pathian leh mihring mithmuh pawha thil tha lo leh bawlhhlawh tam tak kan zak zeh ang a, Kristian, Pathian tâna êng chhuah lo, chutih ahneha khawvêl hmaa kan Lalpa ti hmai bâltu kan ni hlauhvang tih a hlauhawm a ni. Chutiang tûr a ni lo ve. Kohna kan dawn hi a ropui a. Lei leh Vân Lalberin nang leh keia nunah thiltum, min man chhan a nei a ni a. Khawngaihna a ni. Chu kohna chu Paula chuan “kohna sâng’ ti te, ‘kohna thianghlim’ ti tein a lo sawi a ni (Phil 3:14; II Tim 1:9). A kohna hum luahzo ngei tûra thahnemngai taka beih hi kan tihmâkmawh a ni. Kan tehfung tûr pawh ‘Pathian chung lam koh chhan lâwmman’ hmu pha khawpin he thlarau lam intlânsiakna hi ka bei em tih a ni tûr a ni.

Kan thuziak tlângkawm nân chuan, Pathian hian hremhmun boralna ata min chhandam a, Vân rama min hlân kai tawrh ringawt hi a hmangaih mihringte tâna a thil tum a ni lo. A thianghlimna tâwmpui tûrin khawngaihnain min ko va. Kristian tha mi, a tha ber mi ni tûrin Kristaah chuan min hring a ni. Chuvângin Nunna Lekhabûa kan hming a chuang hi lungawipuia inkuangkuah mai tûr kan ni lo ve. ‘Kristianna hi Meidîl pehhêlna sakhua mai a ni lo va, Kristiante hi Hremhmun hlau tlân khâwm mai lah kan ni nahek lo’; Lal kan nei a, chu kan Lal chuan he khawvêl thim zîngah êng atân min tîr a ni. Thlarau, rilru, taksa – kawng tinrênga thianghlimna chu ni tin i ûm zêl ang u.