TKP Day : July 30

Karleh Thawhlehni, July 30, 2019 hi Thalai Kristian Pawl (TKP) din champha vawi 68-na a ni a. Hemi ni hi Mizoram pumah TKP member ten urhsun takin an hmang leh dawn a ni. Kumin TKP Day thupui chu “Ka chakna Lalpa”  tih a ni ang.  TKP Day Inkhawm Programme hi Unit tinah siam a ni ang a. Inkhawm thawhlawm hi Bial kaltlangin MTKP -ah thehluh tur a ni.

TKP Day- hi Pathianni a nih loh chuan Unit tam zawk chuan zingkarah Social Work thawkin vantlang hmun leh Biak In leh a chhehvel te hnatlangin an tifai a, Unit thenkhat chuan awmni khamin chhun lamah intihhlimna leh inelna thianghlim neiin TKP Day an lawm thin a, Zan lam Inkhawm hunah MTKP atanga programme duansa angin Unit tinah hun hman a ni thin. MTKP hrautite pawh Unit hrang hrangah insem darhin hun an hmanpui thin a ni.

Kan hriat theih chinah hetiang hian MTKP hruaitu ten hun an hmang ang:_

1.  Nl Zothangtluangi Khiangte (Fin.Secretary) Zion Unit Lunglei-ah
2. Pu Issac Laldawngliana (ECM) Immanuel Unit, Aizâwl-ah
3. Pu C.Lalnunthara. (ECM) Aizâwl West Unit-ah
4. Pu K.Lalawmpuia.(Asst.  Secretary) Lunglawn Unit-ah
5. Pu V.Rokhawlkima (Vice President) Lunglawn East Unit-ah
6. Upa P.C. Vanlalrova (Sr. Adviser) Shaloam Unit, Lunglawn-ah
7. Rev.Vanlalmuankima (President) Chanmari Unit, Lunglei-ah
8. Rev.K.Lalbiakenga (Organiser) Trinity Unit, Zobâwk-ah

 

TKP  Tobul

Kohhrana thalaite puala rawngbawlna huang hran siam tura uluk leh fimkhur taka an ngaihtuah hnuah, July 30, 1951-khan Serkawn-a thalai rualte leh kohhran upate chuan kan Zosap Missionary-te kaihhruaina hnuaiah Thalai Kristian Pawl hi an lo din a. Hruaitu hmasa te chu President – Pu Lungruala; Vice President – Pu Vanlalkunga; General Secretary – Pu K. Lalliana; Treasurer – Pu T. Ropianga; Senior Adviser – 1) Rev.H.S.Luaia; 2) Upa.C.Saizawna; 3) Zomawia Nu (Mrs FJ.Raper) 4) Pu Lalmama te an ni. Executive Committee members Nl. Rothuami; Pu Hrangthanga; Pu Lalsawma; Pu Remkunga leh Pu Thanghmuna te an ni. Thalai Pawl din hi Presbytery (tunah Assembly)-in a lo phalsak tawh avangin 1952 Presbytery inkhawmpui (Pukpui) chuan Thalai Kristian Pawl lo ding ta chu a pawmpui nghal a. TKP hi Presbytery hian Biala din phalna a pek nghal bawk avangin bial hrang hrangah pawh TKP hi din nghal a ni.

Hetih lai hian Mizoram hi Assam state chhunga district pakhat mai a nih avangin TKP inkhaikhawmna pawh District TKP tih a ni a. District TKP inkhawmpui hmasa ber pawh 1955 khan Pukpui-ah neih a ni. Hun rei tak chhung chu TKP Day atan hian District TKP inkhawmpui hmasa bera (1955)-a ni hmasa zawk, October 22 chu hman a ni thin a. Amaherawh chu he ni hi dik tawk lova hriatna a awm avangin MTKP Rorelna chuan vawi hnih/thum lai a ngaihtuah hnuin 1995 MTKP Rorelna (Sethlun) chuan Kohhran hruaitute leh kan missionary-te kaihhruaina hnuaia Serkawna TKP an din ni, July 30 hi TKP Day-ah hman ni tawh se a ti a, chu chu BCM General Committee pawhin a pawmpuiin 1997 atangin TKP Day hi July 30-ah hman a lo ni ta a ni.

Related links:  1. TKP tobul leh rawngbawlna chanchin     2. TKP History(Eng)

……………………

 

Posted in BCM News.

admin