TKP Day vawi 69-na hman a ni.

July 30, 2020 (Ningani) kha Thalai Kristian Pawl (TKP) din champha vawi 69-na a ni a. Kumin TKP Day thupui chu “Lalpa hman tlak” II Tim. 2:21 a ni.  

TKP Day hi kum tinin member ten urhsun takin an hmang thin a.  Unit tam zawk chuan zingkarah Social Service thawkin vantlang hmun leh Biak In leh a chhehvel te an tifai a, chhun lamah awmni khama intihhlimna leh inelna thianghlim neiin, zan lamah MTKP atanga programme duansa angin Unit tinah TKP Day lawman Inkhawm urhsun takin an nei thin a ni. MTKP hruaitute pawh Bial leh Unit hrang hrang-ah TKP Day hmanpuiin an feh chhuak thin a ni.

Kuminah erawh chuan Covid-19 hrileng laka mipuite kan himna atan Sawrkarin inkhuahkhirhna dan a siam avangin a huhova punkhawm leh hnatlang thawh te, Inkhawm leh infiamna lam te a tih theih ta lo a. Hemi avang hian MTKP Executive Committee Meeting chuan TKP Day 2020 hi Mizoram hmun hrang hrang leh Mizoram pawna TKP member ten TV leh Youtube kaltlanga an lo hman theihna turin Programme buatsaih ni se tiin a a rel a. TKP Day Programme hi buatsaih leh ruahman a lo ni ta a ni. He Programme hi TV leh Youtube kaltlangin TKP Day July ni 30 (Ningani), zan dar 8:00-ah hman a ni a, Youtube lamah BCM leh MTKP Channel-ah pek chhuah a ni bawk.

Hetihlai hian Sawrkar-in inkhuahkhirhna a siam bawhchhe lo leh SOP zawm chungin Unit engemawzat chuan Biak In leh a vel tifaiin zingkarah an hnatlang a ni. Kan hriat theih chinah TKP dinna hmun Serkawn Unit chuan Biak In leh a vel tifaiin an hnatlang a, TKP Bethel Unit, Venghlun Lunglei ten Biak In leh a vel tihfai hnathlang an thawk a. Luangmual Unit, Aizawl, Cherhlun Bial, Changpui Unit leh Farkawn unit te chuan khawlai tifaiin hnatlang an nei a, TKP Hnahthial ‘S’ Pastor Bial ten tawngtaina tlang tihfai hna an thawk bawk. Hetihlai hian Saron Unit, Aizawlleh Phunchawng unit te chuan TKP Day denchhenin damlo mamawhte tan voluntary Blood donation an nei bawk.

TKP Day ah hian, Dr.V.Tetseo, General Secretary APBF chuan “ TKP member zawng zawng te tun ang hun harsa kan ram leh khawvelin a tawn mek lai pawh hian in dinchhan ang takin Krista leh Kohhran Tan ti a hmalam pana Khawtlang leh kohhran tana nghet taka ding zel turin duhsakna ka hlan a che u” tiin chibai bukna leh duhsakna a hlan a ni.

Kohhrana thalaite puala rawngbawlna huang zauh tur hian uluk leh fimkhur taka an ngaihtuah hnuah, July 30, 1951-khan Serkawn-a thalai rualte leh kohhran upate chuan Zosap Missionary-te kaihhruaina hnuaiah ‘Krista leh Kohhran tan” tih thupui-a hmangin Thalai Kristian Pawl(TKP) hi din a ni a. MTKP Organiser report-in a tarlan danin –TKP te hi Pastor Bial 85 -ah TKP Unit 427 an awm a. TKP member Hmeichhia – 18,050/- leh Mipa 28,944/- an vaiin 46,994/- an awm mek a ni.