TKP Ramthim Ni hmang dawn

Vawiin, May 29, 2019 (Nilaini)hi Mizoram Baptist Kohhran Ni pawimawh (Special Day) “TKP Ramthim Ni”a ni a. TKP Unit hrang hrangah urhsun takin hman a ni ang. Kumina TKP Ramthim Ni thupui-ah “Krista thuhretu rinawm” (Tirhkohte 1:8) tih thu  hman a ni ang. Unit TKP ten an ruahman dan angin chhun lam-ah emaw, zan lamah emaw  remchang an tih angin hemi pual inkhawm programme hi an siam ang.

Kumin TKP Ramthim Ni-ah hian MTKP Hruaitute leh BCM hruaitu thenkhat te pawh chanvo neiin Unitn hrang hrangah hun an hmang  dawn a ni.

TKP Organiser report- February, 2019-in a tarlan danin  Pastor bial 85-ah TKP Unit 420 an awn a, TKP member 43,353 awmin, Mipa 27,210 leh Hmeichhia 16,143 an ni.

…………………….

TKP Ramthim Ni lo chhuah dan

TKP hian din a nih tirh atangin Ramthim veina lian tak a neih avangin Ramthim rawngbawlna lamah pawh hma a la hma hle a. District TKP Inkhawmpui hmasa ber, Oct 21-23, 1955 (Pukpui)-ah chuan Agenda “TKP hminga Thuhriltu tirh” tih hi ngaihtuah a ni. Inkhawmpui vawi hnihna 1956 (Hnahchang)-ah pawh “Tuikuk Takam pual bik neih” tih rel a ni leh a. Mahni remchan angin Tuikuk-Takam pual hian hun an lo hmang thin a, thawhlawm an lakkhawm pawh Ramthim puala hman atan Headquarters-ah chhunluh thin a ni.

1959-ah chuan ‘District TKP Tuikuk-Takam Ni’ atan October 5 (Thawhtan ni) hman nise tih a ni a, 1960-ah chuan September thla Thawhtan ni hnuhnung ber hman nise tiin a rel leh a, chumi kum chuan September thla thawhtan ni hnuhnung ber chu September 26 a ni. September 26 hi hun rei tak chhung chu Ramthim pual atan hman zui a ni ta a ni. “Tuikuk-Takam Ni” tih chu huap zim deuhva hriat a nih avangin 1969-ah chuan ‘Ramthim ni’ tiin thlak a ni.

Amaherawh chu September thla hi Beirual thla a nih avangin TKP tana Ramthim ni hman hi a remchang tawk lo deuh thin a. Kum 2006 MTKP (S.Vanlaiphai) Rorelna chuan  May thlaah sawn nise tiin a rel a. MTKP Executive Committee chuan bawhzuiin BCM-in ram pawna missionary a tirh chhuah hmasak ber, Rev.H. Rokhama-te nupa tirh chhuah ni, May 29, 1968 denchhenin May 29 hi TKP Ramthimni atan a ruat fel ta a. 2007 atang chuan TKP Ramthim Ni hi May 29-ah hman a ni ta a ni. TKP Ramthim Ni-ah hian inkhawm buatsaihin, thawhlawm pawh Headquarters-ah lutin Mission rawngbawlna atan hman thin a ni.

 

Posted in BCM News.

admin