TKP Ramthim Ni – May 29

May 29, 2019 (Zirtawpni)hi Mizoram Baptist Kohhran Ni pawimawh (Special Day) “TKP Ramthim Ni”a ni a. TKP Unit hrang hrangah urhsun takin hman a ni ang. Kumina TKP Ramthim Ni thupui-ah “Hrehawm mi tuarpui rawh” (11 Timothea 2:3) tih thu  thlan a ni.

Kum dangah chuan TKP Ramthim Ni-ah hian MTKP atanga ruahmanna an siam zul zuiin inkhawm leh tawngtai programme te siamin urhsun takin hun an hmang thin a, Mission rawngbawlna lama Thalaite cho thar leh nan te, Missionary te puala tawngtai leh Tawngtai tlaivar programme te thin a ni bawk.

Kuminah erawh chuan Covid-19 hri leng avangin rampumah a huhova thiltih leh punkhawm khap a ni a. Kohhran te pawh hun rei tak Biak Inah inkhawm leh thil tih ho a rem loh avangin TKP Ramthim Ni programme siam pawh a rem dawn ta lo a. Amaherawhchu, TKP Ramthim Ni pual hian Communications Department chuan Mizoram pawna Missionary kal hmasa ber leh hun rei tak Rahbha hnam zing a thawk, Rev. H. Rokhamate nupa kawmna neiin TV leh Youtube-a tih chhuah turin a buatsaih a, Kohhran mi ten he programme hi lo thlir theuh turin kan sawm che u a ni.

Kumin TKP Ramthim Ni-ah hian tawngtai subject siam a ni a, Inkhawm leh programme dang hmang thei lo te pawhin he tawngtai thupui hmang hian mahni renchan ang zel a TKP Ramthim Ni puala tawngtaina hmang theuh turin TKP member te leh Kohhran mite kan in chah a ni.

Tawngtai rual thupui :

1) Khawvel hmun hrang hranga Isua Krista chanchin la hre loten an lo hriat theih nan.

2) Mission pawl hrang hrangten an hnathawhnaah Pathian hruaina leh awmpuina an chan theih nan.

3) Chanchin Tha avanga hrehawm leh tihduhdahna tuar mekte tan.

4) BCM mission department a thawktu zawng zawngte leh an chhungte theuh tan tawngtaisak ila. Kan Missionary zawng zawng ten Thlarau Thianghlim thiltihtheihna hmanga rawng an bawl theih nan i dilsak ang u.

5) Kan mission field hrang hranga ringthar leh kohhrante tan tawngtai sak ila, kohhran nghet leh mi dangte vei kohhran an nih theih nan.

6) Kan TKP member pui Lal Isua la neilo ten, an lo neih ve theih nana Pathian hmanrua ni turin mahni i inhlan thar theuh ang u.

TKP Ramthim Ni lo chhuah dan :

TKP hian din a nih tirh atangin Ramthim veina lian tak a neih avangin Ramthim rawngbawlna lamah pawh hma a la hma hle a. District TKP Inkhawmpui hmasa ber, Oct 21-23, 1955 (Pukpui)-ah chuan Agenda “TKP hminga Thuhriltu tirh” tih hi ngaihtuah a ni. Inkhawmpui vawi hnihna 1956 (Hnahchang)-ah pawh “Tuikuk Takam pual bik neih” tih rel a ni leh a. Mahni remchan angin Tuikuk-Takam pual hian hun an lo hmang thin a, thawhlawm an lakkhawm pawh Ramthim puala hman atan Headquarters-ah chhunluh thin a ni.

1959-ah chuan ‘District TKP Tuikuk-Takam Ni’ atan October 5 (Thawhtan ni) hman nise tih a ni a, 1960-ah chuan September thla Thawhtan ni hnuhnung ber hman nise tiin a rel leh a, chumi kum chuan September thla thawhtan ni hnuhnung ber chu September 26 a ni. September 26 hi hun rei tak chhung chu Ramthim pual atan hman zui a ni ta a ni. “Tuikuk-Takam Ni” tih chu huap zim deuhva hriat a nih avangin 1969-ah chuan ‘Ramthim ni’ tiin thlak a ni.

Amaherawh chu September thla hi Beirual thla a nih avangin TKP tana Ramthim ni hman hi a remchang tawk lo deuh thin a. Kum 2006 MTKP (S.Vanlaiphai) Rorelna chuan  May thlaah sawn nise tiin a rel a. MTKP Executive Committee chuan bawhzuiin BCM-in ram pawna missionary a tirh chhuah hmasak ber, Rev.H. Rokhama-te nupa tirh chhuah ni, May 29, 1968 denchhenin May 29 hi TKP Ramthimni atan a ruat fel ta a. 2007 atang chuan TKP Ramthim Ni hi May 29-ah hman a ni ta a ni. TKP Ramthim Ni-ah hian inkhawm buatsaihin, thawhlawm pawh Headquarters-ah lutin Mission rawngbawlna atan hman thin a ni.