TLM, Lawngtlai Chapter Promoters Meet 2022 buatsaih a ni

May ni 29, 2022 (Pathianni) khan The Leprosy Mission (TLM), Lawngtlai Chapter Promoters Meet 2022 chu Lawngtlaiah buatsaih a ni a. Aizawl atangin TLM Mizorama Executive Secretary Rev. TC Zodinsanga’n he Meet hi a hmanpui a ni.

Meet hi Pathianni zing Pathian biak inkhawm, Pathianni chawhnu seminar leh Pathianni zan Pathian biak inkhawm hun te hmanga neih a ni a. Pathianni zing inkhawm hun hi BCM Biak In, Electric Veng, Lawngtlaiah neih a ni a, Pathianni chawhnu ah BCM Bazar Lawngtlai Gospel Centenary Hall-ah TLM Lawngtlai Chapter hnuaia Bial leh Tualchhung Kohhran TLM Promoter-te, Chapter office bearer-te leh executive committee member-te tan seminar buatsaih a ni.

Pathianni Zan Inkhawm hun BCM Biak In, Bazar, Lawngtlaiah neih a ni bawk. Inkhawm ah hian Rev. TC Zodinsanga, Executive Secretary, TLM Mizoram hnen atanga Pathianthu ngaihthlak thin a nih bak ah, Pathianni chawhnu Seminar ah pawh amah tho hi resource person atana hman niin,  TLM rawngbawlna kawnga thil pawimawh hrang hrang zir hona neih a ni bawk.

TLM Promoters’ Meet neih chhung hian Lawngtlai area Baptist Zaipawl, LIKBK AOC Pastor Bial Zaipawl, BCM Electric Veng Kohhran Zaipawl, Nl. Jennifer Lalruatkimi, College Veng, Lawngtlai leh Nl. Ruth Lalremruati Jongte, Lungmual, Aizawl te’n fak hla sa a rawngbawlna an nei a ni.

TLM kal tlanga India rama phar zinga rawngbawlnaah hian Baptist Church of Mizoram, Lairam Isua Krista Baptist Kohhran, Isua Krista Kohhran (Bualpui NG) leh The Salvation Army te thawk hovin, Lawngtlai Chapter hnuaiah hian Bial 11 an awm mek a ni.