Upa H. Lianchhungi, pensionin a chhuak dawn ta.

Upa H. Lianchhungi

Mizoram Baptist Kohhran huang chhunga Hmeichhe Theologian hmasa te zing a mi, Women Worker, Upa H. Lianchhungi, tuna, BCM Headquarters Office a Circulation Manager hna thawk mek chu December 31, 2020 khian Superannuation Pension-in a lo chhuak ve dawn ta a. December 17, 2020 (Ningani) chawhnu dar 1:00 khan BCM Hall, Serkawn-ah BCM Headquarters a thawktuten thlahna an nei.

Pi Chhungte-i thlahna Inkhawm hi Rbt. B. Singpari, Sunday School Promoter-in a kaihruai a, Rev. F. Ramdinmawia, General Secretary-in thlahna thuchah a sawi bakah amah Pi Chhungte-in thu a sawi bawk. Rev. R. Lalbiakliana, AGS-Service-in BCM aiawhin thilpek a hlan a, BCM Office Staff Welfare aiawhin ngaihhruihna thilpek hlan a ni bawk. Rev. R. Lalthangliana, Mission Coordinator-in Tawngtaisakna leh malsawmna-in thlahna programme a khar.

Upa H. Lianchhungi hi Mizoram Baptist Kohhran hnuaia Hmeichhe Theologian kan neih hmasakte zing ami niin, rawngbawlna kawng hrang hrang a chelhin kum 36 zet a thawk tawh  a.  Kum 1984-ah ETC (Eastern Theological College) Jorhat atangin B.Th. a zo va. May 8, 1984-ah BCM hnuaiah Women worker ah lak niin, 1984-1986-ah Home Mission – BBS Chawngte-ah a thawk a, Child Evangelism lamah thla 3 training a neih hnu-ah Sunday School Instructress hna 1986-1988 chhungin a thawk a, 1988-1991-ah MBKHP Secretary (Tuna Organiser kan tih tak) hi thawkin, 1991-1997 chhung khan Communications Department-ah Circulator Manager hna a  thawk leh a, 1997-2000 kumah Sunday School Instructress ah bawk awm lehin kum 2000-2004 khan BCM Archive enkawltu – Archivist hna te a thawk leh a, kum 2004 atangin Circulation Manager hna bawk thawk lehin a pension thlengin he hna hi a  thawk ta a ni.

Tunah hian a pasal, Upa Pc Lawmsanga leh a fate pathum nen Chanmari, Lungleiah awmin, Chanmari Kohhran-ah an nupa-in Kohhran Upa an ni mek a. An fate pawh puitling vek tawhin zirna lamah pawh an hlawhtling hle hlawm  a ni.