Upa T. Lalhmangaihzama (Asst. Account Officer, HATIM) kan then ta.

September 22, 2021 khan Mizoram Baptist Kohhran-a Assistant Account Officer, Upa T. Lalhmangaizama, HATIM a thawk mek chu Covid-19 vangin ZMC-ah boralin, chatuan ram min pan san ta. A ruang hi BCM Biak In, Falkawn-ah thlahna inkhawm neihpui a nih hnu in Lunglei pana phurh phei a ni a, a ruang alo thlen hian an chenna in Venglai, Lunglei ah lumen niin, a tuk, September 23, 2021 (Ningani) chhun dar 12:00 khan BCM Biak In Venglai-ah vui a ni.

Upa T. Lalhmangaihzama thlahna Inkhawm hi a chenna In, Venglaiah chawhma dar 10:30-ah neih a ni a. Upa C. Lianzova’n thlahna hun serh kaihruaiin amah sunna thu mihrang hrangin an sawi a. Chhun dar 12:00 ah Biak Inah Vui Inkhawm neih niin Upa C. Hrangzuala, Chairman, BCM Venglai-in inkhawm a kaihruai a. Tualchhung Kohhran aiawhin Upa LH Liandula, Asst. Secretary, BCM Venglai in thu sawi in, a nupui Pi R. Lalbiakdiki’n chhungkaw aiawhin thu a sawi a, BCM Headquarters aiawhin Rev. F. Ramdinmawia, General Secretary in thu a sawi bawk.

Upa H. Lalthangmawia leh Upa T. Lalhlimpuia ten pathian thu chhiarin, Rev. Vanlalmuankima, Bialtu Pastor, Bazar Bial-in vuina thuchah sawiin Rev. R. Lalbiakliana, AGS- Service in Malsawmna in Vuina inkhawm a ti tawp ta a ni. Biak in lama vuina inkhawm hman zawh hnu hian Venglai thlanmualah Rbt. J. Lalrinaliana’n tawngtainain Upa T. Lalhmangaihzama lei taksa chu a thlah liam ta a ni.

A CHANCHIN TLANGPUI:

Upa T. Lalhmangaihzama hi Pu T. Nghakliana leh Pi  Chhimtawni Khiangte te fa  6 zinga upa ber niin kum 1961 February 12 khan Christian Hospital Serkawn ah a piang a. A hming hi a pa in, Khawvel ah thil ah engmah chhuan tur an chhung hian nei lo mahse, Pathian Hmangaihna an chan hi an chhuan tur ber a ni tiin, a hla duh em em “Hming dang zawng ai in a mawi ber Lal Isu” tih a, a thunawn ami, ‘Lawmna par leh a hmangaihna zam velah’ tih lai atanga la chhuak in ‘LALHMANGAIHZAMA’ ti in a phuah a. A unau pianpui te chu an upat dan indawt in; 1) T. Lalvulliana, H. Lalawmpuii pasal, Venglai Lunglei, 2) T.Zonunmawia (L),  3) T. Lalduhawma, C. Lalmuankimi pasal, Armed veng south, Aizawl, 4) T. Lalhmingliana (L) leh 5) T. Zonunsanga, C. Lalneihthangi pasal, Venglai Lunglei te an ni.

Lalbiakdiki nen 1993, June 9-ah inneiin, fa pali – BS Dikpuia Tlau, Jacob Jacob Lalrinpuia,  Diana Lalremsiami leh  Ruth Lalremruati  te an nei a, vanduaithlak takin an fapa Jacob Lalrinpuia hian  kum 2019 khan chatuan ram a lo pan san tawh a ni.

Upa T. Lalhmangaihzama hi mi tlang tak, dik leh tha ni a a hriat chu khawi ah pawh, tu hma ah pawh ni se dinpui tlat mi a ni a. Tin, a hming phuah chhan ang tak hian- chhungkua, u leh nau, midang te hmangaihna leh khawngaihna te, mi dangte hriatthiamna te nei zau tak mi a ni a. Hetiang mize nei a nih avang hian mi dangte hmangaih pawh a hlawh hle a, Pathian khawngaihna pawh a nasa hle a ni.

Kum 1982 atanga 1985 thleng khan, Power & Electricity Department ah hna thawkin, hemi hnu pawh hian hna hrang hrang a thawk a, 1989-ah piang tharin heta tang hian rawngbawlna lamah ke pen chho tan ta a ni. 1990 leh 2000 inkar ah BCM Venglai TKP Unit ah hruaitu niin kum 7 chhung President, Secretary, Finance Secretary hna te a chelh a, MTKP Executive Committee Member ah pawh hun engemawchen a awm a ni.

Kum 2000 ah Pathian leh Kohhran hote duhsakna in Rawngbawltu ah thlan a ni a, kum 2009 ah Kohhran Upa atan thlan a ni leh a, 2010 Lunglei North ABC, BCM Moria, Rahsiveng ah Rev. B. Thangchina’n a nemnghet a ni. Bial leh Headquarters Committee peng hrang hrang ah nihna pawimawh tak tak chelh in a thihni thleng hian Tualchhung Kohhran Treasurer hna a chelh a ni.

Upa T. Lalhmangaihzama hi Kohhran-a a rawngbawlna hrang hrang bak ah hian Khawtlang rawngbawlna-ah thahnemngai leh in pe tlat mi a ni a, Venglai Branch YMA-ah hun rei tak President  leh Office bearers hna dang a chelh thin a, Sub.Hqrs. YMA ah pawh Executive committee member a lo ni tawh thin a ni.

Kum 1994, May 10-ah Mizoram Baptist Kohhran, Headquarters Office Serkawn-ah Account hna thawk turin a lut a. January 1, 1996-ah Asst.Account Officer atan dah ngheh niin, hun rei tak Headquarters Offiice, Serkawn ah he hna hi a thawk a. Kum 2001 April 6 ah Baptist Literature Service (BLS) Manager hna thawk turin dah a ni a. BCM-in HATIM a din khan sum lam enkawl turin Asst. Account Officer in HATIM-ah dah a ni leh a, April 1, 2010 atanga thawk in a hun tawp thlengin he hna hi a chelh ta a ni.

Kumin (2021) August 21  khan Covid-19 positive a ni tih hriat a ni a, Baptist Covid Care Centre, Ramzotlang, Serkawn ah admit a ni a, Thisen sang leh zunthlum nei a nih avang leh thawkna lamah harsatna te a neih chhoh tak avangin BCCC atang hian  August 31 khan  ZMC ah phurh phei a ni a. A tuk September 1, 2021 ah ZMC-ah admit nghal a ni a. Tha chho leh mai tura beisei a nih laiin,  hmasawn lam aiin a lo chau zual ta zel a,  Ventilator hmanga  enkawl a ni a. September 22, 2021 chawhnu dar 1:00 khan a rawng a lo bawl thin, Lalpa hnenah min lo haw san ta a ni. A ruang hi BCM Biak In, Falkawn-ah thlahna inkhawm neihpui a nih hnu in Lunglei pana phurh phei a ni a, an chenna in Venglai, Lunglei ah lumen niin, a tuk, September 23, 2021 (Ningani) chhun dar 12:00 khan BCM Biak In Venglai-ah vuiliam a ni.

Mizoram Baptist Kohhran chuan Upa T. Lalhmangaihzama hi a uiin a sun em em a, Thahnemngai taka rawng a lo bawlna te leh a thiamna leh inpekna te a zahin a ngaihlu em em a. A kalsan, a nupui fanaute leh a laichin zawng zawng te Pathianin Thlamuan in awmpui zel se tih hi kan tawngtaina a ni.