Weekend News

General Secretary-Lungsen-ah

General Secretary, Rev. F. Ramdinmawia chu vawiin, April 20, 2017 chawhnu hian Lungsen Pastor Bial kum 50-na (Golden Jubilee) hmanpui turin vawiin chawhnu hian  kal. General Secretary hian naktuk, Zirtawpni zing dar 7:00-ah Jubilee Lungphun a hawng ang a, Chawhma lamah Jubilee Prorgramme hmanpuiin chawhnu lamah Headquarters-ah a lo let leh ang a; zanin atanga tan tur Mizoram Baptist Federation (MBF) Conference, Zohnui-a neih turah a tel nghal ang. Pathianni zanah he Conference-ah hian thuchah a sawi ang.

Rev. R. Zohmingliana, AGS,  Aizawl lamah

Rev.R.Zohmingliana AGS i.c Service chu BP sang avangin April 9, 2017 khan Christian Hospital Serkawn-ah admit a ni a, Kohhran hote tawngtaipuina avangin hma a sawn ve zel a. Tunkar nilaini, April 18 khan damdawiin atanga chhuakin Aizawl lamah in check-up in a thang mek.

Tun mai (20.04.2017: 15:45) a Chanchin kan hriat thar berah chuan – MRI leh CT Scan Result te chhuakin a tukhum veilam-ah thisenzam chat a awm a, vanneihthlak takin pawi nasa zawk thlen hman lovin nunna atana hlauhawm chin a lo pel tawh niin Doctor ten an ngai a, taksa leh rilru chawlh hahdam leh BP control reng tura thurawn pek a ni. Tunkar chhung chu Aizawl-ah cham damin, karleh hun remchang hmasa-ah in lam-ah rawn haw an tum ang… Kohhran hoten i tawngtaipui zel ang u

Sundnay School Programme

#April 22-23, 2017 hian Bawngkawn pastor Bial chuan Bawngkawn Kohhran-ah Sunday School Seminar an buatsaih a, Resource Person-ah Christian Education Director – Rev. Pc Liandula leh Pu K. Lalmuanazuala, SS Trainer te an hmang ang.

#Hemi hun chhung vek hian Ramhluna Pastor Bial (Aizawl) pawhin Bial huap Sunday School Training BCM Ramhlunah an nei dawn a. Resourece Person-ah Pi H. Lalkimi SS Promoter hovin, Upa KMS Dawngliana leh Pu Lalmuanzuala te an kal ang.

KNP Inkhawmpui

Serkawn Pastor Bial KNP te chuan ni 21 – 23 April, 2017 chhung hian BCM Biak In,Serkawnah Inkhawmpui an hmang meka. Thupuiah “I piangthar tur a ni” tih hmangin Upa K.Lalnuntluanga Serkawn chu Speaker-ah hman a ni.

BMP Retreat/Seminar

Tunkar Inrinni, April 22, 2017 hian Lunglawn Pastor Bial BMP chuan Retreat / Seminar, Salem Kohhran, Lungleia an buatsaih dawn a. He Seminar-ah hian Rev. Lianchhunga Khiangte, MTKP Organiser chu Speaker / resource Person a ni ang.

Missionary-te nu, Pi Zamani ropuina ramah.

Pi Zamani (74) W/o Upa C. Lungmuana (L), Zemabawk chu hun engemawchen fapa, Pu C. Lalengkima (BCM A/V Worker) Serkawn hnena inenkawla a awm hnuin, April 19, 2017 zing dar 2:00 khan ropuina ramah min haw san ta. Hemi ni vek hian Aizawl-ah phurhphei niin ama chenna inah vui nghal a ni a, Zemabawk thlanmualah ropui taka thlahliam a ni.

Pi Zamani hi BCM President leh AGS lo ni tawh Rev. C. Ngurhnema unau nu nih bakah a fapa pali zinga pathum chu BCM hnuaiah hna pawimawh tak tak thawk an ni. Pu C. Lalnunsiama leh Pu C. Pachhunga te hi BCM Missionary (Substantive)ve ve an ni a, Pu C. Lalengkima hi BCM A/V Worker niin a nupui Maremi hi Christian Hospital Staff Nurse thawk lai mek a ni bawk. Tin, a fapa pakhat C. Hmingthanmawia chu Sipai niin ram leh hnam tan a fehchhuak ve thung a ni. Hetiang nu ropui leh chhuanawm, rawngbawlna ngaisang leh thawhhlawk em em Pi Zamani kan chan ta hi BCM tan pawh channa nasa tak a ni. A kalsan a tu leh fate kan tuarpui em em a, an rawngbawl naah Pathian hruaina an chan zel theih nan i tawngtaipui zel ang u.

Mission News:

# Kumin April thla chhung hian BCM Mission Field hrang hrangah ringthar baptisma chang mi 51 an awm.

# Arunachal Far East Field Director thar Rev.James Zorammawia chuan a awmna tur Roing tluang takin a thleng ta.Missionary awm insawn dangte pawhin an awmna tur an pan fel ta bawk.

# Tripuri Christian Fellowship Lungleichuan Easter Sunday khan Civil Hospital-te tlawhin ei tur tawngtaina te damlo hnenah an hlan.

Evangelism Programme

#Bethlehem Kohhran, Thenzawl-ah Gospel Camping neih mek a ni a, Speaker Upa C.Tlangmawia Mizoram for Christ Team-te hman an ni.

#Maubawk Kohhran chuan Camping chhawng lina an hmang mek zela, Chanchintha Chhuangtute Team-in an Speaker Upa K.Lalenga hovin rawng an bawl a ni.

#Aizawl Chanmari Kohhran chuan Rev. K. Lalnunsanga, Hnahthial ‘S’ Bialtu pastor Speaker-a hmangin April 21-23 chhung hian Agape Camping Cntre, Durtlang-ah Camping an nei dawn.

E.S Office Aizawl sawn.

Executive Secretary, Aizawl Office chu Baptist House chhuahsan a ngaih tak avangin sawn loh theih a ni ta lova. April 3, 2017 khan Baptist House Khatla a E.S Office chu chhuahsanin, tunah Baptist Centre Chanmari-ah sawn a ni ta a ni. A dawr mamawh te chuan Baptist Centre hi pan tur a ni e. BLS Bookshop leh Manager Office pawh Baptist Centre-ah hian sawn tum a ni a, tunah chuan hmunhma siam rem a la ngaih avangin Baptist House-ah hian bookshop chu an la hawng a, dawr duhte chuan a hmun ngaiah dawr theih a la ni.

Thisen unit 53 pe

TKP Lungsen Pastor bial in April 12, 2017(wed) khan Mahanaim Gospel Centenary Hall, Lungsen ah Christian Hospital Serkawn a mamawh apiang te hman turin Thisen Unit 53 an pe a, thisen pe tute hi Mipa -40 leh Hmeichhia -13 an ni. Christian Hospital Serkawn a thawk tuten Lungsen an an kal chilh a ni. TKP Lungsen Pastor hian Thisen hi tum 5 an pekna niin Lunglei district ah Church Base a thisen pe tha lawmman an lo dawng tawh a ni. Thisen pek hi zawng chhang thlak an ti hle a ni.

 

Posted in BCM News.

Leave a Reply

Your email address will not be published. Required fields are marked *