Weekend Programme

BCM Hqrs.Office

General Secretary Programme

BCM General Secretary, Rev. F. Ramdinmawia chu Kolkata-a BCM ram lei chungchang leh Serampore College tlawha a zin a lo haw pahin Aizawl-ah BCM thil tul hrang hrang te a buaipui nghal a, tunkar nilaini khan dam takin Headquarters, Serkawn a lo thleng leh ta. September 5 leh 6, 2019 khan Nomination Committee, Pay Commission leh Planning Commission 2020 Central Sector Meeting a nei leh nghal  bawk.

Zanin atanga tan tur Non-Mizo Kristian Inkhawmpui, Selem Biak In, Lungleiah Non-Mizo Kristian Hlabu a release ang a. Ruahman anga a kal theih chuan naktuk, Inrinni hian Lawngtlai-ah kalin Bial hruaitute nen Kohhran thil pawimawh leh tulah an inkawm ang a, Lawngtlai ‘S’ Pastor Quarters leimin avanga harsatna tawk mek a hmunah a enpui nghal ang.

 

AGS i/c Mission

Rev. Dr. C. Vanlaldika, AGS i/c Mission chu AICS-ah Lecture pe turin vawiin khan a chhuak a, naktuk Inrinni tlaiah a lo let leh nghal anga, Pathianni-ah Non-Mizo Inkhawmpui, Salem, Lunglei-a neih mek a hmanpui veleh nghal ang.

 

AGS i/c Service – BLP Staff Retreat-ah

Aizawl Area chhunga Baptist Literature Service hnuaia thawktute pualin BLP Staff Retreat September 5,2019 (Ningani) khan Baptist Centre, Chanmary Aizawl-ah neih a ni a, he hun hmanpui hian Rev. R. Lalbiakliana, AGS i/c Service and General manager, BLP leh Upa KMS Dawngliana, Literature Reader te an kal a. Aiawl Area-a BLS thawktu mi 12 an kal thei a, Programme tha tak an hmang.

 

Director, Social Concern:

Rev. Sangliankhuma Chinzah, Director, Social Concern Department chu September 8,2019 pathianni hmang hian Imanuel Hauruang-ah Social Concern Awareness neihpui turin a kal dawn a, Tunlai Issue hrang hrang, Zu, ruihhlo, HIV/Aids chungchanga Kohhran hote hmalak dan tur a ziritir dawn a ni.

 

Mission Coordinator-

Rev.R. Lalthangliana, Mission Coordinator chu tun weekend hmang hian Ralvawng Kohhran-ah Mission Convention neihpui turin vawiin khan a chhuak a, zanin atangin Convention hi an tan ang a, Pathianni zan thleng hun an hmang ang.

 

KNP Leadership Training

Tunkar Inrinni leh Pathianni hmang hian Lawngtlai Town Pastor Bial pathum, Lawngtlai South, Lawngtlai East leh Lawngtlai West Pastor Bial huapin KNP Leadership Training, BCM Biak In, Electric, Lawngtlai-ah neih a ni dawn a. He hunah hian Headquarters atangin Pi PS Lalhmingthangi, KNP Promoter leh Pi F. Lalengmawii-resource person te an kal ang. Inrinni nilengin KNP hruaitu pualin Seminar neih a ni ang a, Inrinni zan, Pathianni zing leh Pathianni zanah te Lawngtlai khaw chhunga Kohhran hrang hrangah insemin hun an hmanpui nghal ang. Hetiang Programme tho hi kan hnung kar Inrinni, August 31,2019 khan Hnahthil khawpui chhung KNP hruaitute pualin an lo nei tawh a ni.

 

Non-Mizo Kristian Inkhawmpui-vawi 32-na, zanin atangin

BCM Biak In, Salem Lunglei

Baptist Masihi Sangati (Non Mizo Kristian)  Inkhawmpui vawi 32-na chu zanin, September 6, 2019 atang hian Mizoram Baptist Kohhran Biak in, Salem, Lunglei-ah neih a ni dawn a. Thupui atan ‘Pathian Hmangaihna’ tih a niin, Speaker-ah Rev. B. Zirsangliana, Director, Non-Mizo Mission  an hmang ang. He Inkhawmpui hian Pathianni zan thleng a awh dawn a ni.

Posted in Uncategorized.

admin

Leave a Reply