May 22, 2024(Nilaini) khan Mizoram Ṭhalai Kristian Pawl Executive Committee Meeting Vawi 547 (13 of 2022-2025) chu BCM Kikawn Committee Hall-ah tluang taka neih a ni a, Upa R. Lalrochama, President MṬKP –in meeting kaihruaiin, MṬKP Secretary Rev. F.Zorinkhuma'n MṬKP hmalakna hrang hrang leh thurel umzui dan report a pe a. Report kim chang hi rorel member te hnenah ziaka sem a ni.
MṬKP Treasurer Nl. J.Lalrintluangi chuan sum dinhmun leh hman dan ziakin report a pe a, report aṭanga a lan danin sum hman theih ₹4,25,950/- a awm mek thu report-ah tarlangin, Tv. Lalruatkima, Fin.Secretary MṬKP pawhin sum hmuh dan ziakin report a pe bawk.. Report aṭanga a lan danin MṬKP Target aṭangin ₹5,71,260/- (38.08%) a lut tawh a, MṬKP inkhawmpui dawltu ṭanpuina ₹13,450/- lut tawhin, Thuzir bu man ₹46,080/- a lut tawh bawk.
Meeting ah hian thu pawimawh tam tak rel a ni a. MṬKP thuzir Exam Question chungchangte, MṬKP Inkhawmpui 2025-a Zaipawl zai dan turte, Speaker turte leh chanvo nei tu tur chungchangte, Kristian chhungkaw din leh Hriselna chungchanga hmalak dan turte ngaihtuah a ni a, kum 2025 ṬKP Ramthim Ni leh ṬKP Day thupui tur te pawh thlan fel a ni.
ṬKP Platinum Jubilee(2026) lawm dan tur chungchanga Sub-Committee-te rawtna leh Ṭhalai Entu Electronic Form-a Subcribe dan tur chungchanga Media Cell leh Ṭhalai Entu Editorial Board-te ruahmanna chu pawm a ni a, Bial leh Unit hrang hrang atanga sawmna leh lehkha dawnte ngaihtuah a ni bawk. Kohhran Pawl dang Ṭhalai Inkhawmpuia MṬKP aiawha Palai ruahmante thlirin pawm a ni bawk.
