- Dr. Lalramzauva, Medical Superintendent.
Mizorama Chanchin Tha rawn hriltu Missionary hmasa ber Sap Upa leh Pu Buanga ten eng emaw chen Aizawla rawng an bawl hnuah Mizoram an chhuahsan leh zawk a, awm hlen tura Mizoram chhim lam an rawn chhuah nawn leh kum 1903 atang khan Medical lama rawngbawlna hi an tan nghal a. Mizoram an lo chhuah hma khan Damdawi lamah hriattur tul zualte neiin an training hmasa a, tichuan an lo chhuah tirh phat atangin tihdam hna lamah rawng an rawn bawl kha a ni a. An chenna Bunglow-a pindan pakhat chu damdawi sem nan (dispensary atan) an hmanga. He damdawi sem hna hi Sap Upa khan a enkawl deuh bik a, thingtlang khaw hrang hrang atangin an hnena damdawi lam turin mi tam tak an lo kal thin.
Sap Upa leh Pu Buanga chuan Damdawi-te kengin thingtlang khuate an fang thin a. Thingtlanga mamawhte hnenah damdawite pein, tawngtainate nen rawng an bawl thin. Heti ang rawngbawlna hian mite thinlung a hnehin Lal Isua chanchin an sawite pawh chuan awmzia a neiin Lal Isua ringtu an lo pungchho ta zel a, anmahni pui turin Mizo tlangval Challiana leh Chhuana chu training-te pein an hmang a. Chuti angin damdawi hmanga rawngbawlna chuan hmun pawimawh tak changin, a tangkai chho ta zel a. Damdawi semna tur Di-in an sa a, chutah chuan zingah hna dang an thawh hmain damdawi an sem thin. Kum 1904 atanga 1919 thlenga damdawi laa lo kalte chu kum tin mi 1500 - 9176 lai an ni. Sap Upain an hnathawh dan report a ziakah chuan “mite chuan damdawi hi an ring khawpa, damdawi la thenkhatte chuan ei nghal mai lovin an lukham hnuaiah an dah a, an kham hnan chuan dam mai turah an inngai nghe nghe a ni” a ti.
Hospital buiding hran neia damlote admit-a enkawl hna tak tak an thawh tan kha kum 1923 February ni 10 a ni a, heta tang hian kan Chriastian Hospital history hi intanah kan chhiar a, kumin hian Hospital rawngbawlna chu kum 90 lai a lo ni ta a ni. A kum 90-na a ni bawk a, a bul tan lai leh Missionary hmasa berte rawngbawl dan boruak, Chanchin Tha hril nana damdawi lam rawngbawlna an lo hman tangkai ziate rilruin a hre thar leh zual a, Mizo fate Chanchin Tha-in min tih en a, kum rei lote chhunga Kristian hnam min tihtir tura Pathian hmanrua pawimawh ber zinga mi chu tihdam rawngbawlna hi a ni, tih Sap Upa leh Pu Buanga bul tan dan atang hian a lang chiang hle.
Kan Lal Isuan khawvela rawng a bawl lai khan Pathianin Mihringte a hmangaihna tarlanna langsar ber pakhat chu damlote a tihdam kha a ni. He rilru hi pu chungin Kristian ten tihdam rawngbawl hna hi kan chhunzawm a, eizawnna kawng chi khat emaw, sumdawnna emaw, larna emaw, atan ni lovin Pathian hmangaihna tarlanna leh chhunzawmna atan a ni Christian Hospital rawngbawlna hi kan kalpui ni, tih Kohhran ten hre thar leh ang u.
Tuna kan Hospital dinhmun tlangpui chu heti ang a ni-
Hospital 2, Clinic Centre 1 (Lungrang S), Khum awm zat (Serkawnah 100, Lawngtlai ah 25) Thawktu (staff) awm zat -Doctor 14, Nurse 63, Nursing School Tutors 7, BCO enkawltu 7 leh a dangte. Hospital 2-a thawktu zawng zawng, Daily leh contract leh hna ngheta thawk kan vaiin mi 183 kan ni. Kumin financial year chhunga kan Budget dinhmun:-
Hospital budget pumpui (2012 – 2013) - Rs. 53,476,000.00
Hospital receipt (April 2012 – January 2013) - 85.8 pc
Hospital payment (April 2012 – January 2013) - 84.1 pc
Kum khat chhunga (Jan – Dec 2012) damlo inentir zat (OPD)- 27664, Admit zat, 3974, Naupiang zat 796, Mitthi zat 84, Major Operation zat 731, minor operation 391, Blood transfusion zat 1145.
Tun hnaia thil thar deuh han report tur kan neih chu, Inkhawmna Biak in (Chapel) kan peih fel ta a, February 13, 2013 khan hawnna leh Pathian hnena hlanna kan nei a, nikum lama Solar hmanga electric siamna khawllian leh tha tak ZEDA kaltlanga kan neih kha kan tangkai pui hle a power supply nghei /khaihlak awm lovin kan awm thei ta rih a, a lawmawm hle. Zun kawng enna leh phing leh zun kawnga lungte awmte zai lova lak chhuah theihna Cystoscope hmanrua kan nei thar ta bawk a, zawi zawi chuan kan phuisui chho ve zel a ni.
Kohhran Hospital a nih angin Kohhranhote tawngtaina hi kan chakna leh kan innghahna ber a ni a, tun dinhmunah chuan Mithiam mamawhna hi a la nasa hle a, doctor kan mamawh em em a, chuti ang bawkin Technical lam mi, X’ray Technician te, Pharmacist te leh technical mi dangte pawh kan mamawh a, Sorkar leh private-ah hna a tam avangin mi kan inhmu hlei thei lo. Pathian hnenah dil zel ila, mi inpe an lo chhuak ve zel ang.
Kan hriat theuh angin hruaitu term tawp a lo ni ta. Hospital pawhin hruaitu thar kan nei dawn ta a. Upa Dr.B. Laldinliana, MBBS, MS (sur) chu Medical superintendent thar tur a ni. Ani hi Surgeon a ni a, Serkawn Tualchhung Koh-hranah Upa niin OB nihna pawimawh tak chelhtu, mi inpezo leh rawngbawltu pawi-mawh tak a ni a, tha taka a thawh theih nan Pathian hnenah i tawngtaipui thin ang u.
Christian Hospital-a thawk ni mah ila, Kohhran mite min duh ang leh beisei angin kan thawk tha tawk lo fo. Mihring mihrinnate hian min hneh chang a awm ve fo thin. Krista rilru pua Kohhran rawngbawltute niawm renga thahnemngaihna thar nen rawng kan bawl theih nan min tawngtaipui reng turin kan chah bawk che u a ni.
Kristian Hospital Ni tangkai taka hmang theuh turin duhsakna kan hlan a che u.
Read More Article/Sermon : Click on this link : Articles/Sermon
