Hei hi Lalpa tih a ni...

KA RAWNGBAWLNA TESTIMONY

- Rev. Dr. R.L.Hnuni, Principal, Calcutta Bible Seminary (CBS), Kolkata

dr_rl_hluni_155_200 Chhiartu zawngzawngte kan Lalpa Isua Krista hmingin chibai ka buk e.

Hei hi Lalpa Tih a ni  tih leh  Intihsiakna tha chu ka beizo tawh a, ka tlansiakna kawng ka hlen tawh a, tih thu pahnih hi February-March, 2014, AICS Principal ka la nih lai si khan AICS-a ka rawngbawlna hun a tawp dawn tawh tih ka hriatin ziak turin ka rilruah a lang a.  AICS-ah rawngbawl chhunzawm zel beiseina ka neih deuh avang pawhin ka ziak mai lova. Amaherawhchu ka chhunzawm zel a rem tak lohvah chuan AICS chhuahsan a lo ngai a, September ni 28-ah min thlahna ropui tak college-in a buatsaih a, October ni 6, 2013-ah AICS chu ka chhuahsan ve ta a, Mualpui-ah Rajiv Gandhi Stadium panna kawngah Pathianin hmun min pekah chuan chhungkua kan inbengbel ve tan a. Chhuahsan mah ila rilru ngaihtuahna leh nun pumpuiah erawh chuan AICS hi a lo cham nghet hman hle a, Mizorama rawngbawl tura ka chhuahna chhan ber a ni a, Pathian hmaa vawi duai lo ka tahpui, ka nau pai, vei, hrinchhuah leh enkawl chhoh a nih bakah Aizawla chhungkua kan inbenbel hmasak berna hmun a ni bawk a, AICS lo chu in (home) dang nei hian ka inhre thei lova, khaw danga zin san ang lek hian ka inngai tlat reng thin. AICS hi ka lo neitu luat vang niin ka ring.  Ka thuziak tum pawh ziak hman reng reng lovin tihtur tulin min hmuak a, ziak ka tum chhung hian tum lawk loh deuhvin Kolkata-ah ka awm hman a. Hetah pawh chuan ka ziak thuai thei lova, a tawpah Pathian hruaiin ka han puitlin ve hram a ni.  Ka rawngbawlna testimony leh  report ni bawk chu a tawi thei angin ka han ziak hram a ni. Kimchang zawk chu buin la chhuah tum a ni.

Rawngbawl tanna:  Hei hi Lalpa tih a ni.

B.D. ka han zir chhuak phat kha Aizawl Theological College-ah Lecturer atan June 1979 atangin Principal Rev. C.Pazawna leh Faculty member ten min dah nghal a, ‘kan chawmte hi rawih kan ba lo’ tih Synod dan a ni chungin leh midang an sawm ngai loh laiin kei chu min han appoint nghal a, hei  hi Lalpa tih a ni e. ATC-ah kum 2 ka thawk hman a. 1980-ah pasal ka nei a, kum tawp thlengin ka la thawk chhunzawm zel a, a tawpah ka bang a. A Pastor nihna Thingsai Bialah thla li kan awm a, chumi chhungin  Cherhlun High School-ah min sawmna pawmin thla thum ka thawk a, hei pawh hi Lalpa tih a ni. Sawi tur tam tak a awm.  ka thawk a,  mahse ka thawk rei hman lo.   Eastern Theological College, Jorhat-ah  Lecturer ni turin BCM  chuan Pu Zauva an tir a,  June 1981-ah kan kal a.  Kan thlen hnuah lecturer hna kan dil chawp ang kan tih laiin kan  beisei phak loh tak maiin, Inaugural program kan neih naah chuan Principal Dr. J.H. Thumra chuan  kan pahnihin lecturer atan min lo la fel diam tawh tih sawiin introduction leh min welcome naah a a han puang chu  mak kan ti em em mai a. ETC-ah hian  nupa thawh dun an phal lova, mahse thiattu atan min hmang ta thung a. Kan sawi leh dil ngai miah lovin Pathianin min lo tih fel sak vek a,  Hei hi Lalpa tih a ni, kan mithmuhah a mak a ni, tih hi khatih lai khan a lo dik daih tawh a ni.  Kum 1981 June atanga thawk tanin M.Th (1983-1985) leh D.Th (1990-1994/95) zirin, chhuak leh lutin kum 18 chhung Mizoram pawnah (Jorhat, Bangalore, (tum hnih-1883-1985, 1990-1995, Melbourne, Australia) leh Bochum, Germany, keimah chauh) kan awm a. Kan fate pathum pawh Jorhat-a piang  an ni a, kan chhungkaw nun leh ETC chu a inkuangkaih nghet hle, kan fate pawhin an ngai hle thin.

Eastern Theological College, kan awm chhungin Pathian khawngaihna vangin bul tantu nihna kan nei ve nual a.  ETC Nursery, vawi tam tak Faculty-in tan an tum tawh thin mahse a hlawhtling lo thin chu a bul tanin theihtawp kan han chhuah a, tunah hian Pathian zarah Jorhat-a Nursery tha ber pawl a ni.  Post Graduate – M.Th Program:  Rev, Dr. K.Thanzauvan Theology Department hawngin M.Th bul a tan a, NE-ah chuan M.Th program neih hmasak berna college a ni. Tribal Studies Program bul a tan bawk.  Journal of Tribal Studies Series chhuah tan a ni, tun thlengin an la chhunzawm zel. Women Studies Department 1997-ah Dean niin bul kan tan bawk a, tun thlengin Women Study Department hi tluang takin a kal zel a, lehkhabu pawh engemaw zat chhuah tawh a ni M.Th Program Old Testament Department-ah hawn kan tum a, Department head nih angin a bul ka tum a, Senate pawhin phalna min pe vek tawh a, tan kan tum lai takin BCM-in min rawn sawm ta si a, ka chhuahsan ta a, tun thlengin an tan theih loh phah ta a ni.  Pathianin heng hmalakna thar leh bul tan tur program pawimawh tak tak ETC-ah min pe a, a zavaiin vawiin thlengin hma a sawn zel a, Pathian khawngaihna leh awmpuina avangin kan bul tan apiang a hlawhtling a, Lalpa tih a ni e. Kan nau, kutchhuakte ngei ETC-ah an Professors an ni tawh a. Tha takin  kan hmalakna an enkawlin an tungding zelin,  hma an sawn zel a, kan lawm hle.

AICS-BCM-ah ka rawngbawl  tan:

BCM Assembly rorelna angin kum 1999-ah AICS bul tan turin min rawn sawm a, ETC chhuahsan harsa ti tak chungin banna ka ziak chu submit thei lovin vawi thum ka pawtthler a, chhuah ka duh loh avanga Pathian hruaina dila tawngtaina ka hman nasat ber tum a ni hial awm e. Ka faten chhuak lo turin min lo nawr reng bawk a. A tawp khawkah chuan BCM sawmna chu Pathian kohnaah  ruatin  banna theh lutin AICS din turin kan lo chhuak a.  Ka Office  kal tan ni hmasa berah chuan Office ruakah ka thu a, ka tawngtai a, Lalpan in a sak loh chuan a satute chuan an thawkrim thlawn a ni… (Sam 127:1) tiin Pathian hnenah mahni leh hna thar hlan hmasakna ka nei phawt a.  BCM Bial Pastorte leh Kohhran Secretary tinte hnenah chuan lehkhathawn ka buatsaih a, Sam 127:1 Lalpan in a sak loh chuan, a satute chuan an thawkrim thlawn a ni.., tih thu tarlangin Baptisma chang apiangin Rs 100/- an thunna tur Envelope siam sa ka thun tel vek a. Theological College bul han tan chu thil harsa tak a ni,  Chhung lam leh pawn lamah  indona – Aizawla din remtih lohna, duh lohna leh dodalna leh zawhna a awm chuk mai. Sawiselna  tam tak chu ngaihsak hman a ni lova, chhan vek sen a ni bawk lo. Indona chu Lalpa ta a ni, tiin Pathian kutah hlanin kan han kal ve zel a.

Kohhran tlawh/Awareness Program:

Baptisma chang chinin thawhlawm Rs 100/- an thawhna tur Envelope an lo hmuh chu a thenin an hrethiam lova, hrilhfiah a  ngai a, ka beisei loh tak maiin Kohhran hrang hrang tlawhna hun remchang Pathianin min pe a lo ni.  Kohhran hrang hrang kan tlawh phah a, Library tihhmasawn nan hma lak pah reng a ni.

AICS hawn (inaugurate) a ni ta: 18 October 2000:

Zonuamah Pu C.Thangkima in September 2000 atangin kan luah tan a, AICS students  batch hmasa berte chu October ni 17-ah lo lut tan a, kan nupa in kan lo Welcome a. Zirlai lo thleng ka hmuh veleh chuan ka  hnuk a ulh a, ‘Lalpa, theological college chu kan tan ve tak tak dawn ta a ni maw, a va lawmawm em!’ tiin ka rilruin Pathian hnenah lawmthu ka sawi a, chutih rual chuan  Hei hi Lalpa tih a ni, kan mithmuhah a mak a ni, tih hi ka thinlungah a lo lut nghal a. Mak tih leh lawm avangin  ka mittui a luang a.  October ni 18-ah kan in luah, Zonuamah chuan AICS Hawnna ropui takin kan hmang a.  BCM hruaitute leh kohhran memberte an kal tha hle.  Kum 15 chuang meuh mai BCM in theological college nei tura an lo sawiho tawh leh Centenary lawm nana din an chuan a tak ram a thleng thei lova. A tirah Mizoramah Kristianna Centenary hriat reng nan tiin 1994 ah din tum a ni a, mahse, a tlawlh a. Kum Zabi thar (21st Century) project tiin rawt that leh a ni a, 1997 Assembly-ah a tla leh a,  1998 Assembly-ah a rorel naah passed a ni leh a.  A tawpah kum  Zabi  Thar (21st-century) na hriatreng nan BCM  theological college Academy of Integrated Christian Studies (AICS) chu a lo piang ta! Pathian hnenah lawmthu awm rawh se.

Sum awmsa engmah awm lovin bul kan tan a,  BCM Budget Rs Nuai 15 chauh kumtin min chuan thawham theih a ni lova, ramdangah fundraise kan ti pah reng a, Pathianin min pe zel a.  April ni 6, 2000-ah ram kan lai tan a. Class nei pahin Hostel leh  Quarters  kan sa  reng a, building kan la sa zo lo hle na a, November ni 4-ah Campus thar kan luah thla rawih a. Room kan sak zawh apiang kan luah zel a. Theihtawpin insak rualin a campus kan siam tel pah reng a, a hmu apiangte mak tihin a hma a sawn a. Tunah mak tak maiin campus nuam leh mawi tak leh building tha tak tak kan suangtuah phak lohva tha Pathianin min pe  zel a, chuvangin Hei hi Lalpa tih a ni kan mithmuhah a mak a ni, tih hi kan thupui pawimawh tak a  ni ta zel a. AICS hi mittui nena bul tan a ni, sawiselna chi hrang hrang avanga hrehawmna leh lawm avanga Pathian hmaa thinlung bunchhuahna  mittui tlakna Rah a ni e.

Tanpuina hrang hrang kan dawnte tun tumah ka tarlang seng lo. Pawn lam leh kohhran hrang hrang min tanpuitute chungah lawmthu ka sawi thin tawh a, ka sawi nawn leh a ni.  Kan insakte – Main building, Chapel, Choka –Dining Hall, Zuala Memorial Guest House, Mission building, Women Hostel-te hi kan tunlai tawng takin World Class/internationalndard a tling a,  khawvel hmundangah pawh awm se a chhuanawm thawkhat hlawm viau a ni. Kum 12- lawmnan AICS Campus-ah ngei Serampore College Convocation  kan han thleng/host thei te kha thil mak tak a ni, Senate leh Board memberte pawhin tun thlengin AICS tha leh nuam an tihzia min la hrilh mawlh mawlh reng hlawm a,  khatiang kha khawiah mah an la tawn loh thu an sawi hial a, a lawmawm hle. Sawiselna leh elrelna hrang hrang leh rinhlehna karah AICS puitling leh mawi takin a lo ding chhuak a. Pathian khawngaihna leh a hruaina zarah leh BCM hruaitute min rin tawkna avangin AICS bul tantu atan min hmang a, Indona tha chu Lalpan min do sakin min hnehsak a, tuna la awmte hian Hei hi Lalpa tih a ni, kan mithmuhah a mak a ni,  tih hi tawng chhunzawm zel se ka duh hle.

Faculty development lamah pawh theihtawpin tan kan la pah reng bawk a, zir thei turte kan thawn zel a. Kum 11 chhung chu keimah chauh doctorare degree nei ka ni reng a. Kum 2011-atangin  D.Th  an lo awm belh ve ta zel a,  Faculty development atana kan tirh hmun dangah an tir zel hi erawh chu a tha lo khawp mai.  Principal atan pawha ruat theih tur D.Th rual lo awm ta te hi kan ‘dream leh vision’ a thleng kim ta, kan nupain kan ti a ni. AICS hmanga Pathianin Testimony hlu tak min pek chu Hei hi Lalpa tih a ni kan mithmuhin a mak a ni, tih hi a ni.  He kan thupui hi a saptawngin This is the Lord’s Doing tih hi a  Main Building hmalamah kal apiang hmuh theih turin kan ziak kalh a, a hmu apiangin Pathian thiltih hi hria se tih kan duh a ni.

Intihsiakna tha chu ka  beizo tawh a, ka tlansiakna kawng ka hlen tawh:  

He thu hi Paula sawi a ni, khawvelah a hun a hmang zo tawh, a tihtur a ti zo tawh. Chutiang bawkin Pathian khawngaihna zarah kan nupain Rev. Dr. Thanzauva nen AICS leh BCM-a rawngbawlna chungthuah he thu hi kan sawi ve thei ta a ni. Hetiang dinhmun puitlinga AICS kan chhuahsan thei hi kan lawm hle a, engkima min thawhsaktu Pathian hi ka lawmna ber a ni.  Pathian chu mahni intum, amah ringtu leh beiseina nena theihtawpa thawktute tibeidawng ngai lotu Pathian a nihzia a lang a ni. Pathian hnenah chauh ropuina leh chawimawina awm sela. Pathian khawngaihna leh hliahkhuhna zara AICS leh BCM tana kan indona leh intlansiakna te chu kan hlen chhuak ta, kan ti ve a a,  amaherawhchu, indona leh intlansiakna zawng zawng chu Paula ang erawh chuan kan la hlen chhuak ve lo a ni.

AICS chhuahsan mah ila, Pathianin hriatna, thiamna leh mihring sawi dana zirna sang ber min pe a,  hriselna tha tak leh chakna tha tak mai min pe a, hengte hi AICS din chhuah nan Pathian a hmang a. Heng a thilthlawnpek ka dawn hi engemaw ti kawng zawng tak chuan a hmang zel ngei ang tih ka ring tlat a, chu chu Pathian rawng bawl tura ka in pekna pawh a ni,  tawngtaiin Pathian kan nghak a. AICS-ah ka zirtir chhunzawm a rem tak lohvah chuan a remchan dan ang zela Pathian rawngbawl chu kan tih theih awm chhun a ni a, hlim tak leh phur takin BCM ITI-ah lawiin rawng kan han bawl ve tan a, Mizoram leh India ram pawn lamah zinna tur a lo awm thin bawk nen, rin aiin kan buai a. ITI kohhran hruaitute leh memberten min lo dawngsawng thain kan han lawi chu an lawm thiam hle a, an hruaitute leh memberte an fel a,  thlarau lam kohhran nun a tha a, a nuam a, an inlungrual bawk nen, nuam kan ti hle a, kan awmna tur tak pawh niin kan hria. Kan School project tihhlawhtlin tumin rilru kan siam fel a, hlim takin kan in bengbel (settle) tan a.

Sawmna a lo thleng  (Indona tha dang a ni thei em ?) :

Chhungkua kan la inremfel  chiang kuang rih lo hle a,  buai taka kana wm laiin November thla tawp lamah chuan telephone call ka dawng a, CBS-a thawk tura sawmna a ni, mahse chhan ngaihna vak ka hre lova.  December-ah ni 7-ah ka nau hruaia Vellore lam kan pan laiin ECI Bishop leh CBS Board Chairman ten min rawn phone leh a.  CBS-a thawk tura min sawmna bawk a ni. Professor atan  min sawmah ka ngai a, tanpui ve tur emaw ni dawn chu le ? tiin Pathian hnenah ka tawngtai a. Hnarna tur chhan hrang hrang kan ngaihtuah bawk a.  Vellore-a kan awm laiin email-a lehkhathawn ka hmuzui a, chutah chuan Principal tura sawmna a lo ni reng a, hmun danga Principal nih chu ka rilru in ka huphurh a, mahse sawmna chu hnar chi a ni lo hle mai a, lawmthu an sawi nghal mai bawk si a. January 2014 thlaa zawma  Principal charge la thuai thuai turin min duh a,  Vellore atangin December ni 24-ah Aizawl kan thleng a.  Inbuatsaihna mumal pawh nei hman lovin New Year January ni 1-ah  Calcutta kan pan a,  January ni 2, 2014 ah chuan Calcultta Bible Seminary Principal charge chu ka la ta a.

Theological college-ah Principal ka ni leh ang tih hi ka ngaihtuah ngai lo, tuman an ngaihtuah bawkin ka ring lo. Professor ni tur chuan a mak love.  Chubakah kohhran dang daih, kan hriat ngai vak loh ECI -in min sawm hi a mak hle a.  ECI tan pawh an kohhran mi  ni lo Principal atan an neih vawi khatna a ni. Minu (woman) Principal an neih vawi khatna a ni bawk. An kohhran history-a thil thleng danglam tak a ni ve. Kohhran mal college-ah hian mahni kohhran mi ni lo chu Principal atan an nei ngai lo.  Kumin February khan Serampore-ah Board/Senate meeting/Serampore Convocation-a kan kal a, AICS kha Principal anga ka tel tawpna torah ngaiin kan Senate meeting pawh ka bye bye diam a. Kan thiante Principal dang leh Senate member thiante pawhin Principal ka nil eh ta leh Senate meetinga ka han tell eh chu mak an ti  hle.  Senate of Serampore College history-ah pawh Pension hnu Senate hnuaia Principala hman leh hi thil la thleng ngai lo a ni. Hei hi Lalpa Tih a ni, kan mithmuhah a mak a ni, tih hi keima mi mal nun ngeiah pawh a dik hle a ni. Mi thenkhatin chawl tawh se min ti an awm ang, mihringin chawl turin min  duh tawh mahse Pathian hi a la duh tawk ve lo a ni.  Pathian min neitu leh kotu chuan  min la hmang zel duh a ni, chakna leh hriselna tha tak min pe a, chawlh mai a rem lo a ni.  Chuvangin he ka hna thar hi intihsiakna tha dang Lalpa min pek leh chu a ni thei ang em? tiin ka zawt a. Suangtuah loh leh beisei lohna lamah Lalpan intlansiakna tha dang bei turin min dah leh ta a ni e.  CBS-a ka awm chhung rei loteah Lalpan a thiltih mak dang hmu leh turin min duh a ni ang tih ka ring tlat a, Lalpa chu mahni intumchawp Pathian a ni, kan inpekna (commitment) leh inpeih reng (availability)na hi a duh chu a ni.

Calcutta Bible Seminary (CBS) hi  Evangelical Church of India (ECI) ta a ni. Kum 1988-ah din niin kum 25-na nikum khan an lawm. Kuminah zirlai 104  kan nei a, B.D (Senate), Class XII leh BA passed leh M.Div (ATA) program a awm a, zirlai zingah North East an tam ber, Women student pawh 32  kan nei. Mizo zirlai 10 nula pathum nen an awm bawk.  Lecturer  tam zawk chu North East mi (Naga) an ni a, a senior deuh deuh 5  hi chu ETC, Jorhat-a kan zirtir tawhte an ni, ka mikhual lo hle.

Ka hna danglamna:

AICS-ah chuan engmah awm miah lo atanga bul tanna (ground work), engkim thawh chhuah chawp ngai a ni a. Fund raise a ngai nasa a, building sak nan leh campus siam mawi nan pawisa kan zawng chawp a, Pathianin min pe zel a hlawhtling ngei tura sawiselna hrang hrang kara thawh zel, zirtirtute tihhmasawn (faculty development),  a zirlaite thlarau lam nun leh thiamna lama tihhmasawna an mimal nun tihhmasawn pah indona a ni ber mai. CBS-ah erawh chuan campus leh building tha tak awm tawh sa tihmasawnna a ni ber mai.  Peng hrang hrangah develop na tur erawh a awm. Senate in  provisional affiliation a pe tawh a, full affiliation turin hma kan la mek a. Faculty development lam hmalak a ngai a. Tin, M.Div hi ATA-ah zawm a ni a, reaccreditation tih mek a ni. Building thar dang pawh sak belh mek zel a ni.  Chhunglam (internal dynamics) tun din a ngai a, Tunah pawh hian kawng hrang hrangah Pathian hnathawh kan hmu  mek tawh a ni, Lalpan engkimah min tihsak thin a,  min tihsak leh zel ang tih kan beisei.  Lalpa hnen atangin thil ropui tak beisei la, Lalpa tan thil ropui tak tih tum rawh tih hi ka motto a la ni reng.

Ka kal tirh phat atangin Lalpa Zanriah Sacrament pawh ka tih turh an dah hmiah a, thlatin kan nei a, mahse, midangte ti turin ka phut ve a. Tin, helaiah awm takah chuan hmun dangah D.Th candidate, D.Min leh BCS program-ah te zirtir tur leh tel turin min sawm ve thin a, AICS-a awm ai chuan academic peng dangah tel theihna remchang tha tak a awm a, a hlimawm hle.  Pathianin  Indona / Intihsiakna tha dang bei turin hma min chhawp sak lehna ah hian tul leh mamawhte  tihhlawhtlin a nih zel theih nan min lo tawngtaipui thin turin chhiartute ka chah a ni.

Read More Article/Sermon : Click on this link : Articles/Sermon

ATTACHMENTS
Good Friday leh Easter Sunday programme hman mek a ni.

Good Friday leh Easter Sunday programme hman mek a ni.

Kristiante ni pawimawh ber te zing ami “Good Friday” chu nimin, march 29, 2024 khan hman a ni a.  Kumin Good Friday thupui-ah Johana 19:30 thu atangin “A kin ta’ tih chu thupuiah hman a ni. March 28 (Ningani) Good Friday Eve-ah Tualchhung Kohhran engemawzat ah Lalpa Zanriah (Sacrament) an kilho a. Bialtu pastor leh Bial nei lo Minister leh Headquarters-a hruaitute pawh Kohhran hrang hrangah in sem darhin Lalpa Zanriah Sacrament hi an buatsaih a ni. Headquarters a kan hruaitute pawhin hetiang hian Kohhran hrang hrangah Sacrament buatsaihin hun an hmang :- …

Kristian Hlabu ennawn Sub-Committee an thu khawm

Kristian Hlabu ennawn Sub-Committee an thu khawm

Tun kar Thawhlehni, March 26, 2024 khan Headquarters Office Committee Room No. 1 ah BCM atanga Kristian Hlabu ennawn Sub.Committee an thukhawm a. Upa C. Hrangdula, Committee Convener-in a kaihruai a, meeting-ah hian member 10 an kal a ni. …

BCM Shalom, Mission Vengthlang ten Junior ṬKP  Retreat an nei.

BCM Shalom, Mission Vengthlang ten Junior ṬKP  Retreat an nei.

Retreat hi Lawmsanga Camping Centre, Ailawng ramah march ni 25 & 26 khan neih a ni a, mipa 12, hmeichhia 19 leh hruaitu 7 an tel a ni. Speaker atan Rbt. Stephen Lalruatfela leh a rawngbawlpui (Krista Thawhpuitute Team) te hman an ni …