UID hi a hlauhawm em ?

images (3)Tunlai hian India ram mihringte inhriat chian zawkna tura mitnaute (Iris Scan) leh kutzia (Finger Print) thlalakna UID (Unique Identification) hian ti ti a ti tam hle mai  a. Thu lêng vâk dawnsawn dân azirin rilru sukthlêk pawh a in ang lo hle. Sawi laih a awm chuan chiai mai lova hriat chian tum zâwk hi a finthlâk fo. Sakhuanna leh rinna nena inkaihhnawih anih phei chuan fimkhur a ngai leh zual. Kan thilhlauh emaw kan huat te pawh hi kan hriat chian loh vanga kan lo hlauh vak leh huat vak pawh  a awm thin a ni. Chungte chu kan han hriat chian chuan lo huatthlala emaw hlauhawm  lem lote an lo ni ve fo thei bawk. Chuvangin a nihna tak kan chian hi a pawimawh fo thin a ni. Mithiam ziak hrang hrang a tangin eng ang chiah nge UID hi i lo thlir teh ang.

A hming sawifiahna:

UID hi saptawng a ni a, a hming pum chu  ‘Unique Identification’ tih a ni. ‘Unique’ tih hi Dictionary-ah chuan ‘bîk, anpui awm lo’ tihna a ni. ‘Identification’ tih chu ‘hriat hran theihna’ tihna a ni leh mai. Tichuan UID (Unique Identification) tih awmzia chu ‘Chhinchiahna bik, anpui dang reng reng nei lo’ kan ti tawh mai ang chu. Mitinin Identification (ID) hrang theuh kan nei dawn tihna  mai a ni.

UID chu eng chiah nge ni?

Khawvêl danglam zelah sorkar chuan a ram mite hriat chian a duh telh telh a. Chhiarpui pawh tunhma aia changtlung leh chipchiara neih a ni ta. Unique Identification Number (UID) tih a lo chhuah chhan pawh hei hi a ni. Infosys Company Co-chairman Nandan Nilekani chuan lehkhabu pawimawh tak ‘The Idea of India’ tih a ziak a. Thil tam tak a ziah zingah India ramah ramdang mi lo lut nasa lutuk leh, ram hmelma Terrorist-te pawh awlsam taka an khawsak ve mai theih thin avangin ram mi (citizen) inhriat zung zung theihnan UID nei theuh ila, chu chu thil tam takah a tangkai tûr zia a sawi a. Chu chu sorkarin tha a tih êm avângin a ‘idea’ neitu ngei chuan bawhzui rawh se, a ti a. Nandan Nilekani chu Cabinet rank hial pein he hna hi a thawh tir ta a ni. Ram chhung mi leh sa te tana thil tha tak tih tum an niin a lang a, sakhaw lam thil a kaihhnawih bawk lo a ni. India ram hi ram zalên a nih avângin a ram hmelmate hial pawh zalên taka an khawsa thei tlat hi India sorkar hian a vei hle tih hre phawt ila a tha awm e.

Pathianin mihring vaibelchhetak 10 chuang fe min siamte hi, kan mitnaute leh kan kutzia inang pakhatmah kan awm lo an tih chu. Chuvangin kan hriat hran theihna awm chhun pahnih hmang hian India Sawrkar chuan a mite, a khua leh tui te hi min hriatchian a tum ta a ni.UID hi India khua leh tui dik tak kan nihna felfai zawk leh chiang zawka chhinchhiahna atâna duan chhuah a ni a. Unique Identification Authority of India (UIDAI) hi he hna thawktu atana ruat a ni a, anni hian tihdan phung fel tak neiin mitin chhinchhiahna tur database fel tak siam an tum a ni.

UID buatsaih chhan:

1) ID Card lem (Duplicate) lo hluar ta hle mai tih tawpna tur a ni. Duplicate siam theih a ni tawh lovang.

2) India ramin inthlanpui apianga sum tam lutuk a sen ngai ziah hi UID buatsaih fel a nih chuan a ziaawm ang.

3) India khua leh tui nilo, dan lova India rama lo lutte hriat chhuah zung zung theih nana buatsaih.

4)Terrorist-te zalên taka chettlatna tithuanawp tûr atâna thil tangkai tak tûr a ni ang.

5) Miretheite tana sum dah hran, dik lo taka midangin an dawn sak loh nan(e.g. NREGS) 6)Inbumna (hminglem hawh)tihtlem nan  leh misual zawn chhuah kawnga puitu tha tak a ni ngei dawn a ni. UID nena ngaihpawlh loh turte:

Tunlaiin Kristian mithenkhatin UID leh khawvêl thiamna sangzela chhinchhiahna awmte leh Bible a chhinchhiahna a sawite nên pawhzawm luih tum tlat pawl an awm thin avângin,  chung zinga lâr zual deuhte awmzia hi lo târlang ta ila.

 1. Globalisation tih leh One World Government System tih vêl te nen sawi zawm chi a ni lo, thil inpersan daih an ni.

2. Real ID: Hei nen hian a inang viaua, mahse, hei hi chu U.S.A.khua leh tui chhinchhiahna bik a nia, ngaihpawlh loh tur.

3. RFID (Radio - Frequency Identification) : Computer chips, RFID (Radio Frequency Identification ) technology hmanga an siam, buh fang tiat lek chu electronic hmanrua hmangin bungrua leh rannungahte an kah luh bakah tunah hian mihring taksaah hial pawh kah luh ani.

Khawvêl hmun tam takah chuan he RFID microchip (VeriChip ) hi mihring taksaah Alzheimer’s natna hrik awm leh awm loh endik nan te, rilru lam chiang lo enkawl nan te, zunthlum enkawl nan te, lung natna enkawl nan leh mihring inrukbona (kidnap) laka invenhim nan te hman mek a ni a, India ramah chauh ni loin khawvel hmun hrang hranga hman a ni.

UID- hi chu India khua leh tui chauhte chhinchhiahna a nih laiin RFID hi chu hmun hrâng hrangah thil chhinchhiah nan hman a ni a, ran vulhnaah, dawr lianah, intlansiaknaah, motor silnaah, tool Booth-ah Mobile phone-ah, company product-te chhinchhiah nan hman thin a ni. Chuvangin sawi zawm chi a ni lem loh hmêl hle a ni.

Engnge hlauawm chu?

Zoramah mai pawh ni loin, khawvêlah hian  Sakawlha inpuhna hi thil thleng ve reng a ni a. Sakawlh hi kan Bible-in a sawi avangin namnul ngawt chi chu a ni bik miah lova, hlauh ai chuan huat tur zâwk a ni. A chhan chu bumtu vawiin ni thlenga ringtute kan rinna tiphet zawnga min bawlphawn tum reng boruaka thuneihna lal anih vang a ni. Amaherawhchu, mi sawi a piang emaw mipuh apiang emaw lo hmuh sakawlh ve ngawt chi pawh a ni bik lova, zira chhuichian a tha fo thin. UID chungchângah pawh hian Thupuan a mi ‘Sakawlh leh a lem chibai bûkin, an chalah emaw an kutah emaw chhinchhiahna an neih chuan’(Thup.13:16)tiha ‘chhinchhiahna’ tih hi an pawh zawm a, he mi avang hian UID hi chhinchhiahna hlauawmah an dah ta a ni. Thupuan bung 13-a chhinchhiahna hi Greek tawnga Charagma an tih hi  ni a. Charagma tih awmzia chu Thing phêk/lung phêk/taksa-a ker, nemkai tihna a ni a, tun laia tattoo angte hi a niang chu. Ziarang nungchanga nem kai, nungchanga chhinchhiah, nungchanga anpui nem kai tihte a kawk a ni. Chuti a nih chuan mihringa sual awm zawng zawng hi Setana min nem kaisak niin sual, Pathian do sawina a ni mai thei bawk. Hetiang a nih chuan piangthar lo mihring hi Sakawlh chhinchhiahna putu chu a ni mai ang em?(Src: Sakawlh leh Kristianna - Rev.Lalthangliana Hnamte).

Thupuanin a sawiah hian chhinchhiahna hrim hrim ai chuan Sakawlh leh a lem chibai bûktu kha Pathian thinurna siamtu tûr chu a ni zâwk a ni. Zoramah hian hman atang tawhin ringtu tichiai thei thu lengvêl buaipui tûr hi chu a awm reng a ni. Khawchhak lungpui lo lum tur te, hming thaichhiat te, sawrkara chhinchhiahna chi reng reng leh kohhran inzawmkhawm hlek tawh hlauhna thlarau hian min chenchilhna hi a rei ve tawha.Chuvangin UID pawh hi miin an lo hlau anih pawhin thil awmthei ve tho a ni. Amaherawhchu, zirchiangin hrechiang ila, ringtu puitling (Thlarau mite) te tân buaina tûr a nih leh nih loh erawh chu Pathian rawn chungin mahni i in chian ang u. Keini ringtute chhinchiahna chu hei hi a ni “ Krista nangmahni nêna min tinghettu leh keini hriak min thihtu chu Pathian a ni; ani chu min chhinchhiahtu leh kan thinlunga zakhamna Thlarau min petu a ni bawk a”(11Kor.1:21-22) tiin fiah takin min hrilh a ni.

Bible-in milem biakna a huat êm êm zawk  chu duhâmna hi a ni(Kol.3:5). He milem biaknaa luh erawh chu i hlau ang u. Kan Lal Isuan hlauh tur dik tak min hrilha, “Tu nge in hlauh tur ka hrilh lawk ang che u, a tihlum hnu pawha Gehenaa paihna thuneia chu hlau rawh u;a ni, ka hrilh a che u, a mah mawlh chu hlau rawh u” ( Lk.12:4-5) He tah hian kan Lal Isuan  Kristiante hlauh tur dik tak chu kan Pathian chauh hi a ni. Hlauh loh tur Kraws a hneh tawh hlauh vak ai chuan kan Pathian hi hmangaihna leh khawngaihna Pathian a nih rualin Pathian thikthuchhia mi kanral hmang, tihlum hnu pawha Gehena a paih theihna thuneihna nei a nih avangin i tihin, i hlau vang u.

- Rev. C. Lalbiakzama

 Read More Article/Sermon : Click on this link : Articles/Sermon
ATTACHMENTS
HATIM-in Adopted Village atan Zotluitlang thlangin, thawhhona thuthlung an ziak

HATIM-in Adopted Village atan Zotluitlang thlangin, thawhhona thuthlung an ziak

Kar hmasa Zirtawp ni, March 22, 2024  khan Higher and Technical Institute, Mizoram (HATIM) chu an Principal Pu Vuansanga Vanchhawng hovin tun hnaia Adopted Village atana an puan thar, Zotuitlang Lunglei District an tlawh a. Zotuitlang-ah hian khawtlang hruaitu, VC te, YMA leh MHIP hruaituten an lo dawngsawng a. VCP leh HATIM Principal te hian thawhhona thu thlung (Memorunduma of Understanding) ziakin an sign a ni. HATIM atangin Principal bakah zirtirtu pathum - Dr Lalhminghlua, Asst Professor, RTC  Lallianzela, Assf Prof, Pu Vanlalruata Kawlni, Sr. Assistant leh thawktu dang pahnih bakah zirlai 18 an kal tel bawk …

BCM Shalom, Mission Vengthlangin Medical Free Medical Camp an buatsaih

BCM Shalom, Mission Vengthlangin Medical Free Medical Camp an buatsaih

March 23, 2024 (Inrinni) khan an Kohhran Hall-ah Free Medical Camp hi an buatsaih a, an kohhran din champhaphak kum 25-na (Silver Jubilee) lawmna pakhat atana buatsaih niin, an kohhran member te bakah veng chhung mi engemawzat an inentir a ni. …

Baptist English School Extension Building sakna tur lung phum a ni.

Baptist English School Extension Building sakna tur lung phum a ni.

March 20, 2024 (Nilaini) zing dar 7:30 khan Baptist English School extension building thar sakna tur lungphum phum a ni a. Rev. L. Vanlalsanga, Education Director-in he hun hi kaihruaiin tanna hun a hmang a, Rev. R. Lalbiakliana, General Secretary-in BES extension ruahman a nih dan leh a tulna te sawiin, Upa Victor Lalrinawma Sailo, Director, Property Department in building sak dan tur ruahmanna te sawifiahin a tarlang. Rev. R. Lalnunzira, AGS-Service in building sakna tur lungphum phumin tawngtaina in a hlan a ni. …