Pu Johny Lalmuanawma (Maths Teacher) Baptist English School Serkawn chu November 28, 2025 (Zirtawpni) tlai dar 5:30 khan Christian Hospital Serkawn-ah boralin, a tuk November 29, 2025 (Inrinni) ah Serkawn thlan mual-ah vui liam a ni.
Pu Johny Lalmuanawma hi Lalchansanga (L) leh Saihmingthangi Sailo-te fa hmingkoh ni turin November 10, 1980 khan Civil Hospital Aizawl-ah a lo pianga, Unau Pathum, Vanlalhruaiii leh Lalremruata te neiin, an ni pawh hi chatuan ram an pan tawh a ni.
Pu Johny-a hian Ramthar Veng-ah Primary atanga High School theng lehkha zirin, Class IX leh XII hi St. Joseph’s Higher Secondary School, Aizawl-ah a zir a, Hrangbana College-ah kal chhunzawm lehin hetih chhung hian Chaltlang-ah a chungte In-ah a awm thin a ni. Amaherawh chu chhungkaw harsatna vangin B.Com kumhnihna a zirlai hian zir chhunzawm thei lovin, Baptist English Scool Serkawn tuna a thawhmekna-ah hian a thawka, heta athawh chhung hian Correspondent-a zir zawm lehin, kumthum vel athawh hnuah B.com chu tha takin a zo ta a ni. Zirtirtu training pawh school a thawk chung hian (D.EL.Ed) Diet Lunglei atangin a train chhuak ve leh bawk.
Baptist English School Serkawn-ah hian Kum 2012 February ni 1 khan Contract a lak niin a thawk tan a. A hnaah hian a tuiin, nuam a ti em em a, a pianthar hnuah rawngbawlna hawia hnathawhna remchang a nei thei hi amah pawh a lawmin a sawi fo thin a ni. Kum 2023 khan thawktu ngheta dah niin, he hna hi a hun tawp thlenga a vawn chu a ni.
Kum 2004 February 18-ah Pi C. Lalrindiki (Marini) nen BCM Biak In Electric Veng Hnahthial-ah an innei a. Fa pathum Lalveninhimi, Lalhruaitluanga leh Vanlalpeki te an nei a ni.
Pu Johny-a hian chhungkaw harsatna vangin a duh ang takin zirna kawngah a thleng sang thei lova, nimahsela a thil zir leh hriatah erawh a chiangin, mi inzir mi tak a nih thu erawh a thenrualte leh thawhpuite pawhin an sawi uar hle. A hnaah a inpe em em a, a tul chuan School hour-ah lo pawh tlaivar deuh thaw pawhin school-ah hna thawk peih thin a ni. Pu Jony-a hi mi thluak tha leh taima, mi inngaitlawm leh intotelh tum tlat thin a nih avangin ama kutkawih ngeiin Inhmun a lei a, in pawh a puah chho ve tan mek a ni.
November 22, 2025 (Inrinni) khan an In puah chu a fate nen Veranda ban an lai a, thahnem a ngaiin zan dar 10;00 thleng an thawk a. A kar leh thawhtanni-ah taksa nuamlo chungin school a kal a, hemi tuk atang erawh chuan school pawh kal peih lovin November 26, 2025 (Nilaini) khan dawmdawiin-ah dah luh ngai khawpin a na ta a ni. Pu Johny-a hi zunthlum nei a nih a vangin, ataksa zawh tawk aia nasa hna athawh bakah Internal Bleeding a lo nei bawk nen hei hi a chhiatpui chak hle a ni. Doctor leh Nurse te, a thawhpui leh chhungkhua bakah kohhran hote’n theih tawp chhuaha tawngtaina nen an enkawl laiin November 28, 2025 (Zirtawpni) tlai 5:30 khan kohna zawnga mawi ber vankohna chhangin amah lainattu a nupui fanaute, a thawhpui leh kohhran mite min lo kalsan ta.
A ruang hi a chenna In Serkawn-ah tlaivarpui niin, A tuk November 29, 2025 (Inrinni) ah a thawhna School Baptist English School Serkawn-ah vuina inkhawm ropui taka hman a ni.
Vuina inkhawm hi Upa ZD. Lalnunmawia’n a kai hruaia, chhungkaw aiawhin a nu Pi Saihmingthangi Sailo chuan thu a sawi. A mah thlah nan a thawhpui te'n a ruang chungah Kristian Hla Bu 154-na "Lungngaih ni leh lawm lai niah hian" ti hla an sa a, Rev. Dr. JC. Vanlalluaia Bialtu Pastor, Serkawn Pastor bial chuan vuiin, mi thluak tha leh taima, mi inngaitlawm leh intotelh tum tlat thin mi chu ropui takin Serkawn thlanmualah vui liam a ni ta.
