๐๐ฉ๐ ๐๐. ๐๐จ๐ญ๐ฅ๐ฎ๐๐ง๐ ๐ ๐๐ข๐ฌ๐ฌ๐ข๐จ๐ง๐๐ซ๐ฒ ๐ฉ๐๐ง๐ฌ๐ข๐จ๐ง๐๐ซ ๐ค๐๐ง ๐๐ก๐๐ง ๐ญ๐.
Upa ZD. Zotluanga hi Pu Kapthanga (L) leh Dothuami (L) te inkarah a upa ber dawttu ni turin November 15, 1949 Hauruang khua-ah a piang a. An unau hi 6 niin a, an unau upat dan indawtin:
Zonghingi w/o V. Thanzuala (L), Bawngkawn
ZD. Zotluanga h/o Thangmawii (L), Mission Vengthlang
Laltlanmawii (naupan laiin a boral)
ZD. Lalrinpuii w/o Lalthanmawia (L), Republic Vengthlang
ZD. Chungnunglura h/o TC. Lalropuii, Edenthar
Lalnunmawii w/o PC. Thangdailova, Hauruang
Lalthanhrangi w/o T. Sangzuala, Hauruang
Kum 1976 khan Pi Thangmawii, D/o Khuahnghina, Puallawi (N. Vanlaiphai) khua nen inneiin fa 2 leh tu 5 an nei.
An fate chu:
ZD. Laltanpuia h/o Ruth Ramngaihawmi, Mission Vengthlang
ZD. Lalremruati w/o Vanlalruata, Khatla South
Naupang tê a nih laiin a pain a thihsan a. Baihvai leh rethei takin naupan lai hun a hmang. An unauin a pa u, Pu ZD. Denghlira te inah awmin, Bungtlang bul Rawpui khua-ah an inbengbel a. A hnuah a u (cousin) Pu Z. Dengngura te finin, Serchhip-ah a khawsa leh a ni. A pa u hnena a awm chhung (1964-68) hian High School thleng lehkha a zir a. Hemi hnu hian Hauruangah let lehin, Mizoram Home Guards-ah a tang a, Lunglei leh Tlabung-ah te a awm thin. Chumi hnuah Aizawl lamah sawn a ni a, a u (cousin), Pi Lalhmingthangi te a va fin a. Aizawl-a a awm lai hian a nupui Pi Thangmawii nen kum 1976 khan an innei. A hna thawh lai bansanin, an fa upa zawk pian hnu hian a nu enkawl turin Hauruang lamah an let leh ta a ni. Hetah hian inbengbel nghetin, lo neih leh huan siamin ei an zawng. An faten zirna te zova hná te an thawh hnuin Aizawlah lo kir lehin an inbengbel a. Kum 2010 khan Republic Vengthlanga an awm laiin a nupui Pi Thangmawi’n ropuina ramah a kalsan a ni.
Rawngbawlna lam:
Hauruanga an awm laiin thih ngamin a damlo a, hun engemawchen damdawiinah enkawl a ni a ni a, hetih lai hian Johana 3:16-na hmangin Lal Isua ring tura a sawmna chhangin amah avanga nunna (damna) chang a nihzia a hriattir a. Kristaa a damna chu a tana nung tura a kohna a ni tih hriain, Krista hmangaihna chuan zui lo thei lovi’n a ko a ni. II Kor 5:13-15 leh KHB 399, "Lalpa I rawngbawla min koh hi" tih hla hi a duh leh ngainat em em a ni.
Kohhranah a phak ang tawk tawka inhmangin Unit TKP-ah hruaitu niin, Vice President leh Treasurer nihna a chelh tawh a. Sunday School zirtirtu a ni bawk. Tualchhung kohhranah Rawngbawltu atan thlan a ni. Kum 1981 khan Jubilee Bible School-ah Pathian thu a zirchhuak a. Kum 1982 khan kohhran Upa atan thlan a ni. Oct 12, 1983 khan Baptist Church Of Mizoram, Emmanuel, Hauruang kohhran Upa atan Rev. Dr. VL. Zawnga'n BCM Gilgal, Theiriat-ah a nemnghet (ordain) a ni.
Kum 1987-a Lungsena MTKP inkhawmpui neih tum khan hun puma Pathian rawngbawl tura sawmna chu chhangin Missionary atan a inpe a, Kum 1988 May thla khan BCM hnuaia Ramchhung Mission-ah thawk tanin, ramchhunga Chakma hnam zingah rawngbawlin hun a hmang a. Mizoram chhimthlang lama Chakma khaw hrang hrang Sakeilui, Udalthana, Zohmun, Hmunthar, Sachan-ah te a awm tawh a. Kum 1995 khan Missionary Training Institute (MTI), Serkawn-ah a training. A training zawh hnu-ah Vairawkai-ah a awm leh a. Vairawkaiah hian hun rei fe a awm hnuah Tuikawi-ah awmin, chumi hnuah Marpara-ah a awm leh a ni. Hemi hnu hian Rangte-ah a awm lehin Ramchhung Mission-a a thawh laiin Circle in-charge bakah Pastor bial Executive Commitee member a ni. Kum 2006 khan Missionary atangin a chawl ta a ni.
Missionary atanga a chawlh hnu hian Aizawla a nupui fanaute a rawn fin a, Republic Vengthlang kohhran-ah an lawi a. Tualchhung kohhran Chairman leh Treasurer, Pastor bial Executive Commitee, Sunday School Superintendent leh zirtirtu, Bial leh tualchhung Mission Commt Chairman, Fellowship dept hrang hrangah Senior Adviser a ni. Hei bakah hian Assembly Mission Executive Commitee member a ni tawh bawk. Republic Pastor bial hmalakna Church Expansion-ah a hmalatu berte zinga mi a ni a, Falkawn kohhran saw a hmalaknaa din a ni nghe nghe.
Kum 2020 khan Mission Vengthlangah pemin, BCM Shalom kohhran-ah tualchhung kohhran committee member a ni a, BKHP Senior Adviser a ni tawh bawk. A taksa lan hrisel lohna avangin kohhran upa atangin March ni 30, 2024 atang khan a chawl ta a ni. Kohhran Upa rawngbawlna hi kum 41 (1983-2024) chhung a thawk a ni.
A nat dan:
Kum 2017 July thla khan a zing tawngtai inkhawm kal chu a âwm a nat avang leh thawk harsa a tih avangin inah a rawn haw a. Damdawiinah kalpui nghal niin, heart attack a lo ni. Ni engemaw zat damdawiinah enkawl a nih hnuah dam takin damdawiin a chhuahsan. Hemi kum vêk, November thla tawp lam khan Dr Loncy-a refer angin Birla Hospital, Kolkata-ah kalpui a ni a, a lunga thisen dâwtah stent vuah a ni. Hemi hnu hian Aizawl lamah daktawr rawn chhunzawmin, a dam tha chho ve zel a.
Kum 2018 July 9 zan khan a thaw rawn hah thutin damdawiin panpui a ni a. Mahse reh aiin zual lam a pan zel si a. City Hospital, Mission Vengah ICU-ah dahluh a ni. A chuap lam tha lo Chronic Obstructive Pulmonary Disease (COPD) a lo ni a. Aizawl hospital-ah insawn lehin, damdawiinah thla khat vel lai enkawl a ni.
Hemi hnu hian a chuap natna avanga thawhah hi a rawn chhuak ta zeuh zeuh a. Kum tin damdawiinah enkawl ngaiin a awm ta ziah a. Kum 2023 atang khan a ziaawm ta deuh a, damdawiin luh ngaiin a awm ta lo. Amaherawhchu hemi hnu atang hian a awm dan danglamin, tawng te a harsat chho ta a. Dandawiinah entir niin CT scan leh MRI atangin thluak lam natna, Dementia/Alzheimer a vei a ni tih hriatchhuah a ni. Kum 2023 kum tawp lam atang khan zual chhovin, ven leh vil ngaiin a awm a. Chhungte hriat loha khawlaia lo chhuah leh inzawn te a lo ngai ta hial a.
Hetih lai hian a taksa dinglam zawng hi a hmang tha thei ta lo bawk a. Khawlai leh inchhunga a kalte hi a tlu ta fo mai a. A tlukna lamah a lu hi tum engemawzat a tauh thi a. A khel ruh leh a dar ruh a pelh bawk. Daktawrah kalpui a ni a, Parkinson Plus natna a vei tih hriatchhuah a ni. Hemi hnu atang hi chuan inchhungah pawh kaih leh puih ngaiin a awm a, chaw pawh amahin a ei thei ta lo.
A natna hrang hrang avang hian amah pawh a chak lo chho ta zel a, damdawiinah a khat tawka entir a ngai a. Kum 2025, July thla khan a hma lama a chuap lam natna chu entir leh niin, chuap sâwng natna, Interstitial Lung Disease (ILD) a ni tih hriatchhuah belh a ni a. Hei hian a thawk tibuaiin, in lamah oxygen inchhawp a ngai ta hial a. Hetih lai hian a Parkinson Plus natna vangin a ka atanga thil ei leh in lem a harsat chho ta a. Chaw leh damdawi te ei theih loh chang a awm ta fo a, chu chuan a taksa a tichau tial tial bawk a. A thianpa ber, amah kawm hlima enkawltu ber, Pu J. Zathuama'n July 12, 2025-a a boralsan hnu phei chuan khumbetin a na chho ta a.
October 2025 thla tawp lam atang khan a natna a rawn zual chho ta deuh a. In lamah enkawl a nih hnuah November 12, 2025 khan Trinity Hospital-a ICCU-ah admit a ni. Tlema hma a sawn deuh avangin Nov 15-ah damdawiin atangin a chhuak. A hnar-ah pipe vuahin dawmdawi leh thil tuiril lam pek a ni. Nov. 17, 2025 khan a lung lam dik lo vangin Ebenezer Hospital-ah admit leh a ni a. Ni 19-ah daktawr rawn angin inlama inenkawl chhunzawm turin a chhuak In lamah enkawl chhunzawm a ni a. Amaherawhchu a taksa a chak tawk tawh lo a, hmasawn lam pan aiin a chau deuh tial tial a. Kum 2026 kumthar hnu lawkah a thawhah zualin a chau lehzual a. Hemi hnu hi chuan enkawl leh vil deuh reng ngaiin a awm ta a ni.
January 23 (Zirtawpni) khan chhun lamah a thawhah thutin a chau zual hle mai a. A BP a hniam hle bawk. Mahse zawi zawi a ziaawm chho leh deuhin, January 30,2026 chawhnu lam khan zuallam pan lehin heta tang hian thatchhuah tak tak nei tawh lovin, February ni 1, 2026 zing dar 3:40 khan van kohna chhangin min lo kalsan ta.
February ni 1, 2026 zing dar 11:00 ah a thlahna BCM Shalom kohhran hall-ah neih a ni a, Upa C. Chawnghnuna’n thlahna inkhawm a kai hruaia, chhungkaw aiawhin afapa Pu ZD. Laltanpuia’n thusawina a nei.
Thlahna Programme hman zawh hian BCM Biak In, Shalom, Aizawl-ah vuina hun hman a ni a, rev. V. Laltlanzuala Bialtu Pastor-in vuina hun a hmang a, a mah thlah nan BCM Shalom kohhran zaipawl te’n hla an sa a ni. A thatlaia rawngbawl nuamti em em, rawngbawlna ngai pawimawh tak mai chu, arawng a lo bawl thin Lalpa hnenah kum khuaa chawl tawh turin min lo kal san ta a ni. Upa ZD. Zotluanga boralna hi BCM leh BCM Shalom kohhran tan chuan channa nasa tak a ni.
