May 2, 2025 Zirtawpni kha Baptist Kohhran Hmeichhe Pawl (BKHP) din champhaphak vawi 87-na a ni a. Thupui atan “Lawm chunga Lalpa rawngbawl” (Sam 100:2) a ni. MBKHP lam atanga ruahman leh ngenna an siam angin hemi ni zingkar leh chhun lama hun hmang theite chuan khawtlang tana thil tha tihna atan hmangin khawlai tihfai hnatlangte an thawk ang, zan lamah BKHP Day pualin inkhawmin, thupui thlan sa hmangin thuchah ngaihthlak a ni bawk ang. Hemi ni pual inkhawm thawhlawm hi Tualchhung Kohhran harsa zual tanpui nan hman tura ruahman a ni.
Baptist Kohhran Hmeichhe Pâwl hi Kohhran chhunga Pâwl (Fellowship) ding hmasa ber a ni a, thlarau lam rawngbâwlnaah pawh kohhran hnuk leh chelh mar tlattu pâwl tangkai tak a ni. Kum 1938 March thlaah Assembly hriatpuina leh kaihhruainain Serkawnah BMS Missionary Pi Zirtiri (EM Chapman) hovin Girls Auxiliary (GA) tiin din a ni a. Hruaitu hmasate chu hêngte hi an ni.
Nl. Thenvungi – President
Nl. Laltinthangi – Secretary
Nl. Nûchhûngi – Treasurer
Girls Auxiliary (GA) hian nula chauh a huam a, chhungkaw tanpui ngaite tanpui chu an tum ber pakhat a ni. Kum 1947-ah Nû Pâwl din a lo ni leh ta a. Chutianga hmeichhe zînga pâwl pahnih lo ding ta chu Assembly hotute chuan fel tawk lova hriain, pâwl pahnihte chu pâwl khatah chhung khawmin, March 20, 1965-ah chuan BKHP din a lo ni ta a. He pâwl hian Baptist Kohhrana hmeichhia zawng zawng kum 14 chunglam, a duh apiang chu a huap vek a ni.
Kum 23 chhûng zet chu March ni 20 hi BKHP Day atan hman thin a ni a. Hei hi MBKHP Executive Committee-in ngun taka a ngaihtuah that hnuah, “Mizoram Baptist Kohhran Hmeichhe rawngbawlna awmze neia, a din chhuahna chu May 2, 1938 hi a ni e,” tiin, kum 1990 atang chuan ram pûmah BKHP Day chu May ni 2-ah hman a lo ni ta a ni.
MBKHP statistics report- 2025-in a tarlan danin, tunah hian BKHP hi Pastor Bial 92 –ah Unit 476 dingin, member 34857 an awm mek a ni.
