May 4, 2024 (Inrinni) chawhma dar 11:00 khan Aizawl Area Development Committee Meeting, Baptist Centre, Falkland-ah neih a ni a.  Meeting hi Chairman Rev. C. Lalhungliana’n a kaihruai a, Secretary Rev. R. Lalrintluanga, Executive Secretary, Aizawl Area ni bawkin report a pe a. Tun tum meeting-ah hian committee member 52 an tel thei a ni..

Tun tum Meeting-ah hian Secretary-in Aizawl Area Development Committee te hmalakna hrang hrang report a pek te leh Baptist Centre Building buatsaihna leh Annexed Building sak mek atana hma lakna te thlirin an pawm a, kum 2024-2025 atan Bial Target ruahmanna te thlirin an pawm bawk.

Secretary report-in a tarlan zingah – Aizawl Area ah Tualchhung Kohhran 186, Pastor Bial 29, Area Baptist Council 5 an awm thu leh kum 2023-24 chhungin Kohhran thar pahnih  Zuangtui Vengthar Kohhran (Thuampui Bial) leh Horep Kohhran, Hunthar(Bawngkawn Bial)an din thu te, Executive Secretary Office, Baptist House, Khatla-a awm thin chu Baptist Centre, Falkland-ah December 19, 2023-ah an insawn thu te, Baptist House Renovation leh Multipurpose Hall, Steel Structure siam pawh zawh fel a nih thu leh December 19, 2023 khan hawn a nih tawh thu te, Baptist Centre, Annaxed Building sak chhoh mek a nih thu te a tarlang bawk.

Aizawl Area Development Committee ten Zokhawthar-ah Medical Free Clinic neia an feh chhuah thu te, BCM R&D sum te, Charity Fund leh Aizawl Area Kohhran te sum thawh tlingkhawm atangin Zohmun, Sakawr dai Biala Thli leh rial avanga chhiatna tuar te hnenah cheng 290,000/- sem a nih thu te, BCM R&D atanga sum hmun cheng nuai 3 atangin Aizawl khaw chhunga raltlan te chhawmdawlna leh tanpuina pek an nih thu te tarlan a ni bawk.