November 12,2023 (Pathinni) chawhnu dar 1:30 khan BCM Central Church Kohhran Hall-ah Mizoram BMP Media Cell buatsaihin Media Campaign neih a ni a. Aizawl khawpui chhunga Bial leh Unit aiawh mi 70 chuang zet an kal khawm a ni.
Campaign hi Pu C. Lalawmpuia, MBMP Asst.Secretary-in a kaihruai a, Rbt K. Zodinmawia, Chairman, Aizawl Area BMP Coordination Committee in Pathian hnena inkawltirna hun hmangin, Pu Thangliana, Secretary, Aizawl Area BMP Coordination Committee-in inhmelhriattirna a nei bawk. MBMP President – Rbt. Chawngrolura Chawngthu-in MBMP Media tlangzarhna a nei a, Pu Vanlalpeka, MBMP Media Cell Convener leh MBMP Fin.Secretary ni bawk-in MBMP report tlangpui a pek hnu-ah, Media rawngbawlna chungchang leh MBMP Media Cell din chhan te, hmachhawp leh ruahmanna te a tarlang. Nl. C. Lalrinzuali, Aizawl Central Church leh BMP Aizawl Central Unit ten zaia rawngbawlna an neiin, Zawhna leh chhanna te, sawihona te neih a nih hnuah, Pu Neihkunga, Executive Committee Member, MBMP –in Pathian hnenah lawmthusawiin hun a khar ta a ni.
Mizoram BMP Executive Committee -in BMP member ten Bial leh Unit hrang hrang rawngbawlna inhriatpawh zung zung theih nan te, BMP chanchin Media lama phochhuah awlsam zawk nan te, BMP ten rawngbawlna zau zawk leh hmasawn zawka hma a lak a, ke a pen theih nan te Media Cell hi a din a. Media Cell hruaitu te chuan hmalakna hmasa ber atan Aizawl, Lawngtlai leh Lungleiah te Media Campaign neih ni se tiin a rel a. Hemi rual hian Social Media Platform hrang hrang - Whatsapp, Facebook, Instagram leh Youtube ah te Official Group leh Channel te siam-in tangkai taka hman turin a tlangzarh nghal a ni.
