Mizoram Baptist Kohhran huang chhunga tawngkam hman dan leh thuziak dan kalphung te inangtlanga hman a nih theih nan ‘Baptist House Style’ buatsaih ni se ti-a 2023 Assembly in a rel bawhzui tura ruat Sub-Committtee in a buatsaih leh ruahman chu peihfel a ni tawh a. He inkaihhruaina hi lehkhabu-a chhuah a nih hma in Sub-Committee ruahmanna in February 8, ningani khan Committee Room No.1, Headquarters Office Serkawn ah inrawnkhawmna neih a ni.

He inrawnkhawmna ah hian department hrang hranga hotu ber te, fellowship department secretary te leh thu thehdarna kawnga hnarkaitu te leh mimal sawm bik te an kal a.  Inrawnkhawmna-ah hian Sub-Committee in kohhran huang chhunga tawngkam leh thumal hman dan tur leh mizo tawng ziak dan tur inkaihhruaina a buatsaih chu thlirho a ni a, kumin Assembly-a sem chhuah hman tura buatsaih a ni dawn a ni.