Assembly rorel hi Rev. KV Thanga, President in bul a tan a, rorel palai lawmna thu a sawi  zawh a President thar Rev. F. Ramdinmawia hnenah President nihna a hlan a, ani hian rorel a kaihruai nghal a, palai lawmna a bul tanin rorel ni hmasa ber neih chhunzawm nghal a ni. Vawiin rorel-ah hian palai member 1561 in ro an rel a ni.

Hun hmasa lamah hian kum 2023 Assembly leh 2024 Assembly inkara Ordained Pastor leh Kohhran Upa kal ta te sunna hun hman a ni a, tun tumah hian Pastor  pathum leh kohhran upa 70, an vaiin mi 73 sun an ni, an rawngbawlna avanga lawmthu sawina leh an kalsan tak kohhran hote leh an chhungte tana tawngtaisakna Rev. C. Chhuntluanga’n a hmang.

Report hrang hrang ngaihthlak a ni a, General Secretary-in Finance report-a a tarlan danin - April 2023 – February 2024 BCM Thawhlawm (Target) atanga sum hmuh tawh zat chu cheng nuai 7199, sing 7, leh 49 (Rs.71,99,70,049 /-) a ni a, 2023-2024 atana Target pumpui atangin 87.19 a lut tawh a, Target la tlin lohna hi cheng Nuai 688, sang 9 leh 833 (8.33 %) a ni.  Statistician Report-in a tarlan zing-ah tun dinhmunah BCM hi ABC 17 awmin, Pastor Bial 92 leh Tualchhung Kohhran 678 an awm a, Kohhran member zawng zawng 1,79,280 niin, kum hmasa aia member punna chu 2876 a ni. AGS – Mission Report chuan Mission Field hrang hrang 25-ah rawng bawl mek a nih thu te, Missionary leh Mission hnuaiah  thawktu mi 1343, an awm thu te, kum 2023 chhungin Kohhran thar 16 leh Fellowship 15 dinin, ringthar 4689 an awm thu a tarlang bawk.

President-elect atan Rev. Dr. C. Vanlaldika, tuna AICS Principal nilai chu thlan a ni a, Statistician atan Upa J.Lawmsanga, Serkawn thlan a ni bawk. Vawiin rorel ah hian Mizoram chhung leh Mizoram pawn hmun hrang hranga palai tur te ruat an nih bak ah, Assembly Committee hrang hrang member tur ruat an ni. Pay Commission vawi 12-na din a ni a, member 12 ruat nghal an ni.