Mizoram Baptist Kohhran, Headquarters Office, Serkawn Lunglei-a thawk lai, Tv. Lalruatkima Fanai (Papuia) LDC, Property Department-a thawk mek chu Vawiin, June 8, 2023 (Ningani) chawhnu dar 1:45 khan Christian Hopital, Serkawn-ah Internal Bleeding avangin chatuan ram min san san ta..

A ruang hi Christian Hospital, Serkawn atangin Headquarters Office-ah lakphei a ni a, General Secretary Rev. R. Lalbiakliana’n thlahna hun tawi kaihruaiin Headquarters Staff te leh Department Institutions hrang hranga thawktute he hunah hian an tel a ni.
 

General Secretary chuan Tv. Lalruatkima Fanai (Pa-Puia) mize zawiawi leh ngainat awm tak, mi inngaitlawm leh mi pawi sawi ngai lo a nihna te, a hnaah rinawm taka a thawh thin thu te sawiin, chatuan ram min pan san ta mai chu a ui thu a sawi a. BCM aiawhin Nl. Remsangpuii leh BCM Headquarters Staff Welfare aiawhin Pi R. Lalbiakzami ten pangpar an dah a. Tv. Lalruatkima Fanai Pa Pu F. Ngurkhuma, Bazarveng, Lawngtlaiin lawmthusawina neiin Rev. R. Lalnunzira, AGS – Service in tawngtainain a thlah ta a ni.

A ruang hi Lungleia a chenna In, Farmveng-ah lak niin, tlai lamah Lawngtlai panpui a ni. Zaninah tlaivarpui a ni  ang a, June 9 (Zirtawpni-ah) an chenna in, Bazarveng-ah vui a ni ang.

Tv. Lalruatkima hi Pu F Ngurkhuma leh Pi Lalbiaktluangite fa 4 zinga  naupang ber niin 1988  July 4 khan a piang a. Thiamna lamah B.Com niin kum 2019, April 15 ah BCM hnuaiah LDC atana lak niin, Executive Secretary Office, Lawngtlai-ah a thawk a. Kum 2022, April 1 atangin Headquarters Office, Serkawnah sawn a ni a, a thih ni thlengin Property Department-ah LDC hna a thawk mek a ni.