September 20,2024 (Zirtawpni) chhun dar 12:00 khan Mizoram Baptist Kohhran, Cheural, chuan an Biak In thar chu BCM President Rev. F. Ramdinmawia’n hawngin Pathian hnenah a hlan. Pu Lalruatkima, Administrative Officer-in he hun hi hmapuiin chibaibukna a sawi a, Biak In  sakna tura  Concept drawing leh Architectural design zawng zawng siam sak tu Upa T. Lalhlimpuia, BCM Venglai pawh an sawm angin Biak In hawn programme hi hmanpuiin, lawmpuina thu a sawi bawk.

Biak In hawn Inkhawm hi chhun dar 12:00 ah neih niin Upa V. Lalupa’n Inkhawm a kaihruai a, Tualchhung Kohhran Secretary-in thu pawimawh puanna neiin, Building Comtt.Secretary-in Biak In sak dan report a pe bawk.  Biak In hawngtu Rev. F. Ramdinmawia’n thuchah a sawi bakah Bialtu pastor Rev. F.P Lalnunrema’n lawmthusawina neiin, Lawngtlai Area Baptist Choir, Bial Zaipawl, Tualchhung Kohhran Zaipawl leh BMP, BKHP leh KNP Zaipawl ten fakna hla remin Nl. Lalhmangaihzualin’n fakna hla a sa bawk.

Tuna Biak In thar an hawn hi  March 21, 2016 khan, hetih laia General Secretary Rev. H. Lianngaia’n lungphum a phum a, April 5, 2016-ah ban khur laiin sak tan a ni. Biak In zau zawng hi a dung feet 92, a vang feet 48 a ni.  Sak tan kum leh hawn kum chhiar telin Biak In sak chhung hi kum 8 leh thla 5 niin, hemi chhung hian a sakna atan tha 6,358 an seng a, hnatlang tha tel lova Biak In sak nana sum sen zawng zawng chu Rs.  1,77,09,770 /-a ni.  Biak In thar design leh ruahmanna siam saktu, Upa T. Lalhlimpuia hian hna thawh man pakhatmah la lovin, a thlawn vekin a tihsak a, Kohhran hruaitute leh Kohhran mite an lawm hle a ni.

BCM Cheural hi Phawngpui North Pastor Bial-ah awmin Chhungkaw  105-ah Kohhran member 552 an awm a, Kohhran Upa 9 leh Rawngbawltu 11 an awm mek a ni.